സെനറ്റ് നിയന്ത്രണം മാറുംമുമ്പ് ഫെഡറൽ ജഡ്ജിമാരുടെ നിയമനം വേഗത്തിലാക്കാൻ ട്രംപ് ഭരണകൂടത്തിന്റെ നീക്കം

അനിൽ മറ്റത്തിക്കുന്നേൽ

വാഷിങ്ടൺ: അമേരിക്കൻ ഇടക്കാല തിരഞ്ഞെടുപ്പിനുശേഷം കോൺഗ്രസിലെ അധികാരസമവാക്യങ്ങൾ മാറാനിരിക്കെ, ഫെഡറൽ കോടതികളിലെ ജഡ്ജി നിയമനങ്ങൾ വേഗത്തിലാക്കാനുള്ള നീക്കവുമായി പ്രസിഡന്റ് ഡൊണാൾഡ് ട്രംപിന്റെ ഭരണകൂടം. ജനുവരിയിൽ പുതിയ കോൺഗ്രസ് അധികാരമേൽക്കുന്നതിനു മുമ്പ് സെനറ്റിന്റെ നിലവിലുള്ള അംഗീകാര അധികാരം പ്രയോജനപ്പെടുത്തി കൂടുതൽ ജുഡീഷ്യൽ നിയമനങ്ങൾ പൂർത്തിയാക്കാനാണ് ശ്രമം.അമേരിക്കയിൽ ഫെഡറൽ ജഡ്ജിമാരെ പ്രസിഡന്റ് നാമനിർദേശം ചെയ്യുകയും സെനറ്റ് അംഗീകരിക്കുകയും വേണം.

സുപ്രീം കോടതി, ഫെഡറൽ അപ്പീൽ കോടതികൾ, ജില്ലാ കോടതികൾ എന്നിവിടങ്ങളിലെ ജഡ്ജിമാരുടെ നിയമനങ്ങളിൽ ഈ നടപടിക്രമം ബാധകമാണ്. ആജീവനാന്ത കാലാവധിയുള്ള ഈ പദവികളിലേക്കുള്ള നിയമനങ്ങൾ ഒരു പ്രസിഡന്റിന്റെ ഭരണകാലത്തിനപ്പുറവും രാജ്യത്തിന്റെ നിയമവ്യവസ്ഥയെ സ്വാധീനിക്കും. 2026 നവംബർ മൂന്നിന് നടന്ന ഇടക്കാല തിരഞ്ഞെടുപ്പിനെത്തുടർന്ന് സെനറ്റിലെ നിയന്ത്രണം മാറുന്ന സാഹചര്യത്തിലാണ് ജഡ്ജി നിയമനങ്ങൾക്ക് പുതിയ രാഷ്ട്രീയ പ്രാധാന്യം കൈവന്നിരിക്കുന്നത്.

പുതിയ സംഭവവികാസങ്ങളിൽ ഏറ്റവും ശ്രദ്ധേയമായത് അർക്കൻസാസിലെ ഫെഡറൽ ജില്ലാ ജഡ്ജി ലീ റുഡോഫ്സ്കിയുടെ (Lee Rudofsky) നാമനിർദേശം ട്രംപ് പിൻവലിച്ചതാണ്. സെന്റ് ലൂയിസ് ആസ്ഥാനമായുള്ള എട്ടാം ഫെഡറൽ അപ്പീൽ കോടതിയിലേക്കാണ് അദ്ദേഹത്തെ പരിഗണിച്ചിരുന്നത്. എന്നാൽ അർക്കൻസാസിൽനിന്നുള്ള റിപ്പബ്ലിക്കൻ സെനറ്റർമാരായ ജോൺ ബൂസ്മാനും ടോം കോട്ടണും പിന്തുണ നൽകാത്തതിനെത്തുടർന്ന് നാമനിർദേശം പിൻവലിക്കുകയും പകരം അർക്കൻസാസ് സുപ്രീം കോടതി ജസ്റ്റിസ് ജെ. കോഡി ഹൈലാൻഡിനെ (J. Cody Hiland) നാമനിർദേശം ചെയ്യുകയും ചെയ്തു.

അർക്കൻസാസ്, അയോവ, മിനസോട്ട, മിസോറി, നെബ്രാസ്ക, നോർത്ത് ഡക്കോട്ട, സൗത്ത് ഡക്കോട്ട എന്നീ ഏഴ് സംസ്ഥാനങ്ങളിലെ ഫെഡറൽ കേസുകളാണ് എട്ടാം അപ്പീൽ കോടതിയുടെ പരിധിയിൽ വരുന്നത്. പുതിയ നിയമനം പൂർത്തിയായാൽ കോടതിയിലെ സജീവ ജഡ്ജിമാരിൽ 11 പേരിൽ പത്തുപേരും റിപ്പബ്ലിക്കൻ പ്രസിഡന്റുമാർ നിയമിച്ചവരാകും. ഇവരിൽ ആറുപേരെ ട്രംപ് നിയമിച്ചവരായിരിക്കും. റിപ്പബ്ലിക്കൻ പാർട്ടിക്കുള്ളിൽനിന്നുതന്നെ ഉയരുന്ന എതിർപ്പാണ് ഭരണകൂടത്തിന് ഇപ്പോൾ പ്രധാന തടസ്സമായി മാറുന്നത്. ഒക്‌ലഹോമയിലെ ഫെഡറൽ ജഡ്ജി സ്ഥാനത്തേക്ക് നാമനിർദേശം ചെയ്യപ്പെട്ട സക്കറി വെസ്റ്റിന്റെ നിയമനവും പ്രതിസന്ധിയിലായി.

റിപ്പബ്ലിക്കൻ സെനറ്റർ അലൻ ആംസ്ട്രോങ് പിന്തുണ പിൻവലിച്ചതോടെ സെനറ്റ് ജുഡീഷ്യറി കമ്മിറ്റിയിൽ നടക്കേണ്ടിയിരുന്ന വോട്ടെടുപ്പ് മാറ്റിവച്ചു. സെനറ്റർ തോം ടില്ലിസും ആംസ്ട്രോങ്ങിന്റെ നിലപാടിനെ പിന്തുണച്ചിട്ടുണ്ട്. ടെക്സസിലും സമാനമായ അഭിപ്രായവ്യത്യാസങ്ങൾ ഉയർന്നിട്ടുണ്ട്. അമേരിക്കൻ നീതിന്യായ വകുപ്പിലെ ഉന്നത ഉദ്യോഗസ്ഥനായ ടി. എലിയറ്റ് ഗൈസറെ ഫെഡറൽ ജഡ്ജിയായി നിയമിക്കാനുള്ള നീക്കത്തെ റിപ്പബ്ലിക്കൻ സെനറ്റർ ജോൺ കോർണിൻ ചോദ്യം ചെയ്തു. സ്ഥാനാർഥിയുടെ യോഗ്യതയും സംസ്ഥാനവുമായി ബന്ധപ്പെട്ട ബന്ധങ്ങളും പതിവ് പരിശോധനാനടപടികളും വിശദമായി പരിശോധിക്കണമെന്നാണ് അദ്ദേഹത്തിന്റെ നിലപാട്.

നവംബർ 11 വരെയുള്ള കണക്കുകൾ പ്രകാരം ട്രംപിന്റെ 24 ജുഡീഷ്യൽ നാമനിർദേശങ്ങൾ സെനറ്റിന്റെ അംഗീകാരത്തിനായി കാത്തിരിക്കുകയാണ്. രണ്ടാം ഭരണകാലത്ത് ഇതുവരെ 57 ജഡ്ജിമാരുടെ നിയമനം സെനറ്റ് അംഗീകരിച്ചിട്ടുണ്ട്. ഇതിൽ പത്ത് അപ്പീൽ കോടതി ജഡ്ജിമാരും 46 ജില്ലാ കോടതി ജഡ്ജിമാരും അന്താരാഷ്ട്ര വ്യാപാര കോടതിയിലെ ഒരു ജഡ്ജിയും ഉൾപ്പെടുന്നു. ട്രംപിന്റെ ആദ്യ ഭരണകാലത്ത് 230-ലധികം ഫെഡറൽ ജഡ്ജിമാരെയും മൂന്ന് സുപ്രീം കോടതി ജസ്റ്റിസുമാരെയും നിയമിച്ചിരുന്നു.

ഇതോടെ അമേരിക്കൻ സുപ്രീം കോടതിയിൽ കൺസർവേറ്റീവ് ജസ്റ്റിസുമാർക്ക് ആറിനെതിരെ മൂന്ന് എന്ന ഭൂരിപക്ഷം രൂപപ്പെട്ടു. രണ്ടാം ഭരണകാലത്തും കോടതികളിലെ നിയമനങ്ങൾക്ക് ട്രംപ് ഭരണകൂടം വലിയ പ്രാധാന്യമാണ് നൽകിയിരിക്കുന്നത്. 2027 ജനുവരി മൂന്നിന് പുതിയ സെനറ്റ് അധികാരമേൽക്കുമ്പോൾ ഡെമോക്രാറ്റുകൾക്ക് കുറഞ്ഞത് 54 സീറ്റുകളെങ്കിലും ഉണ്ടായിരിക്കുമെന്നാണ് തിരഞ്ഞെടുപ്പ് ഫലങ്ങൾ വ്യക്തമാക്കുന്നത്. അതോടെ റിപ്പബ്ലിക്കൻ ഭരണകൂടത്തിന്റെ ജഡ്ജി നാമനിർദേശങ്ങൾക്ക് സെനറ്റിന്റെ അംഗീകാരം നേടുന്നത് കൂടുതൽ പ്രയാസകരമാകും.

സെനറ്റ് ജുഡീഷ്യറി കമ്മിറ്റി ചെയർമാനും റിപ്പബ്ലിക്കൻ സെനറ്ററുമായ ചക്ക് ഗ്രാസ്ലി ശേഷിക്കുന്ന സമയത്തിനുള്ളിൽ പരമാവധി നിയമനങ്ങൾ പൂർത്തിയാക്കണമെന്ന് ആവശ്യപ്പെട്ടിട്ടുണ്ട്. എന്നാൽ ഡെമോക്രാറ്റിക് സെനറ്റർ ഡിക്ക് ഡർബിൻ നിയമനങ്ങളുടെ പരിശോധനയ്ക്ക് മതിയായ സമയം നൽകാതെ നടപടികൾ വേഗത്തിലാക്കുന്നതിനെ വിമർശിച്ചു. കമ്മിറ്റിയുടെ നിയമങ്ങൾ ലംഘിച്ചിട്ടില്ലെന്നും സാഹചര്യങ്ങൾ ആവശ്യപ്പെടുമ്പോൾ നടപടിക്രമങ്ങൾ വേഗത്തിലാക്കാൻ ചെയർമാന് അധികാരമുണ്ടെന്നുമാണ് ഗ്രാസ്ലിയുടെ മറുപടി.

ഫെഡറൽ കോടതികളിലെ നിയമനങ്ങൾ കുടിയേറ്റനിയമങ്ങൾ, ഗർഭച്ഛിദ്രാവകാശം, തിരഞ്ഞെടുപ്പ് നിയമങ്ങൾ, പരിസ്ഥിതിസംരക്ഷണം, പ്രസിഡന്റിന്റെ ഭരണാധികാരം തുടങ്ങിയ വിഷയങ്ങളിൽ ദീർഘകാല പ്രത്യാഘാതങ്ങൾ സൃഷ്ടിക്കാം. അതിനാൽ ജഡ്ജി നിയമനങ്ങൾ അമേരിക്കയിലെ രണ്ട് പ്രധാന രാഷ്ട്രീയ പാർട്ടികൾക്കും സുപ്രധാന വിഷയമാണ്. ജനുവരിയിൽ സെനറ്റിന്റെ നിയന്ത്രണം നഷ്ടപ്പെടുന്നതിന് മുമ്പ് എത്ര ജഡ്ജിമാരെ നിയമിക്കാൻ ട്രംപ് ഭരണകൂടത്തിന് കഴിയുമെന്നതാണ് ഇനി ശ്രദ്ധാകേന്ദ്രം. എന്നാൽ ഡെമോക്രാറ്റുകളുടെ എതിർപ്പിനൊപ്പം സ്വന്തം പാർട്ടിയിലെ സെനറ്റർമാരുടെ നിലപാടുകളും വൈറ്റ് ഹൗസിന് വെല്ലുവിളിയായി മാറിയിരിക്കുകയാണ്.

അമേരിക്കൻ ഫെഡറൽ നീതിന്യായ വ്യവസ്ഥയുടെ ഭാവിയെ സ്വാധീനിക്കുന്ന നിർണായക നിയമനങ്ങൾക്കായി വാഷിങ്ടണിൽ അടുത്ത ഏതാനും ആഴ്ചകൾ ശക്തമായ രാഷ്ട്രീയ ചർച്ചകൾക്കും നടപടികൾക്കും സാക്ഷ്യം വഹിക്കുമെന്നാണ് സൂചന.

Trump administration moves to fast-track the appointment of federal judges before control of the Senate changes.