വാഷിംഗ്ടൺ: ഫിഫ ലോകകപ്പ് 2026-നെ സമാനതകളില്ലാത്ത ആവേശകരമായ ടൂർണമെന്റ് എന്ന് പ്രശംസിച്ച് യുഎസ് പ്രസിഡന്റ് ഡൊണാൾഡ് ട്രംപ്. കടുത്ത മത്സരങ്ങളും മറക്കാനാകാത്ത നിമിഷങ്ങളും സമ്മാനിച്ചാണ് ലോകകപ്പ് ഫൈനലിലേക്ക് കടക്കുന്നതെന്ന് അദ്ദേഹം പറഞ്ഞു. ട്രംപ് ടവറിൽ ഫിഫ പ്രസിഡന്റ് ജിയാനി ഇൻഫാന്റിനോയ്ക്കൊപ്പം പങ്കെടുത്ത ഔദ്യോഗിക ഫിഫ സ്വീകരണ ചടങ്ങിലാണ് ട്രംപ് ഇക്കാര്യങ്ങൾ വ്യക്തമാക്കിയത്. ഞായറാഴ്ച നടക്കുന്ന ആവേശകരമായ ഫൈനലിൽ അർജന്റീനയും സ്പെയിനും തമ്മിലാണ് ഏറ്റുമുട്ടുന്നത്.
അതിനിടെ, വാർത്താ സമ്മേളനത്തിനിടെ അടുത്ത ലോകകപ്പ് വേദിയെക്കുറിച്ച് ട്രംപ് നടത്തിയ തമാശകൾ ശ്രദ്ധേയമായി. “അടുത്ത തവണ ഫിഫ ലോകകപ്പിനായി നിങ്ങൾ അമേരിക്കയെത്തന്നെ തിരഞ്ഞെടുക്കണം. പക്ഷേ ഇത്തവണ കാനഡയെയും മെക്സിക്കോയെയും നമ്മൾ ഒഴിവാക്കും. കഴിഞ്ഞ തവണ അവരെ കൂടെക്കൂട്ടിയത് എന്റെ നല്ല മനസ്സ് കൊണ്ടാണ്. പകരം മറ്റാരെയെങ്കിലും പങ്കാളികളാക്കിയാൽ എല്ലാവരുടെയും ദേഷ്യവും വിദ്വേഷവും കുറയ്ക്കാൻ അത് സഹായിക്കും.”
അമേരിക്കയും ചൈനയും ചേർന്ന് സംയുക്തമായി ലോകകപ്പ് നടത്തുന്നതിനെക്കുറിച്ച് ഇൻഫാന്റിനോ മുന്നോട്ടുവെച്ച നിർദ്ദേശത്തെയും ട്രംപ് ചിരിയോടെ പരാമർശിച്ചു. രണ്ട് രാജ്യങ്ങൾക്കുമിടയിലെ ദീർഘദൂര യാത്രയെ പരിഹസിച്ച്, മത്സരങ്ങൾക്കിടയിൽ കളിക്കാർക്ക് ‘വളരെ കുറഞ്ഞ സമയത്തെ വിമാനയാത്ര’ മാത്രമേ വേണ്ടിവരൂ എന്നും കളിക്കാർക്ക് അത് വളരെ ഇഷ്ടപ്പെടുമെന്നും അദ്ദേഹം തമാശയായി പറഞ്ഞു.
ടൂർണമെന്റിനിടെ യുഎസ് ഫോർവേഡ് ഫോളാരിൻ ബലോഗന് റെഡ് കാർഡ് ലഭിച്ചപ്പോൾ ഫിഫ പ്രസിഡന്റിനെ വിളിച്ച് പരാതിപ്പെട്ട കാര്യവും ട്രംപ് വെളിപ്പെടുത്തി. ബോസ്നിയയ്ക്കെതിരായ മത്സരത്തിൽ റെഡ് കാർഡ് കിട്ടിയ ബലോഗന്റെ സസ്പെൻഷൻ പിന്നീട് ഫിഫ അച്ചടക്ക സമിതിയുടെ 27-ാം വകുപ്പ് പ്രകാരം റദ്ദാക്കിയിരുന്നു. ഫിഫയുടേത് മികച്ച തീരുമാനമായിരുന്നുവെന്നും വിവാദങ്ങൾ ഒഴിവാക്കാൻ ഇത് സഹായിച്ചുവെന്നും ട്രംപ് കൂട്ടിച്ചേർത്തു. എന്നാൽ റൗണ്ട് ഓഫ് 16-ൽ ബെൽജിയത്തോട് 4-1 ന് തോറ്റ് അമേരിക്ക ടൂർണമെന്റിൽ നിന്ന് പുറത്തായിരുന്നു.
ലോകകപ്പ് ഫൈനൽ: അർജന്റീന – സ്പെയിൻ പോരാട്ടം ഞായറാഴ്ച
യൂറോപ്യൻ ചാമ്പ്യന്മാരായ സ്പെയിനും നിലവിലെ ലോക ചാമ്പ്യന്മാരായ അർജന്റീനയും തമ്മിലാണ് ഇത്തവണത്തെ കലാശപ്പോരാട്ടം. സെമി ഫൈനലിൽ ഫ്രാൻസിനെ എതിരില്ലാത്ത രണ്ട് ഗോളുകൾക്ക് തകർത്താണ് സ്പെയിൻ ഫൈനലിലെത്തിയത്. ആവേശകരമായ മറ്റൊരു സെമിയിൽ, ഇംഗ്ലണ്ടിനെതിരെ ഒരു ഗോളിന് പിന്നിൽ നിന്ന ശേഷം സ്റ്റോപ്പേജ് ടൈം ഗോളിലൂടെ 2-1 നായിരുന്നു അർജന്റീനയുടെ വിജയം.
സെമി ഫൈനലിൽ രണ്ട് അസിസ്റ്റുകൾ നൽകിയ അർജന്റീന ക്യാപ്റ്റൻ ലയണൽ മെസ്സി, ഫ്രഞ്ച് താരം കിലിയൻ എംബാപ്പെയെ മറികടന്ന് നിലവിൽ ഗോൾഡൻ ബൂട്ട് റേസിൽ മുന്നിലെത്തിയിട്ടുണ്ട്. ഇന്ത്യൻ സമയം ഞായറാഴ്ച അർദ്ധരാത്രി 12:30 നാണ് കലാശ പോരാട്ടം
Next World Cup could be held in the US without Mexico and Canada; Trump’s ‘joke’ at FIFA stage
