വാഷിംഗ്‌ടൺ: അമേരിക്കയിലെ ടെന്നസി ജയിലിൽ വധശിക്ഷ നടപ്പാക്കുന്നതിനിടയിൽ അത്ഭുതകരമായി ജീവൻ തിരിച്ചുകിട്ടിയ ക്രിസ്റ്റ പൈക്ക് (50) ആദ്യമായി പ്രതികരണവുമായി രംഗത്ത്. വധശിക്ഷാ ശ്രമത്തിന് ശേഷം താൻ കടുത്ത ശാരീരിക-മാനസിക വേദനകളിലൂടെയാണ് കടന്നുപോകുന്നതെന്നും സംസാരിക്കാൻ പോലും ബുദ്ധിമുട്ടുകയാണെന്നും തന്റെ നിയമസംഘം വഴി പുറത്തുവിട്ട ഔദ്യോഗിക പ്രസ്താവനയിൽ ക്രിസ്റ്റ വ്യക്തമാക്കുന്നു.
“ആ രാത്രിക്ക് ശേഷം വേദനയില്ലാത്ത ഒരു നിമിഷം പോലും എന്റെ ജീവിതത്തിലുണ്ടായിട്ടില്ല. വധശിക്ഷാ ശ്രമത്തിലെ കടുത്ത അനാസ്ഥയാണ് ഇത്രയധികം ആളുകളെ ഈ ദുരവസ്ഥയിലേക്ക് തള്ളിവിട്ടത്,” ക്രിസ്റ്റ പ്രസ്താവനയിൽ പറഞ്ഞു. വധശിക്ഷ നടപ്പാക്കുന്നത് നേരിൽ കാണാൻ ഫ്ലോറിഡയിൽ നിന്നെത്തിയ ഇരയുടെ മാതാവിനെക്കുറിച്ചും, ആ കുടുംബത്തിന്റെ കഠിനമായ ദുഃഖത്തെക്കുറിച്ചും താൻ ഇപ്പോഴും ചിന്തിക്കാറുണ്ടെന്നും അവർ കൂട്ടിച്ചേർത്തു.
1995-ൽ 19 വയസ്സുള്ള സഹപാഠിയെ ക്രൂരമായി കൊലപ്പെടുത്തിയ കേസിൽ 18-ാം വയസ്സിലാണ് ക്രിസ്റ്റ പൈക്കിന് കോടതി വധശിക്ഷ വിധിക്കുന്നത്. കഴിഞ്ഞ സെപ്റ്റംബർ 30-നായിരുന്നു ശിക്ഷ നടപ്പാക്കാൻ നിശ്ചയിച്ചിരുന്നത്. എന്നാൽ, വധശിക്ഷയ്ക്കായി നൽകിയ ‘ഫിനോബാർബിറ്റൽ’ എന്ന മാരക മരുന്നിന്റെ രണ്ട് ഡോസുകൾ ക്രിസ്റ്റയുടെ രക്തപ്രവാഹത്തിൽ കലരുന്നതിന് പകരം കൈകളിൽ അടിഞ്ഞുകൂടുകയായിരുന്നുവെന്ന് അഭിഭാഷകർ വ്യക്തമാക്കുന്നു. ഇത് കൈകൾ കരിഞ്ഞുപോകുന്നതിനും കടുത്ത പൊള്ളലിനും കാരണമായി. തുടർന്ന് ബോധരഹിതയായ ക്രിസ്റ്റ ദിവസങ്ങളോളം ആശുപത്രിയിൽ തീവ്രപരിചരണ വിഭാഗത്തിലായിരുന്നു.
സംഭവം പരാജയപ്പെട്ടതോടെ ടെന്നസി സംസ്ഥാനത്തെ വധശിക്ഷാ രീതികൾക്കെതിരെ കടുത്ത വിമർശനങ്ങളാണ് ഉയരുന്നത്. കറക്ഷൻ ഡിപ്പാർട്ട്മെന്റ് കമ്മീഷണർ ഫ്രാങ്ക് സ്ട്രാഡ ഇതിനോടകം തന്നെ പദവി രാജിവെച്ചു കഴിഞ്ഞു. കൂടാതെ, ടെന്നസി ഗവർണർ ബിൽ ലീ സംഭവത്തെക്കുറിച്ച് അന്വേഷിക്കാൻ പ്രത്യേക സ്വതന്ത്ര സമിതിയെ നിയോഗിക്കുകയും ഈ വർഷം നടക്കേണ്ടിയിരുന്ന മറ്റ് വധശിക്ഷകൾ താൽക്കാലികമായി നിർത്തിവെക്കാൻ ഉത്തരവിടുകയും ചെയ്തിട്ടുണ്ട്.
നിലവിൽ അതീവ സുരക്ഷയുള്ള തടങ്കൽപ്പാളയത്തിൽ ഏകയായി കഴിയുന്ന ക്രിസ്റ്റയുടെ മാനസികനില തകരാറിലാണെന്നും, അതിനാൽ മറ്റ് തടവുകാരുമായി ഇടപഴകാൻ അനുവദിക്കണമെന്നും ആവശ്യപ്പെട്ട് അഭിഭാഷകർ ഫെഡറൽ കോടതിയെ സമീപിച്ചിട്ടുണ്ട്. ക്രിസ്റ്റയുടെ വധശിക്ഷ ജീവപര്യന്തമായി ചുരുക്കണമെന്ന് ആവശ്യപ്പെട്ട് ഗവർണർക്ക് അപേക്ഷ നൽകിയിട്ടുണ്ടെങ്കിലും, കോടതിയുടെ ഇടപെടൽ ഉണ്ടാകാത്ത പക്ഷം ശിക്ഷയിൽ മാറ്റമുണ്ടാകില്ലെന്ന സൂചനയാണ് ഗവർണർ ബിൽ ലീ നൽകുന്നത്. ഭയാനകമായ ഈ ദുരവസ്ഥയ്ക്ക് ശേഷവും ക്രിസ്റ്റ പൈക്ക് ഇപ്പോഴും മരണത്തെ മുഖാമുഖം കണ്ട് ജയിലിൽ കഴിയുകയാണ്.
‘I can no longer live a single moment without pain’; American prisoner who escaped execution suffers severe physical and mental trauma.
