‘കഴുത്തിൽ ചവിട്ടിപ്പിടിച്ചു, പുറത്തെ കൈവിരൽപ്പാടുകൾ ഒരു മാസത്തോളം മാഞ്ഞില്ല’; അരമനയിലെ മർദനത്തെക്കുറിച്ച് മാർ പാംപ്ലാനി

പത്തനംതിട്ട: സീറോ മലബാർ സഭയിലെ കുർബാന തർക്കങ്ങളുമായി ബന്ധപ്പെട്ട് എറണാകുളം അരമനയിൽവെച്ച് തനിക്ക് മർദനമേറ്റിട്ടുണ്ടെന്ന ഗുരുതര വെളിപ്പെടുത്തലുമായി തലശ്ശേരി അതിരൂപതാ ആർച്ച്ബിഷപ്പ് മാർ ജോസഫ് പാംപ്ലാനി. ഇരിങ്ങാലക്കുടയിൽ നടന്ന ഒരു ചടങ്ങിലാണ് മാസങ്ങൾക്ക് മുൻപ് നടന്ന ഈ സംഭവത്തെക്കുറിച്ച് അദ്ദേഹം തുറന്നുപറഞ്ഞത്. അക്രമികൾ തൻ്റെ ഡ്രൈവറെയും ക്രൂരമായി മർദിച്ചതായി അദ്ദേഹം വ്യക്തമാക്കി.

എറണാകുളം-അങ്കമാലി അതിരൂപതയുടെ മെത്രാപ്പൊലീത്തൻ വികാരി കൂടിയായ മാർ പാംപ്ലാനി, സിനഡ് തീരുമാനങ്ങളെ അനുകൂലിക്കുന്ന വ്യക്തിയാണ് തങ്ങളെ മർദിച്ചതെന്ന സൂചന നൽകിയെങ്കിലും, അക്രമികൾ ആരാണെന്നോ സംഭവം നടന്ന കൃത്യമായ തീയതിയോ വെളിപ്പെടുത്തിയിട്ടില്ല.

സഭയിൽ ഐക്യം കൊണ്ടുവരാൻ എറണാകുളം അതിരൂപതയിലെ വൈദികരെ കുറ്റപ്പെടുത്തുകയോ അധിക്ഷേപിക്കുകയോ ചെയ്യരുതെന്ന് അദ്ദേഹം പ്രസംഗത്തിൽ ഓർമ്മിപ്പിച്ചു. തർക്ക പരിഹാരത്തിനായി എല്ലാവരുമായി ആലോചിച്ചാണ് എറണാകുളം-അങ്കമാലി അതിരൂപതയ്ക്ക് ഇളവുകൾ നൽകിയത്. ഇതിലൂടെ ഒരു വിഭാഗത്തിൽ സമാധാനം കൈവന്നെങ്കിലും, സിനഡിനൊപ്പം നിൽക്കുമെന്ന് കരുതിയ ചിലർ ഇതിന് എതിരാകുകയായിരുന്നുവെന്ന് അദ്ദേഹം പറഞ്ഞു.

“ഒരാൾ എൻ്റെ പുറത്ത് ആഞ്ഞടിച്ചു. അദ്ദേഹത്തിൻ്റെ കൈവിരൽപ്പാടുകൾ ഒരു മാസത്തോളം എൻ്റെ പുറത്ത് മായാതെ കിടന്നിരുന്നു. തൻ്റെ ഡ്രൈവറെയും അവർ ചവിട്ടിവീഴ്ത്തി കഴുത്തിൽ ചവിട്ടിപ്പിടിച്ചു,” മാർ പാംപ്ലാനി കൂട്ടിച്ചേർത്തു.

പ്രസംഗത്തിലെ പ്രസക്ത ഭാഗം

“എറണാകുളം അതിരൂപത സഭയുടെ ഒന്നാംനമ്പർ രൂപതതന്നെയാണ്. അവർക്ക് ചില കാര്യങ്ങളിലുള്ള അഭിപ്രായവ്യത്യാസം മനസ്സിലാക്കാനുള്ള ഹൃദയവിശാലത നമുക്കുവേണം. അവിടത്തെ അച്ചന്മാരെയെല്ലാം കുറ്റപ്പെടുത്തിയും മോശക്കാരാക്കിയും ആളുകളെ അധിക്ഷേപിച്ചും സഭയിൽ ഐക്യം കൊണ്ടുവരാൻ കഴിയില്ല. ചർച്ച ചെയ്യേണ്ട എല്ലാവരുമായി ആലോചിച്ചാണ് എറണാകുളം-അങ്കമാലി അതിരൂപതയ്ക്ക് ഇളവു നൽകിയത്. അതോടെ ഒരു വിഭാഗത്തിൽ സമാധാനാന്തരീക്ഷം കൈവന്നു. എന്നാൽ, സിനഡിനോടൊപ്പം നിൽക്കുമെന്നു കരുതിയ ചിലർക്ക് എതിരായി. എൻ്റെ പുറത്ത് ആഞ്ഞടിച്ചു ഒരാളുണ്ട്. അദ്ദേഹത്തിൻ്റെ കൈവിരൽപ്പാടുകൾ എൻ്റെ പുറത്ത് ഒരു മാസത്തോളം മായാതെ കിടന്നു. എൻ്റെ ഡ്രൈവറെയും ചവിട്ടിവീഴ്ത്തി. കഴുത്തിൽ ചവിട്ടിപ്പിടിച്ചു”- മാർ പാംപ്ലാനി പറഞ്ഞു.

നിലവിൽ സിനഡ് സെക്രട്ടറി കൂടിയായ മാർ പാംപ്ലാനി തനിക്ക് മർദനമേറ്റ വിവരം ഔദ്യോഗികമായി സിനഡിൽ ഉന്നയിച്ചിട്ടുണ്ടോ എന്ന കാര്യത്തിൽ വ്യക്തതയില്ല.

Archbishop Mar Joseph Pamplani says he was assaulted at Ernakulam Aramana