ന്യൂഡൽഹി: ഒമാൻ തീരത്ത് ഇറാൻ എണ്ണക്കപ്പലിന് നേരെ യുഎസ് നടത്തിയ മിസൈലാക്രമണത്തിൽ കപ്പലിലുണ്ടായിരുന്ന രണ്ട് ഇന്ത്യൻ നാവികർ കൊല്ലപ്പെട്ടു. ഒരാളെ കാണാതായി. ‘സെറ്റെബെല്ലോ’ എന്ന എണ്ണക്കപ്പലിന് നേരെയാണ് യുഎസ് യുദ്ധവിമാനങ്ങൾ ആക്രമണം നടത്തിയത്. കപ്പലിലുണ്ടായിരുന്ന 24 ഇന്ത്യൻ ജീവനക്കാരിൽ 21 പേരെ ഒമാൻ നാവികസേന സുരക്ഷിതമായി രക്ഷപ്പെടുത്തി. ഡെക്ക് കേഡറ്റ് ആദിത്യ ശർമ്മ, എഞ്ചിൻ ഫിറ്റർ ശിവാനന്ദ് ചൗരസ്യ എന്നിവരാണ് മരണപ്പെട്ടതെന്ന് ഫോർവേഡ് സീമെൻസ് യൂണിയൻ ഓഫ് ഇന്ത്യ സ്ഥിരീകരിച്ചു.
കപ്പലിലെ ചീഫ് എഞ്ചിനീയറായ പട്നാല സുരേഷിനെയാണ് ഇനി കണ്ടെത്താനുള്ളത്. ഇദ്ദേഹത്തിനായി ഒമാൻ നാവികസേനയുടെ നേതൃത്വത്തിൽ കടലിൽ തിരച്ചിൽ തുടരുകയാണ്. ഒമാൻ തീരത്തെ സോഹാർ തുറമുഖത്തിന് 20 നോട്ടിക്കൽ മൈൽ വടക്കുകിഴക്ക് വെച്ചായിരുന്നു ആക്രമണം. പലാവു പതാകയേന്തിയ കപ്പൽ, യുഎസ് ഏർപ്പെടുത്തിയ ഇറാൻ എണ്ണ ഉപരോധം ലംഘിച്ചതായി യുഎസ് സെൻട്രൽ കമാൻഡ് അറിയിച്ചു. നിർദ്ദേശങ്ങൾ പാലിക്കാൻ കപ്പൽ തയ്യാറാകാത്തതിനെത്തുടർന്ന് യുഎസ് യുദ്ധവിമാനങ്ങൾ കപ്പലിൻ്റെ എഞ്ചിൻ റൂമിലേക്ക് മിസൈലുകൾ തൊടുക്കുകയായിരുന്നു. മിസൈൽ പതിച്ചയുടൻ കപ്പലിൽ വൻ തീപിടിത്തമുണ്ടായി.
യുഎസിനെ പ്രതിഷേധം അറിയിച്ച് ഇന്ത്യ
സംഭവത്തിൽ ഇന്ത്യൻ വിദേശകാര്യ മന്ത്രാലയം കടുത്ത ആശങ്കയും പ്രതിഷേധവും രേഖപ്പെടുത്തി. ന്യൂഡൽഹിയിലെ യുഎസ് ഡെപ്യൂട്ടി ചീഫ് ഓഫ് മിഷൻ ജേസൺ മീക്സിനെ വിളിച്ചു വരുത്തിയാണ് ഇന്ത്യ ഔദ്യോഗികമായി പ്രതിഷേധം അറിയിച്ചത്. അന്താരാഷ്ട്ര സമുദ്രപാതകളിലൂടെയുള്ള വാണിജ്യ കപ്പലുകളുടെ സുരക്ഷിതമായ സഞ്ചാരം ഉറപ്പാക്കണമെന്നും പശ്ചിമേഷ്യയിലെ സംഘർഷങ്ങൾ നയതന്ത്ര നീക്കങ്ങളിലൂടെ പരിഹരിക്കണമെന്നും ഇന്ത്യ ആവശ്യപ്പെട്ടു. രക്ഷപ്പെടുത്തിയ 21 ഇന്ത്യൻ നാവികരെയും സുരക്ഷിതമായി നാട്ടിലെത്തിക്കാനുള്ള നടപടികൾ മസ്കറ്റിലെ ഇന്ത്യൻ എംബസിയുടെ നേതൃത്വത്തിൽ ദ്രുതഗതിയിൽ പുരോഗമിക്കുകയാണ്.
US missile strike on Iranian oil tanker off Oman coast: Two Indian sailors killed, search underway for one missing
