ന്യൂഡൽഹി: ആന്റി-എസ്.ഐ.ആർ പ്രതിഷേധങ്ങളുടെ ഭാഗമായി ലോക്സഭാ പ്രതിപക്ഷ നേതാവ് രാഹുൽ ഗാന്ധി ആഹ്വാനം ചെയ്ത കൊണാട്ട് പ്ലേസ് – രാംലീല മൈതാനം മാർച്ചിന് അനുമതി തേടിയിട്ടില്ലെന്ന് ഡൽഹി പൊലീസ്. നവംബർ 1-ന് രാംലീല മൈതാനത്ത് നടക്കുന്ന മെഗാ റാലിക്ക് മുന്നോടിയായാണ് കൊണാട്ട് പ്ലേസിൽ നിന്ന് മാർച്ച് നടത്താൻ രാഹുൽ ഗാന്ധി ആഹ്വാനം ചെയ്തത്. എന്നാൽ മാർച്ചിനായി ഔദ്യോഗികമായി യാതൊരു അനുമതിയും തേടിയിട്ടില്ലെന്ന് ഡൽഹി പൊലീസ് വൃത്തങ്ങളെ ഉദ്ധരിച്ച് വാർത്താ ഏജൻസിയായ എ.എൻ.ഐ റിപ്പോർട്ട് ചെയ്തു.
ഞായറാഴ്ച ഉച്ചയ്ക്ക് 12 മണിക്ക് കൊണാട്ട് പ്ലേസിന് സമീപമുള്ള മിന്റോ റോഡ് ജംഗ്ഷനിൽ നിന്ന് ആരംഭിച്ച് അജ്മേരി ഗേറ്റ് വഴി രാംലീല മൈതാനത്ത് അവസാനിക്കുന്ന മാർച്ചിന്റെ റൂട്ട് രാഹുൽ ഗാന്ധി എക്സ് പ്ലാറ്റ്‌ഫോമിലൂടെ പങ്കുവെച്ചിരുന്നു. “നാളെ കാണാം, നമുക്ക് ഒരുമിച്ച് നടക്കാം” എന്നും അദ്ദേഹം കുറിച്ചു.
എന്നാൽ, നിലവിൽ ഡൽഹിയിലെ ഇലക്ഷൻ കമ്മീഷൻ പരിസരം ഉൾപ്പെടെയുള്ള ന്യൂഡൽഹി മേഖലകളിൽ കൂട്ടംകൂടലുകൾ നിരോധിച്ചുകൊണ്ടുള്ള ഭാരതീയ നാഗരിക് സുരക്ഷാ സംഹിതയിലെ സെക്ഷൻ 163 നിലവിലുണ്ടെന്ന് പൊലീസ് വ്യക്തമാക്കി. അതേസമയം ജനപ്രതിനിധികൾക്കും രാഷ്ട്രീയ നേതാക്കൾക്കും അവരുടെ സ്വകാര്യ വാഹനങ്ങളിൽ കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിലേക്കോ, കോൺസ്റ്റിറ്റ്യൂഷൻ ക്ലബ്ബിലേക്കോ മറ്റ് ആവശ്യസ്ഥലങ്ങളിലേക്കോ യാത്ര ചെയ്യുന്നതിന് തടസ്സമില്ലെന്നും പൊലീസ് അറിയിച്ചിട്ടുണ്ട്.
Rahul’s march to take place tomorrow in violation of restrictions; Delhi Police state no permission was sought—dramatic developments in the capital?
