മിയാമിയിൽ വൻ വിമാനാപകടം ഒഴിവായത് തലനാരിഴയ്ക്ക്; റൺവേയിൽ കുതിച്ചുയരുകയായിരുന്ന വിമാനത്തിന് മുന്നിലേക്ക് ബിസിനസ് ജെറ്റ് കയറി

മിയാമി: മിയാമി അന്താരാഷ്ട്ര വിമാനത്താവളത്തിൽ ശനിയാഴ്ച വൈകുന്നേരം വൻ വിമാനാപകടം ഒഴിവായത് തലനാരിഴയ്ക്ക്. ബെർമുഡയിലേക്ക് പുറപ്പെടാനായി റൺവേയിലൂടെ അതിവേഗം കുതിച്ചുയരുകയായിരുന്ന അമേരിക്കൻ എയർലൈൻസ് വിമാനത്തിന് മുന്നിലേക്ക് മറ്റൊരു സ്വകാര്യ ബിസിനസ് ജെറ്റ് അപ്രതീക്ഷിതമായി പ്രവേശിക്കുകയായിരുന്നു. ഒരു ഘട്ടത്തിൽ ഇരുവിമാനങ്ങളും തമ്മിൽ വെറും മൂന്നിലൊന്ന് മൈൽ (ഏകദേശം 500 മീറ്റർ) മാത്രം അകലത്തിലാണ് എത്തിയത്. അപകടസാധ്യത മുന്നിൽക്കണ്ട് അമേരിക്കൻ എയർലൈൻസ് വിമാനം ഉടൻ തന്നെ ടേക്ക്-ഓഫ് ഉപേക്ഷിച്ച് അടിയന്തിരമായി ബ്രേക്ക് ചെയ്യുകയായിരുന്നു.

എയർ ട്രാഫിക് കൺട്രോളിൽ നിന്ന് അനുമതി ലഭിച്ച ശേഷമാണ് അമേരിക്കൻ എയർലൈൻസിന്റെ 308-ാം നമ്പർ വിമാനം റൺവേയിലൂടെ കുതിക്കാൻ തുടങ്ങിയത്. എന്നാൽ റൺവേയിൽ മറ്റൊരു വിമാനം കിടക്കുന്നത് പൈലറ്റുമാരുടെ ശ്രദ്ധയിൽപ്പെട്ടതോടെ ടേക്ക്-ഓഫ് അടിയന്തിരമായി റദ്ദാക്കുകയായിരുന്നു എന്ന് എയർലൈൻ വക്താവ് സിഎൻഎന്നിനോട് സ്ഥിരീകരിച്ചു.

കിഴക്കൻ സമയം വൈകുന്നേരം 6 മണിയോടെയുണ്ടായ ഈ സംഭവത്തിന് പിന്നാലെ ബിസിനസ് ജെറ്റിന്റെ പൈലറ്റും എയർ ട്രാഫിക് കൺട്രോളറും തമ്മിൽ റേഡിയോയിൽ കടുത്ത വാഗ്വാദമുണ്ടായി. കൺട്രോളറുടെ നിർദ്ദേശങ്ങൾ പൈലറ്റ് മാറി മനസ്സിലാക്കിയതാണ് പ്രശ്നത്തിന് കാരണമായത്. “നിങ്ങൾ ഇപ്പോൾ മറ്റൊരു വിമാനം ഉപയോഗിച്ചുകൊണ്ടിരിക്കുന്ന റൺവേയാണ് കുറുകെ കടന്നത്,” എന്ന് കൺട്രോളർ കടുത്ത ഭാഷയിൽ പറഞ്ഞപ്പോൾ, “നിങ്ങൾ തന്നെയാണ് എന്നോട് റൺവേ കടക്കാൻ പറഞ്ഞത് സർ,” എന്ന് പൈലറ്റ് മറുപടി നൽകി. എന്നാൽ താൻ ‘അമേരിജെറ്റ് 461’ എന്ന വിമാനത്തോടാണ് റൺവേ കടക്കാൻ നിർദ്ദേശിച്ചതെന്ന് കൺട്രോളർ വ്യക്തമാക്കുന്ന ഓഡിയോ റെക്കോർഡിംഗുകൾ പുറത്തുവന്നിട്ടുണ്ട്.

നെറ്റ്‌ജെറ്റ്‌സിന്റെ ഉടമസ്ഥതയിലുള്ള ‘EJA434’ എന്ന ഈ ബിസിനസ് ജെറ്റ്, സംഭവസമയത്ത് ഒരു തേർഡ് പാർട്ടി മെയിന്റനൻസ് വെണ്ടറുടെ നിയന്ത്രണത്തിലായിരുന്നു എന്ന് കമ്പനി അറിയിച്ചു. പൈലറ്റുമാരുടെ സമയോചിതമായ ഇടപെടലിനെ അമേരിക്കൻ എയർലൈൻസ് അഭിനന്ദിച്ചു. വൈകിയാണെങ്കിലും ഈ വിമാനം പിന്നീട് സുരക്ഷിതമായി ബെർമുഡയിലേക്ക് തിരിച്ചു.

അമേരിക്കയിൽ വരാനിരിക്കുന്ന ജൂലൈ 4 അവധിക്കാലത്തിന് തൊട്ടുമുൻപ് നടക്കുന്ന തുടർച്ചയായ വ്യോമയാന സുരക്ഷാ വീഴ്ചകളുടെ ഏറ്റവും ഒടുവിലത്തെ ഉദാഹരണമാണിത്. കഴിഞ്ഞ വെള്ളിയാഴ്ച ന്യൂജേഴ്‌സിയിൽ ലാൻഡിംഗിന് തൊട്ടുമുൻപ് യുണൈറ്റഡ് എയർലൈൻസ് വിമാനം ഒരു ഡ്രോണുമായി കൂട്ടിയിടിയിൽ നിന്ന് കഷ്ടിച്ചാണ് രക്ഷപ്പെട്ടത്. സംഭവത്തിൽ ഫെഡറൽ ഏവിയേഷൻ അഡ്മിനിസ്ട്രേഷൻ വിശദമായ അന്വേഷണം ആരംഭിച്ചിട്ടുണ്ട്.