വാഷിംഗ്ടൺ/ലണ്ടൻ: ലോകകപ്പ് ഫുട്ബോളിലെ ഇംഗ്ലണ്ടിനെതിരായ വിജയത്തിന് പിന്നാലെ ഫോക്ലാൻഡ് ദ്വീപുകളുടെ പരമാധികാരം ഉന്നയിച്ച് ബാനർ ഉയർത്തിയ അർജന്റീന ടീമിനെ പിന്തുണച്ച് വൈറ്റ് ഹൗസ് രംഗത്ത്. കളിക്കാരുടെ ആവിഷ്കാര സ്വാതന്ത്ര്യത്തെ മാനിക്കണമെന്നാണ് അമേരിക്കയുടെ നിലപാട്. എന്നാൽ, സംഭവത്തിൽ രാജ്യാന്തര ഫുട്ബോൾ ഭരണസമിതിയായ ഫിഫ അടിയന്തരമായി അന്വേഷണം നടത്തണമെന്ന ആവശ്യത്തിൽ ഉറച്ചുനിൽക്കുകയാണ് ബ്രിട്ടൻ.
ബുധനാഴ്ച നടന്ന സെമിഫൈനൽ മത്സരത്തിൽ ഇംഗ്ലണ്ടിനെ പരാജയപ്പെടുത്തിയതിന് പിന്നാലെയാണ് അർജന്റീന താരങ്ങൾ വിവാദ ബാനർ ഉയർത്തിയത്. “ലാസ് മാൽവിനാസ് സൺ അർജന്റീനാസ്” (ഫോക്ലാൻഡ് ദ്വീപുകൾ അർജന്റീനയുടേതാണ്) എന്നായിരുന്നു ബാനറിലെ വാചകം. കായികരംഗത്ത് രാഷ്ട്രീയ പ്രസ്താവനകൾ വിലക്കുന്ന ഫിഫയുടെ കടുത്ത നിയമലംഘനമാണിതെന്ന് ചൂണ്ടിക്കാണിക്കപ്പെടുന്നു. ഇതോടെ അർജന്റീന ടീം കനത്ത അച്ചടക്ക നടപടി നേരിടേണ്ടി വരുമെന്നാണ് റിപ്പോർട്ടുകൾ.
അതേസമയം, അർജന്റീന താരങ്ങളുടെ നടപടി തെറ്റാണോ എന്ന മാധ്യമപ്രവർത്തകരുടെ ചോദ്യത്തിന്, വൈറ്റ് ഹൗസ് ഫിഫ ടാസ്ക് ഫോഴ്സ് തലവൻ ആൻഡ്രൂ ജൂലിയാനി നൽകിയ മറുപടി ബ്രിട്ടനെ ചൊടിപ്പിച്ചിട്ടുണ്ട്. അമേരിക്കൻ ഭരണഘടനയിലെ ഒന്നാം ഭേദഗതി ഉറപ്പുനൽകുന്ന ആവിഷ്കാര സ്വാതന്ത്ര്യം ചൂണ്ടിക്കാണിച്ച ജൂലിയാനി, ഇത്തരം പ്രസ്താവനകൾ നടത്താനുള്ള അവകാശം ടീമിനുണ്ടെന്ന് വ്യക്തമാക്കി. വൈറ്റ് ഹൗസിന്റെ ഈ നിലപാട് ബ്രിട്ടനും അമേരിക്കയും തമ്മിലുള്ള നയതന്ത്ര വിയോജിപ്പുകൾക്ക് വഴിതുറന്നിരിക്കുകയാണ്.
ഫിഫ അന്വേഷണം നടത്തണമെന്ന ആവശ്യത്തെ ബ്രിട്ടീഷ് പ്രധാനമന്ത്രിയുടെ ഔദ്യോഗിക വസതിയായ ഡൗണിംഗ് സ്ട്രീറ്റ് ശക്തമായി പിന്തുണച്ചു. “ലോകകപ്പ് ഒരുപക്ഷേ നമ്മുടേതായിരിക്കില്ല, പക്ഷേ ഫോക്ലാൻഡ് ദ്വീപുകൾ തീർച്ചയായും നമ്മുടേതാണ്. ആ പ്രദേശത്തോടുള്ള ഞങ്ങളുടെ പ്രതിബദ്ധതയിൽ മാറ്റമുണ്ടാകില്ല,” ബ്രിട്ടീഷ് പ്രധാനമന്ത്രിയുടെ വക്താവ് വ്യക്തമാക്കി. കളിക്കാർക്കെതിരെയുള്ള നടപടി ഫിഫയുടെ പരിധിയിൽ വരുന്നതാണെങ്കിലും, കായികരംഗത്തെ ഇത്തരം രാഷ്ട്രീയവൽക്കരണത്തിനെതിരെ ബിസിനസ്സ് സെക്രട്ടറി പീറ്റർ കൈൽ ഉന്നയിച്ച അന്വേഷണ ആവശ്യത്തെ ബ്രിട്ടീഷ് സർക്കാർ പൂർണ്ണമായും പിന്തുണയ്ക്കുന്നു.
എന്നാല്, തങ്ങളെ ഒരു രാഷ്ട്രീയ ആയുധമാക്കുന്നതിനോട് യോജിക്കാനാവില്ലെന്ന് ഫോക്ലാൻഡ് ദ്വീപ് സർക്കാർ പ്രതികരിച്ചു. അർജന്റീനയുടെ ഭാഗത്തുനിന്നുണ്ടായ ഈ പെരുമാറ്റത്തിൽ നിരാശയുണ്ടെന്നും, കായികരംഗത്തേക്ക് രാഷ്ട്രീയം വലിച്ചിഴയ്ക്കുന്ന ഇത്തരം പ്രവണതകൾക്കെതിരെ ഫിഫ കർശനമായ നടപടി സ്വീകരിക്കുമെന്നാണ് പ്രതീക്ഷിക്കുന്നതെന്നും അവർ പ്രസ്താവനയിലൂടെ അറിയിച്ചു.
2013-ൽ ഫോക്ലാൻഡിൽ നടന്ന ജനഹിത പരിശോധനയിൽ 90 ശതമാനത്തിലധികം ജനങ്ങളും യുകെയുടെ ഭാഗമായി തുടരാനാണ് വോട്ട് ചെയ്തത്. പോൾ ചെയ്ത 1,517 വോട്ടുകളിൽ വെറും 3 വോട്ടുകൾ മാത്രമാണ് യുകെ ഭരണത്തിനെതിരെ വീണത്.
അതേസമയം, വിജയത്തിന് പിന്നാലെ കടുത്ത പ്രതികരണവുമായി അർജന്റീന വൈസ് പ്രസിഡന്റ് വിക്ടോറിയ വില്ലാറുവൽ രംഗത്തെത്തി. അർജന്റീന സൈനികരുടെ ദൃശ്യങ്ങൾക്കൊപ്പം ‘എക്സ്’ പ്ലാറ്റ്ഫോമിൽ അവർ കുറിച്ചതിങ്ങനെ:
“ഫോക്ലാൻഡ് അർജന്റീനയുടേതാണ്. സ്റ്റേഡിയത്തിലേക്ക് ബാനറുകൾ കൊണ്ടുവരുന്നത് അവർ നിരോധിച്ചുകാണും, എന്നാൽ ആ ദ്വീപുകൾ ഞങ്ങളുടെ ചോരയിലും ഹൃദയത്തിലുമുണ്ടെന്ന കാര്യം അവർ മറന്നുപോയി.”
നേരത്തെ പ്രീ-ക്വാർട്ടറിൽ ഈജിപ്തിനെ 3-2 ന് തോൽപ്പിച്ചപ്പോഴും അർജന്റീന താരങ്ങൾ ഫോക്ലാൻഡിനെയും ഫുട്ബോൾ ഇതിഹാസങ്ങളായ ഡിഗോ മറഡോണ, ലയണൽ മെസ്സി എന്നിവരെയും പരാമർശിച്ചുള്ള മുദ്രാവാദ്യങ്ങൾ ആലപിച്ചിരുന്നു.
എന്താണ് ഫോക്ലാൻഡ് തർക്കം?
തെക്ക്-പടിഞ്ഞാറൻ അറ്റ്ലാന്റിക് സമുദ്രത്തിലെ ബ്രിട്ടീഷ് അധീനതയിലുള്ള ദ്വീപ് സമൂഹമാണ് ഫോക്ലാൻഡ്സ്. ഈ പ്രദേശത്തിന്മേൽ അർജന്റീനയും പരമാധികാരം അവകാശപ്പെടുന്നുണ്ട്. 1982-ൽ ഇതേച്ചൊല്ലി ഇരുരാജ്യങ്ങളും തമ്മിൽ 74 ദിവസം നീണ്ടുനിന്ന കടുത്ത യുദ്ധമുണ്ടായി. അന്ന് ദ്വീപിൽ അധിനിവേശം നടത്തിയ അർജന്റീന സൈന്യത്തെ ബ്രിട്ടീഷ് സേന തിരിച്ചടിക്കുകയായിരുന്നു. ഈ യുദ്ധത്തിൽ 649 അർജന്റീന സൈനികരും 255 ബ്രിട്ടീഷ് സൈനികരും 3 ദ്വീപ് നിവാസികളും കൊല്ലപ്പെട്ടിരുന്നു. ലോകകപ്പ് വേദിയിലെ പുതിയ സംഭവവികാസങ്ങളോടെ ഈ പഴയ ചരിത്രവൈര്യം വീണ്ടും കായിക ലോകത്ത് പുകയുകയാണ്.
Falklands banner controversy: White House supports Argentina team’s freedom of expression; Britain calls for investigation
