വാഷിങ്ടൺ: അമേരിക്കയിൽ വർഷത്തിൽ രണ്ടുതവണ ക്ലോക്കിലെ സമയം മാറ്റുന്ന രീതി അവസാനിപ്പിച്ച് ഡേലൈറ്റ് സേവിംഗ് ടൈം (Daylight Saving Time – DST) സ്ഥിരമാക്കുന്നതിനുള്ള ‘സൺഷൈൻ പ്രൊട്ടക്ഷൻ ആക്ട്’ ഈ ആഴ്ച ജനപ്രതിനിധി സഭയുടെ പരിഗണനയ്ക്ക്. റിപ്പബ്ലിക്കൻ അംഗമായ വെർൺ ബുക്കാനൻ അവതരിപ്പിച്ച ബില്ലിന് മേയിൽ ഹൗസ് എനർജി ആൻഡ് കൊമേഴ്സ് കമ്മിറ്റി 48-1 എന്ന വൻ ഭൂരിപക്ഷത്തിൽ അംഗീകാരം നൽകിയിരുന്നു.
വർഷത്തിൽ രണ്ടുതവണ ക്ലോക്കിലെ സമയം മാറ്റുന്ന കാലഹരണപ്പെട്ടതും ജനപ്രീതിയില്ലാത്തതുമായ രീതി അവസാനിപ്പിക്കാനാണ് ബില്ലിലൂടെ ലക്ഷ്യമിടുന്നതെന്ന് ബുക്കാനൻ പറഞ്ഞു. സ്ഥിരമായ ഡേലൈറ്റ് സേവിംഗ് ടൈം പൊതുജനാരോഗ്യം മെച്ചപ്പെടുത്താനും റോഡപകടങ്ങളും കുറ്റകൃത്യങ്ങളും കുറയ്ക്കാനും ആളുകളെ കൂടുതൽ സമയം പുറംപ്രവർത്തനങ്ങളിൽ ഏർപ്പെടാൻ പ്രോത്സാഹിപ്പിക്കാനും സഹായിക്കുമെന്നതാണ് അദ്ദേഹത്തിന്റെ വാദം. ദശലക്ഷക്കണക്കിന് അമേരിക്കക്കാരുടെ ദൈനംദിന ജീവിതം എളുപ്പമാക്കുന്ന പ്രായോഗിക പരിഷ്കാരമാണിതെന്നും ബില്ലിന് ഇരുകക്ഷികളുടെയും പിന്തുണ ലഭിക്കണമെന്നും അദ്ദേഹം ആവശ്യപ്പെട്ടു.
എന്താണ് സൺഷൈൻ പ്രൊട്ടക്ഷൻ ആക്ട്?
ഡേലൈറ്റ് സേവിംഗ് ടൈം രാജ്യവ്യാപകമായി സ്ഥിരമാക്കുകയും വർഷത്തിൽ രണ്ടുതവണ ക്ലോക്കിലെ സമയം മുന്നോട്ടും പിന്നോട്ടും മാറ്റുന്ന രീതി പൂർണമായും അവസാനിപ്പിക്കുകയുമാണ് ബില്ലിന്റെ ലക്ഷ്യം. 1960-കളിൽ മുതൽ അമേരിക്കയുടെ ഭൂരിഭാഗം പ്രദേശങ്ങളിലും വേനൽക്കാലത്ത് ക്ലോക്ക് ഒരു മണിക്കൂർ മുന്നോട്ടാക്കുന്ന ഡേലൈറ്റ് സേവിംഗ് ടൈം നടപ്പിലുണ്ട്.
2022 മാർച്ചിൽ അമേരിക്കൻ സെനറ്റ് ഡേലൈറ്റ് സേവിംഗ് ടൈം സ്ഥിരമാക്കുന്ന ബിൽ ഏകകണ്ഠമായി പാസാക്കിയിരുന്നെങ്കിലും എതിർപ്പിനെ തുടർന്ന് ജനപ്രതിനിധി സഭ അത് പരിഗണിച്ചിരുന്നില്ല. സ്ഥിരമായ ഡേലൈറ്റ് സേവിംഗ് ടൈം നടപ്പാക്കണമെന്ന് നിരവധി സംസ്ഥാനങ്ങൾ അനുകൂല നിലപാട് സ്വീകരിച്ചിട്ടുണ്ടെങ്കിലും, അമേരിക്കൻ കോൺഗ്രസിന്റെ അംഗീകാരമില്ലാതെ അത് പ്രാബല്യത്തിൽ വരില്ല.
അതേസമയം, ‘സൺഷൈൻ ഫോർ അവർ കിഡ്സ് ആക്ട്’ എന്ന മറ്റൊരു ബിൽ രാജ്യത്ത് നിലവിലുള്ള സ്റ്റാൻഡേർഡ് ടൈം സ്ഥിരമാക്കാനാണ് ലക്ഷ്യമിടുന്നത്. എന്നാൽ സംസ്ഥാനങ്ങൾക്ക് താൽപര്യമുണ്ടെങ്കിൽ ഡേലൈറ്റ് സേവിംഗ് ടൈം സ്ഥിരമാക്കാനുള്ള സ്വാതന്ത്ര്യവും ആ ബിൽ നൽകുന്നുണ്ട്.
പ്രസിഡന്റ് ഡൊണാൾഡ് ട്രംപ് വർഷത്തിൽ രണ്ടുതവണ സമയം മാറ്റുന്ന രീതി അവസാനിപ്പിക്കണമെന്ന് പിന്തുണ അറിയിച്ചിട്ടുണ്ട്. നിലവിലെ സംവിധാനം അനാവശ്യ ചെലവും ബുദ്ധിമുട്ടും സൃഷ്ടിക്കുന്നതാണെന്നും, “ഇനി ക്ലോക്കിനെക്കുറിച്ച് ആളുകൾ ആശങ്കപ്പെടേണ്ട കാലം അവസാനിക്കണം” എന്നുമാണ് അദ്ദേഹം കഴിഞ്ഞ മേയിൽ പറഞ്ഞത്.
വർഷത്തിൽ രണ്ടുതവണ സമയം മാറ്റുന്നത് ഉറക്കക്രമത്തെ താളംതെറ്റിക്കുമെന്നും ജോലിസ്ഥല അപകടങ്ങളും റോഡപകടങ്ങളും വർധിപ്പിക്കുമെന്നും അനുകൂലികൾ ചൂണ്ടിക്കാട്ടുന്നു. വൈകുന്നേരങ്ങളിൽ കൂടുതൽ നേരം വെളിച്ചം ലഭിക്കുന്നത് സാമ്പത്തിക പ്രവർത്തനങ്ങൾ വർധിപ്പിക്കാനും കുറ്റകൃത്യങ്ങൾ കുറയ്ക്കാനും ആളുകളെ കൂടുതൽ സമയം പുറംപ്രവർത്തനങ്ങളിൽ ഏർപ്പെടാൻ പ്രേരിപ്പിക്കാനും സഹായിക്കുമെന്നുമാണ് അവരുടെ വാദം.
Daylight saving time could become permanent in the US. What would that change?
