വാഷിംഗ്ടൺ: സെനറ്റ് ഭൂരിപക്ഷ നേതാവ് സ്ഥാനത്തേക്ക് ചക്ക് ഷൂമാറിന് പകരക്കാരനായി തന്‍റെ പേര് ഉയന്നുവരുന്ന സാഹചര്യത്തിൽ നിലപാട് മയപ്പെടുത്തി മേരിലാൻഡ് സെനറ്റർ ക്രിസ് വാൻ ഹോളൻ. താൻ ആ സ്ഥാനത്തേക്ക് മത്സരിക്കാനില്ലെന്ന് ആദ്യം വ്യക്തമാക്കിയിരുന്നെങ്കിലും, ഇക്കാര്യത്തിൽ വാതിൽ പൂർണ്ണമായി അടച്ചിട്ടില്ലെന്നും നിലവിൽ സഹപ്രവർത്തകരുടെ അഭിപ്രായങ്ങൾ കേൾക്കുന്ന ‘ലിസണിംഗ് മോഡിലാണെന്നും’ അദ്ദേഹം തിങ്കളാഴ്ച മാധ്യമപ്രവർത്തകരോട് പറഞ്ഞു.
നവംബർ മൂന്നിന് നടന്ന മിഡ്‌ടേം തിരഞ്ഞെടുപ്പിൽ ഡെമോക്രാറ്റുകൾ സെനറ്റിന്‍റെയും പ്രതിനിധി സഭയുടെയും നിയന്ത്രണം തിരിച്ചുപിടിച്ചിരുന്നു. അടുത്ത ജനുവരിയിൽ പുതിയ കോൺഗ്രസ് അധികാരത്തിൽ വരുമ്പോൾ ഡെമോക്രാറ്റുകൾക്ക് ഭൂരിപക്ഷമുണ്ടാകും. ഏകദേശം ഒരു ദറ്റാണ്ടോളമായി സെനറ്റിലെ ഡെമോക്രാറ്റിക് പാർട്ടി നിരയെ നയിക്കുന്ന ചക്ക് ഷൂമാറിനെ വീണ്ടും നേതാവായി കാണാൻ ചിലർ ആഗ്രഹിക്കുന്നുണ്ടെങ്കിലും, പുതിയ നേതൃത്വം വരണമെന്ന് ശക്തമായി ആവശ്യപ്പെടുന്നവരുമുണ്ട്. മിഷിഗണിൽ നിന്ന് പുതുതായി തിരഞ്ഞെടുക്കപ്പെട്ട സെനറ്റർ അബ്ദുൽ എൽ-സയദ് ഉൾപ്പെടെയുള്ളവർ വാൻ ഹോളൻ ഈ പദവി ഏറ്റെടുക്കണമെന്ന് പരസ്യമായി ആവശ്യപ്പെട്ടിട്ടുണ്ട്.
പാർട്ടി നേതൃത്വത്തെ തിരഞ്ഞെടുക്കുന്നതിന് മുൻപ് ഡെമോക്രാറ്റിക് കോക്കസ് സമഗ്രമായ ചർച്ചകൾ നടത്തണമെന്നും, പുതിയ ഭൂരിപക്ഷം ജനങ്ങളുടെ ഉക്ഷേണാർത്ഥം എങ്ങനെ ഉപയോഗിക്കണമെന്ന് കൃത്യമായ പദ്ധതി ഉണ്ടാക്കണമെന്നും വാൻ ഹോളൻ ആവർത്തിച്ചു വ്യക്തമാക്കി. ഷൂമാറിനെതിരെ മത്സരിക്കുമോ എന്ന ചോദ്യത്തിന് സഹപ്രവർത്തകരുടെ അഭിപ്രായങ്ങൾ തേടുകയാണെന്നായിരുന്നു അദ്ദേഹത്തിന്റെ മറുപടി. അതേസമയം, 2028-ലെ പ്രസിഡന്‍റ് തിരഞ്ഞെടുപ്പിൽ മത്സരിക്കുന്നതിനുള്ള സാധ്യതകളെക്കുറിച്ചും അദ്ദേഹം മുൻപ് സൂചന നൽകിയിരുന്നു. വിദേശനയം, കുടിയേറ്റം, സർക്കാർ ചെലവുകൾ തുടങ്ങിയ വിഷയങ്ങളിൽ സജീവമായി ഇടപെട്ടിട്ടുള്ള വാൻ ഹോളൻ, മുമ്പ് ഡെമോക്രാറ്റിക് കോൺഗ്രഷണൽ ക്യാമ്പെയ്ൻ കമ്മിറ്റിയുടെയും സെനറ്റോറിയൽ ക്യാമ്പെയ്ൻ കമ്മിറ്റിയുടെയും അധ്യക്ഷനായി പ്രവർത്തിച്ചിട്ടുണ്ട്.
