വാഷിംഗ്ടണ്: പ്രസിഡന്റ് ട്രംപിന്റെ നാടുകടത്തല് ഭീഷണി മുതലെടുത്ത് തട്ടിപ്പുകാര്. ഞെട്ടിക്കുന്ന അനുഭവം പങ്കുവെച്ച് യുഎസില് തട്ടിപ്പിനിരയായ ഇന്ത്യന് വിദ്യാര്ത്ഥിനി ശ്രേയ ബേദി.
മേയ് 29 നാണ് ശ്രേയയുടെ ജീവിതം മാറിയ ഫോണ്കോള് എത്തിയത്. ഇമിഗ്രേഷന് ഓഫീസര്മാരെന്ന വ്യാജേനയാണ് തട്ടിപ്പുകാര് സംസാരിച്ചത്. ശ്രേയ ഇമിഗ്രേഷന് നിയമങ്ങള് ലംഘിക്കുന്നുവെന്ന് തെറ്റിധരിപ്പിച്ചായിരുന്നു ഫോണ് സംഭാഷണം തുടങ്ങിയത്. അറസ്റ്റും നാടുകടത്തലും ഒഴിവാക്കാന്, ‘ബോണ്ട്’ പേയ്മെന്റായി 5000 ഡോളറിന്റെ ഗിഫ്റ്റ് കാര്ഡുകള് വാങ്ങാന് തട്ടിപ്പുകാര് അവരെ നിര്ബന്ധിച്ചു.
ഇന്ത്യാന യൂണിവേഴ്സിറ്റി ബ്ലൂമിംഗ്ടണില് ഹ്യൂമന്-കമ്പ്യൂട്ടര് ഇന്ററാക്ഷനില് ബിരുദാനന്തര ബിരുദം നേടുന്നതിനായി 2022 ല് എഫ്-1 വിസയിലാണ് ശ്രേയ ബേദി യുഎസിലെത്തിയത്.
തട്ടിപ്പിനെക്കുറിച്ച് ശ്രേയയുടെ വാക്കുകള് ഇങ്ങനെ : ‘അദ്ദേഹം തന്റെ പേരും ബാഡ്ജ് നമ്പറും എനിക്ക് നല്കി, ice.gov-ല് പോയി മേരിലാന്ഡിലെ ഓഫീസ് പരിശോധിച്ച് തന്റെ ഓഫീസ് വിശദാംശങ്ങള് പരിശോധിക്കാന് എന്നോട് പറഞ്ഞു. അദ്ദേഹം വിളിക്കുന്ന അതേ ഫോണ് നമ്പറാണിതെന്ന് എനിക്ക് സ്ഥിരീകരിക്കാന് കഴിഞ്ഞു. തന്റെ ഫോണ് നിരീക്ഷിക്കുന്നുണ്ടെന്നും ആരെയും വിളിക്കാന് കഴിയില്ലെന്നും തട്ടിപ്പുകാര് പറഞ്ഞതോടെ വല്ലാതെ ഭയപ്പെട്ടു. ഒളിമ്പിയ പൊലീസ് ഡിപ്പാര്ട്ട്മെന്റില് നിന്നുള്ള ഉദ്യോഗസ്ഥനെന്ന് നടിച്ച് രണ്ടാമത്തെ തട്ടിപ്പുകാരന് വിളിച്ച് തനിക്കെതിരെ അറസ്റ്റിനുള്ള വാറണ്ട് ഉണ്ടെന്ന് പറഞ്ഞു. ‘മൂന്ന് മണിക്കൂര് തുടര്ച്ചയായി ഫോണില് സംസാരിക്കേണ്ടി വന്നു. ഫോണ് വിളിക്കുകയോ ആരെയെങ്കിലും ബന്ധപ്പെടുകയോ ചെയ്യുന്നത് കാര്യങ്ങള് കൂടുതല് വഷളാക്കുമെന്നും അവര് ആവര്ത്തിച്ച് മുന്നറിയിപ്പ് നല്കി. 5,000 ഡോളര് വിലവരുന്ന ആപ്പിള്, ടാര്ഗെറ്റ് ഗിഫ്റ്റ് കാര്ഡുകള് വാങ്ങാനും ഫോണിലൂടെ കോഡുകള് പങ്കിടാനും തട്ടിപ്പുകാര് ആവശ്യപ്പെട്ടു. അടുത്ത ദിവസം ഒരു പൊലീസ് ഉദ്യോഗസ്ഥന് കാര്ഡുകളും ബോണ്ട് പേപ്പറുകളും ശേഖരിക്കുമെന്നും തട്ടിപ്പുകാര് പറഞ്ഞു. അവര് എന്നെ മണിക്കൂറുകളോളം മാനസികമായി പീഡിപ്പിച്ചു, എന്നെ നാടുകടത്താനും അറസ്റ്റ് ചെയ്യാനും പോകുന്നുവെന്ന് എന്നെ വിശ്വസിപ്പിച്ചു,’- ബേദി പറഞ്ഞു.
അതേസമയം, തട്ടിപ്പുകാര്ക്ക് ശ്രേയയെക്കുറിച്ചുള്ള വിവരങ്ങളെല്ലാം അറിയാമായിരുന്നു എന്നത് ഞെട്ടിക്കുന്നതാണ്. ശ്രേയയുടെ പോര്ട്ട് ഓഫ് എന്ട്രി, അക്കാദമിക് പശ്ചാത്തലം, ഇന്ത്യയിലെ ഏത് നഗരത്തില് നിന്നുള്ളയാളാണ് എന്നതെല്ലാം അവര് മനസിലാക്കിയിരുന്നു.
കയ്യില് നിന്നും പണം നഷ്ടമായതോടെ മറ്റുള്ളവരോടും ഇതേക്കുറിച്ച് പറയണമെന്നായി ശ്രേയയ്ക്ക്. ‘നിങ്ങള്ക്ക് എല്ലായ്പ്പോഴും ഫോണ് വിളിക്കാനും ഒരു അഭിഭാഷകനെ വിളിക്കാനും അവകാശമുണ്ട്, സര്ക്കാര് ഏജന്സികള് ഒരിക്കലും നിങ്ങളെ നേരിട്ട് വിളിക്കില്ല; അവര് ഔദ്യോഗിക മെയില് അയയ്ക്കും- ശ്രേയ പറയുന്നു. ഒരു നിയമാനുസൃത സര്ക്കാര് ഏജന്സിയും ഒരിക്കലും ഫോണിലൂടെ ഗിഫ്റ്റ് കാര്ഡുകളോ ബാങ്ക് വിശദാംശങ്ങളോ നിങ്ങളുടെ സോഷ്യല് സെക്യൂരിറ്റി നമ്പറോ ആവശ്യപ്പെടില്ലെന്നും ആരെങ്കിലും ഈ കാര്യങ്ങളില് ഏതെങ്കിലും ചോദിച്ചാല്, അത് തീര്ച്ചയായും ഒരു തട്ടിപ്പാണെന്ന് മനസിലാക്കണമെന്നും ശ്രേയ പറയുന്നു.
‘അന്താരാഷ്ട്ര വിദ്യാര്ത്ഥികള് എന്ന നിലയില് യുഎസിലെ സംവിധാനങ്ങള് എങ്ങനെയാണെന്ന് കൃത്യമായി മനസിലാക്കേണ്ടതുണ്ട്. ഇത് ഞങ്ങളെ എളുപ്പത്തില് ഇരകളാക്കുന്നു. ഇതില് ഞാന് വീണുപോയതില് എനിക്ക് ലജ്ജ തോന്നുന്നു, പക്ഷേ മറ്റുള്ളവര് എന്റെ തെറ്റില് നിന്ന് പഠിക്കണമെന്ന് ഞാന് ആഗ്രഹിക്കുന്നു.’- ശ്രേയ കൂട്ടിച്ചേര്ത്തു.
