ടെഹ്രാൻ: പ്രസിഡൻ്റ് ഡോണൾഡ് ട്രംപിൻ്റെ ഉത്തരവിനെത്തുടർന്ന് ഇറാനിലെ നിരവധി ലക്ഷ്യങ്ങൾക്ക് നേരെ അമേരിക്ക വീണ്ടും വ്യോമാക്രമണം നടത്തി. ഇതിന് പിന്നാലെ ബഹ്റൈനിലെയും കുവൈറ്റിലെയും യുഎസ് സൈനിക താവളങ്ങൾക്ക് നേരെയും, ഹോർമുസ് കടലിടുക്കിലെ രണ്ട് കപ്പലുകൾക്ക് നേരെയും ആക്രമണം നടത്തിക്കൊണ്ട് ഇറാൻ തിരിച്ചടിച്ചു. ബഹ്റൈനിലെ ഷെയ്ഖ് ഈസ എയർ ബേസ്, കുവൈറ്റിലെ അലി അൽ സലേം എയർ ബേസ്, അഹമ്മദ് അൽ-ജാബർ എയർ ബേസ് എന്നിവയ്ക്ക് നേരെയും തങ്ങൾ ആക്രമണം നടത്തിയതായി ഇറാൻ അവകാശപ്പെട്ടു.
അതേസമയം, ഹോർമുസ് കടലിടുക്കിന് സമീപമുള്ള ഖേഷ്ം ദ്വീപ്, ബന്ദർ അബ്ബാസ്, സിരിക് എന്നീ നഗരങ്ങളിൽ സ്ഫോടനങ്ങൾ ഉണ്ടായതായി ഇറാൻ്റെ ഔദ്യോഗിക മാധ്യമങ്ങൾ റിപ്പോർട്ട് ചെയ്തു. തെക്കൻ നഗരമായ കർഗാനിലുണ്ടായ സ്ഫോടനത്തിൽ രണ്ട് പേർക്ക് പരിക്കേറ്റിട്ടുണ്ട്. ഇറാൻ്റെ ഭാഗത്തുനിന്നുണ്ടായ തുടർച്ചയായ പ്രകോപനങ്ങൾക്കുള്ള മറുപടിയാണ് ബുധനാഴ്ച രാത്രി വൈകി നടത്തിയ ഈ ആക്രമണമെന്ന് യുഎസ് സൈന്യം വ്യക്തമാക്കി.
കഴിഞ്ഞ ഏപ്രിലിൽ ഉണ്ടാക്കിയ വെടിനിർത്തൽ കരാർ അമേരിക്ക ആവർത്തിച്ച് ലംഘിക്കുകയാണെന്ന് ഇറാൻ്റെ ഇസ്ലാമിക് റെവല്യൂഷണറി ഗാർഡ് കോർപ്സ് കുറ്റപ്പെടുത്തി. കൂടാതെ, ഹോർമുസ് കടലിടുക്ക് “അടുത്ത അറിയിപ്പ് ഉണ്ടാകുന്നത് വരെ അടച്ചതായും” ഇറാൻ പ്രഖ്യാപിച്ചു. ലോകത്തിലെ ഏറ്റവും പ്രധാനപ്പെട്ട ഈ ജലപാതയിലൂടെയുള്ള എണ്ണക്കപ്പലുകൾ ഉൾപ്പെടെയുള്ള എല്ലാ വാണിജ്യ സർവീസുകളെയും ഇത് ബാധിക്കും. കപ്പലുകൾ സുരക്ഷിതമായി കടന്നുപോകാൻ തങ്ങൾ സഹായിക്കുന്നുണ്ടെന്ന അമേരിക്കയുടെ മുൻ അവകാശവാദങ്ങളെ ഐആർജിസി പൂർണ്ണമായി തള്ളിപ്പറഞ്ഞു. നിയമവിരുദ്ധമായി കടന്നുപോകാൻ ശ്രമിച്ച രണ്ട് എണ്ണക്കപ്പലുകൾ ആക്രമിച്ചതായി ഐആർജിസി പിന്നീട് അറിയിച്ചു.
ഹോർമുസ് കടലിടുക്കിൽ യുഎസിൻ്റെ അപ്പാച്ചെ ഹെലികോപ്റ്റർ ഇറാൻ വെടിവെച്ചിട്ടതിനെത്തുടർന്ന് ഇരുരാജ്യങ്ങളും തമ്മിൽ മുൻപ് വ്യോമാക്രമണങ്ങൾ നടത്തിയിരുന്നു. ഇതിന് തൊട്ടുപിന്നാലെയാണ് ഇപ്പോഴത്തെ ശക്തമായ സൈനിക നീക്കം. അപകടത്തിൽപ്പെട്ട രണ്ട് യുഎസ് പൈലറ്റുമാരെയും പിന്നീട് നിന്ന് രക്ഷപ്പെടുത്തിയിരുന്നു.
ഇറാനെതിരെ വളരെ ശക്തമായ നടപടിയുണ്ടാകുമെന്ന് വൈറ്റ് ഹൗസിൽ വാർത്താലേഖകരോട് സംസാരിക്കവെ ഡോണൾഡ് ട്രംപ് പറഞ്ഞു. “സമാധാന കരാറുമായി ബന്ധപ്പെട്ട് ഞങ്ങൾ വളരെ അടുത്തായിരുന്നു. എന്നാൽ അവർ നമ്മളെ വിഡ്ഢികളാക്കുകയാണ് ചെയ്തത്,” ട്രംപ് പറഞ്ഞു. സമാധാന കരാറിലെത്താൻ ഇറാൻ വൈകിയെന്നും അതിനുള്ള വില ഇപ്പോൾ അവർ നൽകേണ്ടിവരുമെന്നും അദ്ദേഹം തൻ്റെ ട്രൂത്ത് സോഷ്യൽ പ്ലാറ്റ്ഫോമിൽ കുറിച്ചു. ഒരു കരാറിൽ ഒപ്പിടാൻ തയ്യാറായില്ലെങ്കിൽ ഇറാൻ്റെ പവർ പ്ലാൻ്റുകളും പാലങ്ങളും ആക്രമിക്കുമെന്നും ഫോക്സ് ന്യൂസിന് നൽകിയ അഭിമുഖത്തിൽ ട്രംപ് ഭീഷണിപ്പെടുത്തി.
എന്നാൽ ട്രംപിന്റെ ഭീഷണികൾക്കെതിരെ ഇറാന്റെ പ്രസിഡന്റ് മസൂദ് പെസെഷ്കിയൻ എക്സ് പ്ലാറ്റ്ഫോമിലൂടെ ശക്തമായി പ്രതികരിച്ചു. “അടിസ്ഥാന സൗകര്യങ്ങൾ ജനങ്ങളുടെ ജീവരക്തമാണ്. ഗതാഗത ശൃംഖലകൾ മുതൽ വൈദ്യുതി, ജല വ്യവസായങ്ങൾ വരെയുള്ളവ തകർക്കുമെന്ന ഭീഷണി ശക്തിപ്രകടനമല്ല, മറിച്ച് ഒരു ജനതയുടെ ആത്മവീര്യത്തിന് മുന്നിൽ പതറുന്നതിൻ്റെ ലക്ഷണമാണ്,” അദ്ദേഹം കുറിച്ചു. തങ്ങളുടെ വിദഗ്ധരുടെ അറിവിലും ദേശീയ ഐക്യത്തിലും വിശ്വസിച്ച് ഇറാൻ ഏത് സമ്മർദ്ദത്തെയും ഭീഷണിയെയും ദൃഢതയോടെ നേരിടുമെന്നും അദ്ദേഹം കൂട്ടിച്ചേർത്തു.
US airstrikes: Iran retaliates; attacks US bases in Bahrain and Kuwait
