വാഷിംഗ്ടൺ: ഇറാന് യാതൊരു കാരണവശാലും ആയുധങ്ങൾ വിതരണം ചെയ്യില്ലെന്ന് ചൈനീസ് പ്രസിഡൻ്റ് ഷി ജിൻപിംഗും റഷ്യൻ പ്രസിഡൻ്റ് വ്ളാഡിമിർ പുടിനും തനിക്ക് വ്യക്തിപരമായി ഉറപ്പുനൽകിയതായി യുഎസ് പ്രസിഡൻ്റ് ഡോണൾഡ് ട്രംപ് വ്യക്തമാക്കി. തൻ്റെ ഔദ്യോഗിക സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യൽ’ വഴിയാണ് ട്രംപ് ഇക്കാര്യം പുറത്തുവിട്ടത്.
ഇരു രാജ്യങ്ങളും തങ്ങൾക്ക് നൽകിയ വാഗ്ദാനം പാലിക്കുമെന്നാണ് കരുതുന്നതെന്ന് ട്രംപ് പറഞ്ഞു. ഇറാൻ്റെ കാര്യത്തിൽ ഈ രണ്ട് വൻശക്തികളും നിലവിൽ ഇടപെടുന്നില്ലെന്നാണ് തൻ്റെ വിശ്വാസമെന്നും, ഒരുപക്ഷേ അവർ ഈ തീരുമാനത്തിൽ നിന്ന് പിന്മാറി ഇറാനെ സഹായിക്കാൻ തുനിഞ്ഞാൽ അത് അവർക്ക് തന്നെ വലിയ പ്രത്യാഘാതങ്ങൾ ഉണ്ടാക്കുമെന്നും ട്രംപ് മുന്നറിയിപ്പ് നൽകി.
അടുത്തിടെ ബെയ്ജിംഗിൽ വെച്ച് നടന്ന കൂടിക്കാഴ്ചയിൽ ചൈനീസ് സർക്കാരോ അവിടുത്തെ പ്രതിരോധ കമ്പനികളോ ഇറാന് സൈനിക ഉപകരണങ്ങൾ നൽകില്ലെന്ന് ഷി ജിൻപിംഗ് തനിക്ക് ഉറപ്പ് നൽകിയതായി ട്രംപ് വെളിപ്പെടുത്തി. ചൈനയുമായുള്ള നല്ല ബന്ധം കണക്കിലെടുത്ത് ഷി ജിൻപിംഗിന്റെ വാക്കുകളെ വിശ്വാസത്തിലെടുക്കുന്നുവെന്നും ട്രംപ് കൂട്ടിച്ചേർത്തു.
യുക്രെയ്നുമായി യുദ്ധം നിലനിൽക്കുന്ന പശ്ചാത്തലത്തിലും ഇറാന് ആയുധം വിൽക്കില്ലെന്ന് റഷ്യൻ പ്രസിഡൻ്റ് വ്ളാഡിമിർ പുടിനും തന്നോട് പറഞ്ഞതായി ട്രംപ് അവകാശപ്പെട്ടു. അമേരിക്ക നേരിട്ട് യുക്രെയ്ന് ആയുധം നൽകുന്നില്ലെന്നും, മറിച്ച് നാറ്റോ രാജ്യങ്ങൾക്കാണ് പൂർണ്ണവില ഈടാക്കി ആയുധങ്ങൾ വിൽക്കുന്നതെന്നും പുടിന് കൃത്യമായി അറിയാമെന്നും ട്രംപ് വ്യക്തമാക്കി.
മിഡിൽ ഈസ്റ്റിലെ യുഎസ് സൈനിക താവളങ്ങൾക്ക് നേരെ നടന്ന ആക്രമണങ്ങളിൽ ഇറാന് ലക്ഷ്യസ്ഥാനങ്ങൾ കണ്ടെത്താൻ റഷ്യയോ ചൈനയോ രഹസ്യവിവരങ്ങൾ നൽകിയിട്ടുണ്ടോ എന്ന് വാഷിംഗ്ടൺ അന്വേഷിക്കുന്നതിനിടയിലാണ് ട്രംപിൻ്റെ ഈ നിർണ്ണായക പ്രസ്താവന പുറത്തുവരുന്നത്.
Trump says China and Russia have assured Iran they will not provide weapons; warns that if the opposite happens, the game will change
