കൊളംബിയ (സൗത്ത് കാരലൈന): സ്വന്തം പിതാവ് നായ്ക്കളെ ഇടുന്ന കൂട്ടിലാക്കി ജീവനോടെ കുഴിച്ചുമൂടിയ 11 മാസം പ്രായമുള്ള കുഞ്ഞിനെ പൊലീസ് രക്ഷപ്പെടുത്തി. സൗത്ത് കാരലൈനയിലെ ലെക്സിംഗ്ടൺ കൗണ്ടിയിലാണ് മനസ്സാക്ഷിയെ ഞെട്ടിക്കുന്ന ഈ സംഭവം നടന്നത്. കോവ ഷാർപ്പ് എന്ന പിഞ്ചുകുഞ്ഞാണ് 24 മണിക്കൂറോളം മണ്ണിനടിയിൽ കിടന്ന ശേഷം അത്ഭുതകരമായി ജീവിതത്തിലേക്ക് തിരിച്ചെത്തിയത്. സംഭവവുമായി ബന്ധപ്പെട്ട് കുഞ്ഞിന്റെ പിതാവ് മൈക്കൽ കോമറിനെ (25) പൊലീസ് അറസ്റ്റ് ചെയ്തു.
തിങ്കളാഴ്ച മുതൽ കുഞ്ഞിനെ കാണാനില്ലായിരുന്നു. മുത്തശ്ശിയുടെ സംരക്ഷണയിലായിരുന്ന കുഞ്ഞിനെ, അവർ അടുത്തില്ലാതിരുന്ന തക്കത്തിന് പിതാവ് മൈക്കൽ കോമർ കടത്തിക്കൊണ്ടുപോവുകയായിരുന്നു. തുടർന്ന് തിങ്കളാഴ്ച വൈകുന്നേരം മറ്റൊരു മോഷണക്കേസിൽ ഇയാൾ പൊലീസിന്റെ പിടിയിലായി. എന്നാൽ ഇയാൾക്കൊപ്പം കുഞ്ഞില്ലാത്തത് പൊലീസിൽ സംശയമുണർത്തി. ചോദ്യം ചെയ്യലിൽ കുഞ്ഞിനെക്കുറിച്ച് വ്യക്തമായ മറുപടി നൽകാൻ ഇയാൾ തയ്യാറായില്ല.
തുടർന്ന് ലെക്സിംഗ്ടൺ കൗണ്ടി ഷെരീഫ് ജെയ് കൂണിന്റെ നേതൃത്വത്തിൽ പൊലീസും അഗ്നിശമന സേനയും അടങ്ങുന്ന നൂറംഗ സംഘം വ്യാപകമായ തിരച്ചിൽ ആരംഭിച്ചു. ചൊവ്വാഴ്ച പ്രതിയുടെ വീടിന് സമീപമുള്ള വനപ്രദേശത്ത് നടത്തിയ തിരച്ചിലിലാണ് പുതുതായി മണ്ണ് ഇളകിക്കിടക്കുന്ന ഭാഗം ഉദ്യോഗസ്ഥരുടെ ശ്രദ്ധയിൽപ്പെട്ടത്. സംശയം തോന്നി മണ്ണ് മാറ്റിയപ്പോൾ ഉള്ളിൽ നിന്ന് കുഞ്ഞിന്റെ നേർത്ത കരച്ചിൽ കേട്ടു. “ജീവിതത്തിൽ കേട്ടിട്ടുള്ളതിൽ വച്ച് ഏറ്റവും സന്തോഷകരമായ ശബ്ദമായിരുന്നു അത്,” രക്ഷാപ്രവർത്തനത്തെക്കുറിച്ച് ഷെരീഫ് ജെയ് കൂൺ മാധ്യമങ്ങളോട് പറഞ്ഞു. ഉദ്യോഗസ്ഥർ അതിവേഗം മണ്ണ് നീക്കി കുഞ്ഞിനെ പുറത്തെടുക്കുകയായിരുന്നു.
രണ്ടടി വീതിയും നീളവുമുള്ള കൂട്ടിലാക്കി, മുകളിൽ ഒരടിയോളം മണ്ണിട്ട് മൂടിയ നിലയിലായിരുന്നു കുഞ്ഞ്. കൂട് ഒരു ടവ്വൽ കൊണ്ട് പൊതിഞ്ഞിരുന്നതിനാൽ ഉള്ളിലേക്ക് വായു കടന്നതും, പ്രദേശത്തെ തണുപ്പുള്ള കാലാവസ്ഥയും കുഞ്ഞിന്റെ ജീവൻ നിലനിർത്താൻ സഹായകമായെന്ന് പൊലീസ് വിലയിരുത്തുന്നു. അവശനിലയിലായിരുന്ന കുഞ്ഞിനെ ഉടൻ തന്നെ ആശുപത്രിയിൽ പ്രവേശിപ്പിച്ചു. കുഞ്ഞ് അപകടനില തരണം ചെയ്തതായും പൂർണ്ണ ആരോഗ്യത്തോടെ തിരിച്ചുവരുമെന്നും ആശുപത്രി അധികൃതർ അറിയിച്ചു.
കുഞ്ഞിന്റെ മാതാപിതാക്കൾ തമ്മിൽ അസ്വാരസ്യങ്ങൾ നിലനിന്നിരുന്നതായും, മൈക്കൽ കോമർ മുൻപും ഗാർഹിക പീഡനക്കേസുകളിൽ ശിക്ഷിക്കപ്പെട്ടിട്ടുള്ള ആളാണെന്നും പൊലീസ് വ്യക്തമാക്കി. കുഞ്ഞിന്റെ സംരക്ഷണാവകാശം അമ്മയ്ക്കായിരുന്നെങ്കിലും, മുത്തശ്ശിയുടെ മേൽനോട്ടത്തിൽ കുഞ്ഞിനെ കാണാൻ പിതാവിന് അനുവാദം നൽകിയിരുന്നു. മകനിൽ നിന്ന് ഇത്തരമൊരു ക്രൂരത ഒരിക്കലും പ്രതീക്ഷിച്ചിരുന്നില്ലെന്ന് മൈക്കൽ കോമറിന്റെ അമ്മ പട്രീഷ്യ കോമർ പ്രതികരിച്ചു. പ്രതിക്കെതിരെ വധശ്രമം ഉൾപ്പെടെയുള്ള കൂടുതൽ ഗുരുതരമായ വകുപ്പുകൾ ചുമത്താനുള്ള നടപടികൾ പൊലീസ് ആരംഭിച്ചിട്ടുണ്ട്.
11-month-old baby, locked in a cage and buried by father, survives in a miracle rescue.
