കാലിഫോർണിയ: വടക്കൻ കാലിഫോർണിയയിലെ ശാസ്ത-ട്രിനിറ്റി നാഷണൽ ഫോറസ്റ്റിൽ യു.എസ് ഫോറസ്റ്റ് സർവീസ് ജീവനക്കാരെ മണിക്കൂറുകളോളം തോക്കിൻമുനയിൽ ബന്ദികളാക്കിയ സായുധനായ പ്രതിയെ പൊലീസ് അറസ്റ്റ് ചെയ്തു. വ്യാഴാഴ്ച രാവിലെ ആരംഭിച്ച നാടകീയമായ സംഭവങ്ങൾക്കൊടുവിൽ വെള്ളിയാഴ്ച പുലർച്ചെയാണ് രണ്ട് ജീവനക്കാരെയും സുരക്ഷിതമായി മോചിപ്പിച്ചത്.
പ്രതിയായ ജോസഫ് ഹെൻറിച്ച്സെൻ (49), ഇയാളുടെ പ്രായപൂർത്തിയായ മകൻ എന്നിവരെ സിസ്കിയു കൗണ്ടി പൊലീസ് കസ്റ്റഡിയിലെടുത്തു. വനത്തിലെ ഗംബൂട്ട് തടാകത്തിന് സമീപമുള്ള ഒരു ട്രെയിലറിനുള്ളിൽ (കാരവാൻ) വെച്ചാണ് ജീവനക്കാരുടെ കൈകൾ സിപ്പ്-ടൈ ഉപയോഗിച്ച് ബന്ധിച്ച് പ്രതി ബന്ദിയാക്കിയത്.
വ്യാഴാഴ്ച രാവിലെ 10:55 ഓടെയാണ് ജീവനക്കാരെ ബന്ദികളാക്കിയ വിവരം ഫോറസ്റ്റ് സർവീസ് അധികൃതർ പൊലീസിനെ അറിയിക്കുന്നത്. വനത്തിനുള്ളിലെ ഉൾപ്രദേശമായതിനാൽ ഡ്രോണുകൾ ഉപയോഗിച്ച് നടത്തിയ തിരച്ചിലിലാണ് പ്രതികൾ ഒളിച്ചിരുന്ന ട്രെയിലർ കണ്ടെത്തിയത്. തനിക്ക് എഫ്.ബി.ഐ ഉദ്യോഗസ്ഥരുമായി സംസാരിക്കണമെന്ന് ആവശ്യപ്പെട്ട പ്രതി, സുരക്ഷാ ഉദ്യോഗസ്ഥരുമായി ദീർഘനേരം ഒത്തുമുഖാമുഖം നിന്നു.
സ്ഥിതിഗതികൾ സങ്കീർണ്ണമായതിനെ തുടർന്ന് വൈകുന്നേരം 4:20 ഓടെ വെർജീനിയയിലെ ക്വാണ്ടിക്കോയിൽ നിന്നുള്ള എഫ്.ബി.ഐയുടെ പ്രത്യേക ഹോസ്റ്റേജ് റെസ്ക്യൂ ടീം ഉൾപ്പെടെയുള്ള വൻ സന്നാഹം സ്ഥലത്തെത്തി പ്രതിയുമായി ചർച്ചകൾ ആരംഭിച്ചു.
മണിക്കൂറുകൾ നീണ്ട ചർച്ചകൾക്കൊടുവിൽ വെള്ളിയാഴ്ച പുലർച്ചെ 1:50 ഓടെ രണ്ട് ജീവനക്കാരെയും പ്രതികൾ സുരക്ഷിതമായി വിട്ടയച്ചു. ഇവർ പരിക്കുകളേൽക്കാതെ രക്ഷപെട്ടതായും വീടുകളിലേക്ക് മടങ്ങിയതായും സിസ്കിയു കൗണ്ടി ഷെരീഫ് ജെറമിയ ലാറൂ വാർത്താ സമ്മേളനത്തിൽ അറിയിച്ചു. പിന്നീട് പുലർച്ചെ 2:30 ഓടെ പ്രതിയും മകനും ട്രെയിലറിന് പുറത്തുവരുകയും കീഴടങ്ങുകയുമായിരുന്നു.
പ്രതികൾ ഉപയോഗിച്ച ട്രെയിലറിൽ നിന്ന് ഒരു റൈഫിളും കത്തികളും പൊലീസ് കണ്ടെടുത്തിട്ടുണ്ട്. തന്റെ പക്കൽ ഗ്രനേഡുകൾ ഉണ്ടെന്നും പ്രതി അവകാശപ്പെട്ടിരുന്നു. ഫെഡറൽ ജീവനക്കാരെ തട്ടിക്കൊണ്ടുപോയതടക്കമുള്ള ഗുരുതരമായ കുറ്റങ്ങളാണ് പ്രതിക്കെതിരെ ചുമത്തിയിരിക്കുന്നത്. സംഭവത്തിൽ അന്വേഷണം പുരോഗമിക്കുകയാണെന്നും കൃത്യത്തിന് പിന്നിലെ യഥാർത്ഥ ലക്ഷ്യം വ്യക്തമായിട്ടില്ലെന്നും അധികൃതർ അറിയിച്ചു.
Dramatic events in the US; Suspect arrested after holding Forest Service employees hostage at gunpoint for hours
