വാഷിംഗ്ടൺ: ഇറാനുമായി കടുത്ത സൈനിക നീക്കങ്ങൾക്കും യുദ്ധത്തിനുമുള്ള സാധ്യതയേറിയെന്ന ആശങ്കകൾക്കിടയിൽ അമേരിക്കൻ പ്രസിഡന്റ് ഡോണൾഡ് ട്രംപിന്റെ വസതിക്കും വിമാനത്താവളത്തിനും ചുറ്റും ശക്തമായ വ്യോമപ്രതിരോധ സംവിധാനങ്ങൾ വിന്യസിച്ചു. ഫ്ലോറിഡയിലെ ട്രംപിന്റെ മാർ-എ-ലാഗോ ഗോൾഫ് എസ്റ്റേറ്റിലും, വെസ്റ്റ് പാം ബീച്ചിലെ ട്രംപ് ഇന്റർനാഷണൽ എയർപോർട്ടിന് സമീപവുമാണ് പുതിയ ഉപരിതല-വ്യോമ മിസൈൽ പ്രതിരോധ സംവിധാനങ്ങൾ ഏർപ്പെടുത്തിയിരിക്കുന്നത്.
പ്രസിഡന്റിന്റെ സുരക്ഷാ ചുമതലയുള്ള യുഎസ് സീക്രട്ട് സർവീസ് ഇതിനെ “സുരക്ഷയുടെ അധിക തലം” എന്ന് വിശേഷിപ്പിച്ചെങ്കിലും, നിലവിലെ സാഹചര്യത്തിൽ ഈ നീക്കം മിഡിൽ ഈസ്റ്റിൽ വൻ യുദ്ധപ്രതിസന്ധിക്ക് കാരണമായേക്കുമെന്ന ആശങ്ക ശക്തമാക്കുന്നുണ്ട്.
ട്രംപ് തന്റെ ‘വിന്റർ വൈറ്റ് ഹൗസ്’ എന്ന് വിശേഷിപ്പിക്കുന്ന സമുദ്രതീരത്തെ 17 ഏക്കർ വിസ്തൃതിയുള്ള മാർ-എ-ലാഗോ പ്രോപ്പർട്ടിയുടെ പടിഞ്ഞാറൻ ഭാഗത്താണ് അത്യാധുനിക പ്രതിരോധ സംവിധാനം ഒരുക്കിയിരിക്കുന്നത്. ലേക്ക് വർത്ത് ലഗൂണിലെ ജലാശയത്തിൽ പ്രത്യേകം സജ്ജീകരിച്ച ഫ്ലോട്ടിംഗ് ബാർജിലാണ് (ഒഴുകിനടക്കുന്ന വലിയ പ്ലാറ്റ്‌ഫോം) രണ്ട് ‘അവഞ്ചർ എയർ ഡിഫൻസ് സിസ്റ്റങ്ങൾ’ വിന്യസിച്ചിരിക്കുന്നത്. കഴിഞ്ഞ ആഴ്ച ട്രംപ് എസ്റ്റേറ്റിൽ എത്തുന്നതിന് തൊട്ടുമുമ്പ് പാം ബീച്ച് ഡെയ്‌ലിയിലെ ഒരു ഫോട്ടോ ജേണലിസ്റ്റാണ് ഈ ദൃശ്യങ്ങൾ ആദ്യമായി പുറത്തുവിട്ടത്.
Fear of War with Iran: Missile Defense for Trump’s Residence and Airport
