അതിർത്തി കടക്കാൻ 500 ലധികം ഭീകരർ; ഒരേസമയം വിവിധ പാതകളിലൂടെ നുഴഞ്ഞുകയറി വനങ്ങളിൽ ഒളിക്കാൻ ഐഎസ്ഐ പദ്ധതിയെന്ന് രഹസ്യാന്വേഷണ റിപ്പോർട്ട്

ഡൽഹി: കശ്മീരിലെ പ്രാദേശിക ഭീകരനായ ലതീഫ് ഭട്ട് കൊല്ലപ്പെട്ടതിന് പിന്നാലെ, ജമ്മു കശ്മീരിലേക്ക് ഒരേസമയം വിവിധ മേഖലകളിലൂടെ വൻതോതിൽ ഭീകരരെ കടത്തിവിടാൻ പാക് ചാരസംഘടനയായ ഐഎസ്ഐ പദ്ധതിയിടുന്നതായി രഹസ്യാന്വേഷണ റിപ്പോർട്ട്. ലഷ്കറെ ത്വൊയ്ബ, ഹിസ്ബുൾ മുജാഹിദീൻ, ജെയ്ഷെ മുഹമ്മദ് എന്നീ സംഘടനകളിൽപ്പെട്ട 500-ലധികം ഭീകരർ പാക് അധീന കശ്മീരിലെ ലോഞ്ച് പാഡുകളിൽ അതിർത്തി കടക്കാൻ തയ്യാറായി കാത്തുനിൽക്കുകയാണ്. നേരത്തെ ഘട്ടങ്ങളായി നുഴഞ്ഞുകയറ്റം നടത്തിയിരുന്നതിന് പകരം, ബുദ്ഗാം, കുപ്വാര, പൂഞ്ച്, ഉറി തുടങ്ങിയ മേഖലകളിലൂടെ ഒരേസമയം ഭീകരരെ കടത്തിവിട്ട് ഇന്ത്യൻ സുരക്ഷാ സേനയുടെ ശ്രദ്ധ പലയിടങ്ങളിലേക്ക് തിരിച്ചുവിടാനാണ് ഐഎസ്ഐ ലക്ഷ്യമിടുന്നത്.

അതിർത്തി കടക്കുന്ന ഭീകരർക്ക് ഉടനടി ആക്രമണ ദൗത്യങ്ങളൊന്നും നൽകിയിട്ടില്ലെന്നും ഇന്ത്യൻ മണ്ണിലേക്ക് പ്രവേശിക്കുക മാത്രമാണ് പ്രാഥമിക ചുമതലയെന്നും രഹസ്യാന്വേഷണ വൃത്തങ്ങൾ വ്യക്തമാക്കുന്നു. അതിർത്തി കടന്ന ശേഷം അടുത്ത നിർദ്ദേശം ലഭിക്കുന്നതുവരെ നിബിഡ വനങ്ങളിൽ ഒളിച്ചിരിക്കാനാണ് ഇവർക്ക് നൽകിയിരിക്കുന്ന നിർദ്ദേശം. മുൻപ് പഹൽഗാം ആക്രമണത്തിന് മുന്നോടിയായി ഭീകരർ മാസങ്ങളോളം കാടുകളിൽ ഒളിച്ചിരുന്നതിന് സമാനമായ തന്ത്രമാണിത്. ഭീകരർക്ക് ആവശ്യമായ താമസസൗകര്യം, യാത്രാസഹായം, ആക്രമണത്തിന് മുമ്പുള്ള നിരീക്ഷണം എന്നിവ പ്രാദേശിക ഓവർഗ്രൗണ്ട് വർക്കർമാർ (OGW) വഴി ലഭ്യമാക്കും.

സുരക്ഷാ ഏജൻസികളുടെ കണ്ണുവെട്ടിക്കാനായി മുൻകാല ക്രിമിനൽ റെക്കോർഡുകളില്ലാത്ത യുവാക്കളെയും സ്കൂൾ വിദ്യാർത്ഥികളെയും റിക്രൂട്ട് ചെയ്ത് ഓവർഗ്രൗണ്ട് വർക്കർ ശൃംഖല പുനർനിർമ്മിക്കാനും ഐഎസ്ഐ നീക്കം നടത്തുന്നുണ്ട്. ലതീഫ് ഭട്ട് കൊല്ലപ്പെട്ട ഏറ്റുമുട്ടൽ നടക്കുമ്പോഴും ഭീകരരെ ഏകോപിപ്പിക്കുന്ന പാകിസ്താനിലെ ആശയവിനിമയ ശൃംഖലകൾ സജീവമായിരുന്നുവെന്ന് ഏജൻസികൾ കണ്ടെത്തിയിട്ടുണ്ട്.

ഇതിനുപുറമെ, ലതീഫ് ഭട്ടിന്റെ മരണത്തിന് ശേഷം താഴ്വരയിൽ വ്യാജവാർത്തകളും വർഗീയ സംഘർഷങ്ങളും സൃഷ്ടിച്ച് ജനകീയ പ്രതിഷേധങ്ങൾക്ക് തിരികൊളുത്താൻ ലഷ്കറെ ത്വൊയ്ബ ശ്രമിച്ചേക്കാമെന്നും രഹസ്യാന്വേഷണ ഏജൻസികൾ മുന്നറിയിപ്പ് നൽകുന്നു. ഇത്തരത്തിലുള്ള ക്രമസമാധാന പ്രശ്നങ്ങൾക്കിടയിൽ താഴ്വരയിൽ ഭീകരശൃംഖല വീണ്ടും കെട്ടിപ്പടുക്കാനും പ്രവർത്തനങ്ങൾ പുനരാരംഭിക്കാനുമാണ് ഭീകരസംഘടനകൾ ലക്ഷ്യമിടുന്നത്.

Over 500 Terrorists Waiting to Cross Border; Intelligence Warns of Simultaneous Multi-Front Infiltration and Jungle Hideout Strategy by ISI

More Stories from this section

family-dental
witywide