44 വർഷത്തെ കാത്തിരിപ്പിന് വിരാമമിട്ട് ഏഷ്യൻ ഗെയിംസ് വനിതാ ഹോക്കിയിൽ ഇന്ത്യ വീണ്ടും സ്വർണം നേടി. വെള്ളിയാഴ്ച കകാമിഗഹാരയിൽ നടന്ന ഫൈനലിൽ നിലവിലെ ചാമ്പ്യന്മാരായ ചൈനയെ 1-0ന് തോൽപ്പിച്ചാണ് ഇന്ത്യ കിരീടം സ്വന്തമാക്കിയത്. ഇതോടെ 2028ലെ ലോസ് ആഞ്ചലസ് ഒളിമ്പിക്സിലേക്കും ഇന്ത്യ നേരിട്ട് യോഗ്യത നേടി. പാരിസ് ഒളിമ്പിക്സിന് യോഗ്യത നേടാനാകാതിരുന്നതിന്റെ നിരാശയ്ക്ക് പിന്നാലെയാണ് ഇന്ത്യൻ വനിതാ ഹോക്കിയുടെ ഈ ചരിത്ര സ്വർണനേട്ടം.
1982ൽ സ്വന്തം നാട്ടിൽ നടന്ന ഏഷ്യൻ ഗെയിംസിലാണ് ഇന്ത്യ അവസാനമായി വനിതാ ഹോക്കിയിൽ സ്വർണം നേടിയത്. 44 വർഷത്തിന് ശേഷമാണ് വീണ്ടും ഇന്ത്യ ഏഷ്യൻ ഗെയിംസ് ചാമ്പ്യന്മാരാകുന്നത്. 10-ാം മിനിറ്റിലായിരുന്നു ഇന്ത്യയുടെ വിജയഗോൾ. മധ്യനിരയിൽ സലിമ ടെറ്റ പിടിച്ചെടുത്ത പന്ത് സാക്ഷി റാണയ്ക്ക് കൈമാറി. സാക്ഷിയിൽ നിന്ന് പന്ത് സ്വീകരിച്ച ലാൽറെംസിയാമി തകർപ്പൻ റിവേഴ്സ് ഹിറ്റിലൂടെ ചൈനീസ് ഗോൾകീപ്പർ ലിയു പിങ്ങിനെ കീഴടക്കി. തന്റെ 200-ാം അന്താരാഷ്ട്ര മത്സരം കളിച്ച ലാൽറെംസിയാമിക്ക് ഈ ഗോൾ നേട്ടം അവിസ്മരണീയമായി.
ഗോൾ വഴങ്ങിയതിന് പിന്നാലെ ചൈന ശക്തമായ ആക്രമണം നടത്തിയെങ്കിലും ഇന്ത്യൻ പ്രതിരോധം ഉറച്ചുനിന്നു. ചൈനയ്ക്ക് ലഭിച്ച പെനാൽറ്റി സ്ട്രോക്ക് സവിത പുനിയ മികച്ച സേവിലൂടെ തടഞ്ഞു. രണ്ടാം പകുതിയിൽ ചൈനയ്ക്ക് ലഭിച്ച മറ്റൊരു അവസരം വീഡിയോ റഫറലിലൂടെ പെനാൽറ്റി കോർണറായി മാറിയെങ്കിലും ഇന്ത്യ അത് പ്രതിരോധിച്ചു. അവസാന നിമിഷങ്ങളിൽ സമനിലയ്ക്കായി ചൈന ഗോൾകീപ്പറെ പിൻവലിച്ച് ആക്രമണം ശക്തമാക്കിയെങ്കിലും ഇന്ത്യയുടെ പ്രതിരോധം തകർന്നില്ല. അവസാന വിസിൽ മുഴങ്ങുമ്പോൾ 1-0ന്റെ ജയം ഇന്ത്യ ഉറപ്പിക്കുകയായിരുന്നു.
പാരിസ് ഒളിമ്പിക്സിന് യോഗ്യത നേടാനാകാതിരുന്നതിന്റെ നിരാശയ്ക്ക് പിന്നാലെയാണ് ഇന്ത്യൻ വനിതാ ഹോക്കിയുടെ ഈ ചരിത്ര സ്വർണനേട്ടം.
A 44-year wait ends; India wins gold in Asian Games women’s hockey.
