ഹൂസ്റ്റൺ: അമേരിക്കയിലെ ടെക്സസിലുള്ള അമരിക്കാസ് ഹൈസ്കൂളിൽ ഉണ്ടായ കത്തിക്കുത്തിൽ മൂന്ന് വിദ്യാർത്ഥികൾക്ക് പരിക്കേറ്റു. സംഭവവുമായി ബന്ധപ്പെട്ട് 14 വയസ്സുള്ള സഹവിദ്യാർത്ഥിയെന്ന് സംശയിക്കുന്നയാളെ പൊലീസ് കസ്റ്റഡിയിലെടുത്തു. എൽ പാസോ കൗണ്ടി ഷെരീഫ് ഓഫീസാണ് വിവരങ്ങൾ പുറത്തുവിട്ടത്.
വെള്ളിയാഴ്ച രാവിലെ 8:30-ഓടെ സ്കൂളിലെ ബേസ്ബോൾ ഗ്രൗണ്ടിന് സമീപത്താണ് ആക്രമണം നടന്നത്. 14 വയസ്സുള്ള രണ്ട് ആൺകുട്ടികൾക്കും ഒരു പെൺകുട്ടിക്കുമാണ് പരിക്കേറ്റത്. ഒരാളെ ആക്രമിക്കുന്നത് തടയാൻ ശ്രമിക്കുന്നതിനിടയിലാണ് മറ്റ് രണ്ടുപേർക്ക് കുത്തേറ്റതെന്ന് ഷെരീഫ് ഓഫീസ് കമാൻഡർ ജെറോം വാഷിംഗ്ടൺ അറിയിച്ചു. പരിക്കേറ്റവരെ ഉടൻ തന്നെ സമീപത്തെ ആശുപത്രിയിൽ പ്രവേശിപ്പിച്ചു. ഇവരുടെ ആരോഗ്യനില നിലവിൽ തൃപ്തികരമാണെന്നും രണ്ടുപേർ ആശുപത്രി വിട്ടതായും അധികൃതർ വ്യക്തമാക്കി.
സംഭവത്തെ തുടർന്ന് സ്കൂളിൽ ഉടൻ തന്നെ ലോക്ക്ഡൗൺ പ്രഖ്യാപിക്കുകയും പ്രദേശം പൊലീസ് സുരക്ഷിതമാക്കുകയും ചെയ്തു. സ്കൂളിന് സമീപത്തുനിന്നാണ് പ്രതിയെ പൊലീസ് കസ്റ്റഡിയിലെടുത്തത്. മാരകായുധം ഉപയോഗിച്ച് ആക്രമണം നടത്തിയതിന് പ്രതിക്കെതിരെ മൂന്ന് കേസുകൾ ചുമത്തിയിട്ടുണ്ട്.
ടെക്സസ് റേഞ്ചേഴ്സിൻ്റെ സഹകരണത്തോടെയാണ് കേസിൻ്റെ അന്വേഷണം പുരോഗമിക്കുന്നത്. വിദ്യാർത്ഥികൾക്കും ജീവനക്കാർക്കും ആവശ്യമായ കൗൺസിലിംഗ് പിന്തുണ ലഭ്യമാക്കുമെന്ന് സൊകോറോ ഇൻഡിപെൻഡന്റ് സ്കൂൾ ഡിസ്ട്രിക്റ്റ് അധികൃതർ അറിയിച്ചു. സംഭവത്തിൽ ടെക്സസ് സ്റ്റേറ്റ് സെനറ്റർ സീസർ ബ്ലാങ്കോ തീവ്രമായ ദുഃഖം രേഖപ്പെടുത്തി.
3 students stabbed at Texas high school: 14-year-old in custody
