ന്യൂഡൽഹി: ആഗോള വിപണിയിൽ ഇന്ധനവില കുറഞ്ഞതിനെത്തുടർന്ന് അന്താരാഷ്ട്ര സർവീസുകളുടെ ഫ്യുവൽ സർചാർജ് (ഇന്ധന അധികചാർജ്) എയർ ഇന്ത്യ കുറച്ചു. വടക്കേ അമേരിക്ക, ഓസ്ട്രേലിയ, യൂറോപ്പ്, യുകെ തുടങ്ങിയ റൂട്ടുകളിലെ യാത്രക്കാർക്കാണ് ഈ ഇളവ് ലഭിക്കുക. പരിഷ്കരിച്ച നിരക്കുകൾ ജൂലൈ 1 മുതൽ പ്രാബല്യത്തിൽ വന്നതായി പിടിഐ റിപ്പോർട്ട് ചെയ്തു.
പശ്ചിമേഷ്യൻ സംഘർഷത്തെ തുടർന്ന് ഏപ്രിൽ മാസത്തിലാണ് വിമാന ഇന്ധനവില കുതിച്ചുയർന്നതും എയർ ഇന്ത്യ താൽക്കാലികമായി സർചാർജ് വർദ്ധിപ്പിച്ചതും. എന്നാൽ നിലവിൽ ക്രൂഡ് ഓയിൽ വിലയിലുണ്ടായ ഇടിവാണ് നിരക്ക് വീണ്ടും കുറയ്ക്കാൻ കമ്പനിയെ പ്രേരിപ്പിച്ചത്.
പുതിയ നിരക്ക് പരിഷ്കരണ പ്രകാരം വടക്കേ അമേരിക്ക, ഓസ്ട്രേലിയ തുടങ്ങിയ റൂട്ടുകളിലേക്കുള്ള വിമാനങ്ങളുടെ ഫ്യുവൽ സർചാർജ് ടിക്കറ്റൊന്നിന് 280 യുഎസ് ഡോളറിൽ നിന്നും 200 ഡോളറായി എയർ ഇന്ത്യ കുറച്ചിട്ടുണ്ട്. ഇതോടൊപ്പം യൂറോപ്പ്, യുകെ സർവീസുകൾക്കുള്ള ഇന്ധന സർചാർജ് 205 ഡോളറിൽ നിന്നും 125 യുഎസ് ഡോളറായും വെട്ടിക്കുറച്ചു.
അതേസമയം, ഇന്ത്യയ്ക്കകത്തുള്ള ആഭ്യന്തര സർവീസുകളുടെയും മറ്റ് അന്താരാഷ്ട്ര റൂട്ടുകളുടെയും ഇന്ധന സർചാർജിൽ നിലവിൽ മാറ്റമില്ല. എയർ ഇന്ത്യയും എയർ ഇന്ത്യ എക്സ്പ്രസും ഉൾപ്പെടുന്ന എയർ ഇന്ത്യ ഗ്രൂപ്പ് ഏപ്രിൽ മാസത്തിലാണ് അന്താരാഷ്ട്ര വിമാനങ്ങൾക്ക് 24 ഡോളർ മുതൽ 280 ഡോളർ വരെയും, ആഭ്യന്തര വിമാനങ്ങൾക്ക് 299 രൂപ മുതൽ 899 രൂപ വരെയും സർചാർജ് ഏർപ്പെടുത്തിയിരുന്നത്.
ഒരു വിമാനക്കമ്പനിയുടെ ആകെ പ്രവർത്തനച്ചെലവിൻ്റെ 40 മുതൽ 45 ശതമാനം വരെ വരുന്നത് വിമാന ഇന്ധനത്തിനായതിനാലാണ് ഇന്ധനവിലയിലെ മാറ്റങ്ങൾ ടിക്കറ്റ് നിരക്കിനെയും ബാധിക്കുന്നത്. പുതിയ നിരക്ക് കുറയ്ക്കൽ വഴി ഈ റൂട്ടുകളിലെ പ്രവാസി മലയാളികൾ ഉൾപ്പെടെയുള്ള യാത്രക്കാർക്ക് വലിയ ആശ്വാസമാകും ലഭിക്കുക.
Air India cuts ticket prices as oil prices fall; benefits for US and European passengers
