ന്യൂയോർക്ക്: ഓഹരി വിപണിയിലെ ചരിത്ര നേട്ടത്തോടെ ടെസ്ല, സ്പേസ് എക്സ് കമ്പനികളുടെ മേധാവി ഇലോൺ മസ്ക് ലോകത്തിലെ ആദ്യത്തെ ട്രില്യണെയർ (ലക്ഷം കോടീശ്വരൻ) പദവി സ്വന്തമാക്കി. മസ്കിൻ്റെ റോക്കറ്റ് നിർമ്മാണ കമ്പനിയായ സ്പേസ് എക്സ് നടത്തിയ ഏറ്റവും വലിയ ഓഹരി വിപണി അരങ്ങേറ്റത്തിന് (ഐപിഒ) പിന്നാലെയാണ് ഈ അപൂർവ്വ നേട്ടം. ബ്ലൂംബെർഗ് ശതകോടീശ്വരന്മാരുടെ പട്ടിക പ്രകാരം മസ്കിൻ്റെ ആകെ ആസ്തി 1.11 ട്രില്യൺ ഡോളറായി (ഏകദേശം 828 ബില്യൺ പൗണ്ട്) ഉയർന്നു.
വിപണി പിടിച്ചുകുലുക്കി സ്പേസ് എക്സ്
റോക്കറ്റ്, ടെലികമ്മ്യൂണിക്കേഷൻസ്, ആർട്ടിഫിഷ്യൽ ഇൻ്റലിജൻസ് (എഐ) മേഖലകളിൽ പ്രവർത്തിക്കുന്ന സ്പേസ് എക്സ് 2.2 ട്രില്യൺ ഡോളർ മൂല്യവുമായാണ് നാസ്ഡാക് സ്റ്റോക്ക് എക്സ്ചേഞ്ചിൽ ലിസ്റ്റ് ചെയ്തത്. ഒരു ഓഹരിക്ക് 135 ഡോളർ നിരക്കിൽ നിശ്ചയിച്ചിരുന്ന വ്യാപാരം, നിക്ഷേപകരുടെ വൻ താല്പര്യം കാരണം 150 ഡോളറിലാണ് ആരംഭിച്ചത്. വ്യാപാരത്തിനിടയിൽ ഒരു ഘട്ടത്തിൽ വില 176.50 ഡോളർ വരെ ഉയർന്ന ശേഷം, വെള്ളിയാഴ്ച വിപണി അടയ്ക്കുമ്പോൾ ഓഹരി വില 161 ഡോളറിൽ എത്തി. ഓഹരി വിപണിയിൽ എത്തുന്നതിന് മുൻപ് തന്നെ ഐപിഒ വഴി കമ്പനി 75 ബില്യൺ ഡോളർ സമാഹരിച്ചിരുന്നു.
സ്പേസ് എക്സിൻ്റെ 42 ശതമാനം ഓഹരികളും ഇലോൺ മസ്കിൻ്റെ കൈവശമാണ്. ഇത് കമ്പനിയുടെ തീരുമാനങ്ങളിലും നിക്ഷേപ വിനിയോഗത്തിലും അദ്ദേഹത്തിന് പൂർണ്ണ അധികാരം നൽകുന്നു. നിലവിൽ മസ്കിൻ്റെ സ്പേസ് എക്സ് ഓഹരികളുടെ മൂല്യം 767.1 ബില്യൺ ഡോളറാണ്. ഇതിന് പുറമെ ടെസ്ലയിലെ ഓഹരികളും ഇരു കമ്പനികളിലെയും സ്റ്റോക്ക് ഓപ്ഷനുകളും ചേരുന്നതാണ് മസ്കിൻ്റെ വൻ ആസ്തി.
ഈ ചരിത്ര ലിസ്റ്റിംഗിലൂടെ സ്പേസ് എക്സിലെ നിലവിലുള്ളതും മുൻകാലങ്ങളിലുള്ളതുമായ 4,400-ലധികം ജീവനക്കാർ ലക്ഷപ്രഭുക്കളായി മാറി. ശമ്പളത്തിൻ്റെ ഭാഗമായി ഇവർക്ക് ലഭിച്ച ഓഹരികളുടെ മൂല്യം ഉയർന്നതാണ് ഇതിന് കാരണം. എന്നാൽ, വലിയ ആസ്തി മൂല്യമുണ്ടെങ്കിലും സ്പേസ് എക്സ് നിലവിൽ ലാഭത്തിലല്ല പ്രവർത്തിക്കുന്നത്. ആർട്ടിഫിഷ്യൽ ഇൻ്റലിജൻസ്, അടിസ്ഥാന സൗകര്യ വികസനം എന്നിവയ്ക്കായുള്ള വൻ നിക്ഷേപങ്ങൾ കാരണം കഴിഞ്ഞ രണ്ട് വർഷത്തിനിടെ 9 ബില്യൺ ഡോളറിലധികം നഷ്ടമാണ് കമ്പനിക്കുണ്ടായിട്ടുള്ളത്. എങ്കിലും, പുനരുപയോഗിക്കാവുന്ന റോക്കറ്റുകൾ, സ്റ്റാർലിങ്ക് ഇൻ്റർനെറ്റ് സേവനം, ബഹിരാകാശത്തെ ഡാറ്റാ സെൻ്ററുകൾ തുടങ്ങിയ കമ്പനിയുടെ ഭാവി സാധ്യതകളിലാണ് നിക്ഷേപകർ പ്രതീക്ഷ വെക്കുന്നത്.
മസ്കിൻ്റെ ഈ അസാധാരണ സമ്പത്ത് ലോകമെമ്പാടും വലിയ സാമ്പത്തിക അസമത്വ ചർച്ചകൾക്ക് തുടക്കമിട്ടിട്ടുണ്ട്. പോളണ്ട്, സ്വിറ്റ്സർലൻഡ് തുടങ്ങിയ രാജ്യങ്ങളുടെ ആകെ ജിഡിപിക്ക് തുല്യമാണ് മസ്കിൻ്റെ ഇപ്പോഴത്തെ ആസ്തി. ഇത് വെൽത്ത് ടാക്സ് ഏർപ്പെടുത്തേണ്ടതിൻ്റെ ആവശ്യകതയിലേക്കാണ് വിരൽ ചൂണ്ടുന്നതെന്ന് യുഎസ് സെനറ്റർ എലിസബത്ത് വാറൻ ഉൾപ്പെടെയുള്ള രാഷ്ട്രീയക്കാർ വാദിക്കുന്നു.
വൻ സമ്പത്ത് മസ്കിനെ ആഗോള രാഷ്ട്രീയത്തിൽ നിർണ്ണായക സ്വാധീനമുള്ള വ്യക്തിയാക്കി മാറ്റിയിട്ടുണ്ട്. അമേരിക്കൻ പ്രസിഡൻ്റ് ഡോണൾഡ് ട്രംപിൻ്റെ തിരഞ്ഞെടുപ്പ് പ്രചാരണത്തിന് വലിയ തുക നൽകിയ മസ്ക്, തുടർന്ന് രൂപീകരിച്ച ‘ഡിപ്പാർട്ട്മെൻ്റ് ഫോർ ഗവൺമെൻ്റ് എഫിഷ്യൻസി’ എന്ന സമിതിക്ക് നേതൃത്വം നൽകിയിരുന്നു. അദ്ദേഹത്തിൻ്റെ നിർദ്ദേശപ്രകാരം യുഎസ് ഏജൻസി ഫോർ ഇൻ്റർനാഷണൽ ഡെവലപ്മെൻ്റ് അടച്ചുപൂട്ടിയത് വൻ വിവാദങ്ങൾക്ക് കാരണമായിരുന്നു. യുകെ പ്രധാനമന്ത്രി സർ കീർ സ്റ്റാർമറുമായും കുടിയേറ്റം ഉൾപ്പെടെയുള്ള വിവിധ വിഷയങ്ങളിൽ മസ്ക് നിരന്തരം തർക്കങ്ങളിലാണ്.
അതേസമയം , മസ്കിൻ്റെ ഈ സമ്പത്ത് മുഴുവൻ ഓഹരി വിപണിയുമായി ബന്ധപ്പെട്ടിരിക്കുന്നതിനാൽ അടുത്ത ഒരു വർഷത്തേക്ക് അദ്ദേഹത്തിന് സ്പേസ് എക്സ് ഓഹരികൾ വിൽക്കാൻ സാധിക്കില്ല. അതിനിടെ, അടുത്ത രണ്ട് വർഷത്തിനുള്ളിൽ സ്പേസ് എക്സ് ടെസ്ലയുമായി ലയിച്ചേക്കുമെന്നും, അത് വിപണിയിൽ അതിശക്തമായ മറ്റൊരു കമ്പനിയുടെ ഉദയത്തിന് കാരണമാകുമെന്നും സാമ്പത്തിക വിദഗ്ദ്ധർ വിലയിരുത്തുന്നു.
Elon Musk becomes the world’s first ‘trillionaire’
