വാഷിങ്ടന് : ഗാസ കീഴടക്കാന് ഇസ്രയേല് പ്രധാനമന്ത്രി ബെഞ്ചമിന് നെതന്യാഹു പദ്ധതിയിടുന്നതായി ചൊവ്വാഴ്ച ചേര്ന്ന ഉന്നത സുരക്ഷാ ഉദ്യോഗസ്ഥരുടെ യോഗത്തെ ഉദ്ധരിച്ച് റോയിട്ടേഴ്സ് റിപ്പോര്ട്ട് ചെയ്തിരുന്നു. എന്നാല്, ഗാസ യുഎസ് ഏറ്റെടുക്കുമെന്ന് ഏതാനും മാസങ്ങള്ക്കു മുന്പ് യുഎസ് പ്രസിഡന്റ് ഡോണള്ഡ് ട്രംപ് പ്രഖ്യാപിച്ചിരുന്നു. ഈ വിഷയത്തില് ട്രംപിന് ഇപ്പോള് മിണ്ടാട്ടമില്ല.
ഗാസ കീഴടക്കാന് നെതന്യാഹു പദ്ധതിയിടുന്നുവെന്ന റിപ്പോര്ട്ടുകളോട് പ്രതികരിക്കാന് പോലും ട്രംപ് തയാറാകുന്നില്ല. ഇതുസംബന്ധിച്ച ചോദ്യങ്ങള്ക്ക് ഗാസയിലെ ജനങ്ങള്ക്ക് ഭക്ഷണം എത്തിക്കുന്നതിലാണ് ശ്രദ്ധയെന്നും മറ്റു കാര്യങ്ങളെക്കുറിച്ച് തനിക്ക് ഒന്നും പറയാനാവില്ലെന്നുമായിരുന്നു ട്രംപിന്റെ പ്രതികരണം. ‘ഇസ്രയേലും അറബ് രാജ്യങ്ങളും ഗാസയില് ഭക്ഷണവും അവശ്യസാമഗ്രികളും സാമ്പത്തിക സഹായവും എത്തിക്കും.’- ട്രംപ് പറഞ്ഞു.
