വാഷിങ്ടൺ: യുഎസ് പ്രസിഡന്റ് ഡോണൾഡ് ട്രംപ് പുതിയ H-1B വിസകൾക്ക് ഏർപ്പെടുത്തിയ 1 ലക്ഷം ഡോളർ ഫീസ് തടഞ്ഞ് രണ്ടാമത്തെ ഫെഡറൽ കോടതിയും. വിദേശ വിദഗ്ധ തൊഴിലാളികൾക്കുള്ള H-1B വിസയുടെ ചെലവ് കുത്തനെ ഉയർത്താനുള്ള ട്രംപ് ഭരണകൂടത്തിന്റെ നീക്കത്തിന് ഇതോടെ വീണ്ടും നിയമപരമായ തിരിച്ചടി നേരിട്ടു. കാലിഫോർണിയയിലെ ഓക്‌ലൻഡിലുള്ള യുഎസ് ജില്ലാ ജഡ്ജി ഹേവുഡ് ഗില്ലിയമാണ് ഫീസ് തടഞ്ഞത്. ഫീസ് പ്രാബല്യത്തിൽ കൊണ്ടുവരുന്നതിന് മുമ്പ് യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസും (USCIS) സ്റ്റേറ്റ് ഡിപ്പാർട്ട്മെന്റും ആവശ്യമായ നിയമനടപടികൾ പാലിച്ചില്ലെന്ന് കോടതി ചൂണ്ടിക്കാട്ടി.
ഫീസിനെതിരെ തൊഴിലാളി സംഘടനകളും തൊഴിൽദാതാക്കളും ലാഭേച്ഛയില്ലാത്ത സംഘടനകളും നൽകിയ ഹർജിയിലാണ് ഉത്തരവ്. കേസ് തുടരുന്ന കാലയളവിൽ ഫീസ് ഈടാക്കുന്നത് തടയുന്നതാണ് ഉത്തരവ്. ഇതിന് പിന്നാലെ ബോസ്റ്റണിലെ മറ്റൊരു ഫെഡറൽ കോടതിയും ഫീസ് തടഞ്ഞിരുന്നു. 20 യുഎസ് സംസ്ഥാനങ്ങൾ നൽകിയ ഹർജിയിൽ ജൂണിലായിരുന്നു ജില്ലാ ജഡ്ജി ലിയോ സൊറോക്കിന്റെ ഉത്തരവ്. കോൺഗ്രസിന്റെ അനുമതിയില്ലാതെ ഫീസ് ഏർപ്പെടുത്തിയത് ഭരണകൂടം അധികാരം മറികടന്ന നടപടിയാണെന്ന് കോടതി കണ്ടെത്തിയിരുന്നു. ജൂലൈയിൽ ഫെഡറൽ അപ്പീൽ കോടതി ഈ ഉത്തരവ് സ്റ്റേ ചെയ്യാൻ വിസമ്മതിക്കുകയും ചെയ്തു.
പ്രത്യേക വൈദഗ്ധ്യമോ വിദ്യാഭ്യാസ യോഗ്യതയോ ആവശ്യമായ ജോലികളിലേക്ക് വിദേശ തൊഴിലാളികളെ നിയമിക്കാൻ യുഎസ് കമ്പനികളെ അനുവദിക്കുന്നതാണ് H-1B വിസ പദ്ധതി. പ്രതിവർഷം 65,000 വിസകളും യുഎസിൽനിന്ന് ഉയർന്ന ബിരുദം നേടിയവർക്കായി 20,000 വിസകളും പദ്ധതിയിൽ അനുവദിക്കുന്നുണ്ട്. ഇന്ത്യ, ചൈന തുടങ്ങിയ രാജ്യങ്ങളിൽനിന്നുള്ള വിദഗ്ധ തൊഴിലാളികളെ നിയമിക്കുന്ന ടെക് കമ്പനികൾക്ക് H-1B വിസകൾ ഏറെ പ്രധാനപ്പെട്ടതാണ്. സാധാരണയായി മൂന്ന് മുതൽ ആറ് വർഷം വരെയാണ് വിസയുടെ കാലാവധി. 1 ലക്ഷം ഡോളർ ഫീസ് ഏർപ്പെടുത്തുന്നതിന് മുമ്പ് അപേക്ഷയുടെ സാഹചര്യങ്ങൾ അനുസരിച്ച് തൊഴിലുടമകൾ സർക്കാർ ഫീസായി ഏകദേശം 2,000 മുതൽ 5,000 ഡോളർ വരെയാണ് നൽകിയിരുന്നത്.
അമേരിക്കൻ തൊഴിലാളികൾക്ക് പകരം കുറഞ്ഞ വേതനത്തിൽ വിദേശ തൊഴിലാളികളെ നിയമിച്ച് കമ്പനികൾ H-1B പദ്ധതി ദുരുപയോഗം ചെയ്തുവെന്ന വാദത്തോടെയാണ് ട്രംപ് പുതിയ ഫീസ് ഏർപ്പെടുത്തിയത്. അപേക്ഷകരുടെ പരിശോധന ശക്തമാക്കുകയും ഉയർന്ന വൈദഗ്ധ്യവും ശമ്പളവുമുള്ള തൊഴിലാളികൾക്ക് മുൻഗണന നൽകുന്ന തരത്തിൽ വിസ തിരഞ്ഞെടുപ്പ് രീതിയിൽ മാറ്റങ്ങൾ നിർദേശിക്കുകയും ചെയ്തിട്ടുണ്ട്. ട്രംപിന്റെ 1 ലക്ഷം ഡോളർ ഫീസ് സെപ്റ്റംബർ 21ന് അവസാനിക്കേണ്ടതായിരുന്നു. എന്നാൽ വൈറ്റ് ഹൗസ് ഇത് ഒരു വർഷത്തേക്ക് കൂടി നീട്ടി. ഇതോടെ 2027 സെപ്റ്റംബർ വരെ നയം തുടരേണ്ടതായിരുന്നു. നിലവിൽ കോടതി ഉത്തരവുകളെ തുടർന്ന് ഫീസ് തടഞ്ഞിരിക്കുകയാണ്.
അതേസമയം, ഏകദേശം 1,03,000 ഡോളറിന്റെ സ്ഥിരം ഫീസ് ഏർപ്പെടുത്താനുള്ള നിർദേശവും ആഭ്യന്തര സുരക്ഷാ വകുപ്പ് മുന്നോട്ടുവച്ചിട്ടുണ്ട്. ഔദ്യോഗിക നിയമനിർമാണ നടപടികളിലൂടെയാണ് നിർദേശം പരിഗണിക്കുന്നത്.ഇന്ത്യൻ പ്രൊഫഷണലുകൾക്ക് H-1B പദ്ധതി പ്രത്യേക പ്രാധാന്യമുള്ളതാണ്. H-1B തൊഴിലാളികളിൽ വലിയൊരു വിഭാഗം ഇന്ത്യക്കാരാണ്. ടെക് കമ്പനികളാണ് പദ്ധതിയുടെ പ്രധാന ഉപയോക്താക്കളിൽ ചിലത്. 1 ലക്ഷം ഡോളർ ഫീസ് എല്ലാ H-1B തൊഴിലാളികൾക്കും ബാധകമായിരുന്നില്ല. വിദേശത്തുനിന്ന് അമേരിക്കയിലേക്ക് പ്രവേശിക്കാൻ ശ്രമിക്കുന്ന ചില പുതിയ H-1B അപേക്ഷകരെയാണ് ഫീസ് ലക്ഷ്യമിട്ടത്. നിലവിലുള്ള വിസ പുതുക്കുന്നവർക്കും അമേരിക്കയിൽ വിദ്യാർഥി വിസയിൽ കഴിയുകയും പിന്നീട് H-1B പദവിയിലേക്ക് മാറുകയും ചെയ്യുന്നവർക്കും ഇത് ബാധകമല്ലായിരുന്നു.
നിലവിലെ കോടതി ഉത്തരവുകൾ H-1B പദ്ധതി റദ്ദാക്കുന്നതല്ല. അധികമായി ഏർപ്പെടുത്തിയ 1 ലക്ഷം ഡോളർ ഫീസിനെയാണ് ഉത്തരവുകൾ തടയുന്നത്. എന്നാൽ വിവിധ കോടതികളിലെ കേസുകളും ഏകദേശം 1,03,000 ഡോളറിന്റെ സ്ഥിരം ഫീസ് സംബന്ധിച്ച നിർദേശവും പുതിയ H-1B നിയമനങ്ങളുടെ ചെലവും നടപടിക്രമങ്ങളും സംബന്ധിച്ച് അനിശ്ചിതത്വം തുടരാൻ ഇടയാക്കുന്നു.
A second US federal judge has blocked US President Donald Trump’s $100,000 fee on new H-1B visas
