സാമ്പത്തിക പ്രതിസന്ധി രൂക്ഷം; ഷിക്കാഗോ ഇവാൻസ്റ്റണിൽ 2 എലിമെൻ്ററി സ്കൂളുകൾ അടച്ചുപൂട്ടാൻ നീക്കം; പ്രതിഷേധവുമായി രക്ഷിതാക്കൾ

അനിൽ മറ്റത്തിക്കുന്നേൽ

ഷിക്കാഗോ: സാമ്പത്തിക പ്രതിസന്ധി മറികടക്കുന്നതിനായി ഷിക്കാഗോയുടെ വടക്കൻ
പ്രാന്തപ്രദേശമായ ഇവാൻസ്റ്റണിലെ രണ്ട് എലിമെന്ററി സ്കൂളുകൾ
അടച്ചുപൂട്ടാനുള്ള നീക്കം ശക്തമായ പ്രതിഷേധത്തിന് കാരണമാകുന്നു.
ഇവാൻസ്റ്റൺ–സ്കോക്കി സ്കൂൾ ഡിസ്ട്രിക്ട് 65-ന്റെ കീഴിലുള്ള ഡ്യൂയിഎലിമെന്ററി സ്കൂളും ലിങ്കൺവുഡ് എലിമെന്ററി സ്കൂളുമാണ് അടച്ചുപൂട്ടൽ ഭീഷണിനേരിടുന്നത്.

ഏകദേശം 20 മില്യൺ ഡോളറിന്റെ ബജറ്റ് കുറവ് പരിഹരിക്കുന്നതിനുള്ള
നടപടികളുടെ ഭാഗമായാണ് സ്കൂളുകൾ അടച്ചുപൂട്ടാനുള്ള നിർദേശം പരിഗണിക്കുന്നത്.

സ്കൂൾ ഡിസ്ട്രിക്ടിന്റെ ചെലവുകൾ വരുമാനത്തേക്കാൾ ഇരട്ടി വേഗത്തിൽ
വർധിക്കുന്നതായി ഇടക്കാല സൂപ്രണ്ട് ഡോ. എറിക് വിതർസ്പൂൺവ്യക്തമാക്കിയിട്ടുണ്ട്. കഴിഞ്ഞ നാലുവർഷത്തിനിടെ ഏകദേശം 30 മില്യൺ ഡോളർ കരുതൽധനത്തിൽനിന്ന് ചെലവഴിക്കേണ്ടിവന്നതായും അധികൃതർ പറയുന്നു.

ഡിസ്ട്രിക്ടിലെ എലിമെന്ററി സ്കൂൾ കെട്ടിടങ്ങൾ നിലവിൽ ശരാശരി 66 ശതമാനം
ശേഷിയിലാണ് പ്രവർത്തിക്കുന്നത്. വിദ്യാർഥികളുടെ എണ്ണവും കെട്ടിടങ്ങളുടെ പരിപാലനച്ചെലവും പരിഗണിച്ചാണ് സ്കൂളുകളുടെ പ്രവർത്തനം പുനഃസംഘടിപ്പിക്കാനുള്ള നീക്കം.

അതേസമയം സ്കൂളുകൾ അടച്ചുപൂട്ടാനുള്ള നിർദേശത്തിനെതിരെ രക്ഷിതാക്കളും വിദ്യാർഥികളും പ്രദേശവാസികളും രംഗത്തെത്തി. ഞായറാഴ്ച ട്വിഗ്സ് പാർക്കിൽ നടന്ന പ്രതിഷേധത്തിൽ നൂറിലധികം പേർ പങ്കെടുത്തു.

സ്കൂളുകൾ അടച്ചുപൂട്ടുന്നത് കുട്ടികളുടെ പഠനത്തെയും സാമൂഹിക ബന്ധങ്ങളെയും പ്രതികൂലമായി ബാധിക്കുമെന്ന് രക്ഷിതാക്കൾ ചൂണ്ടിക്കാട്ടുന്നു. പ്രത്യേക വിദ്യാഭ്യാസ പരിപാടികൾക്കും ഭാഷാപഠന പദ്ധതികൾക്കും ഉണ്ടാകാവുന്ന പ്രത്യാഘാതങ്ങളും ആശങ്കയ്ക്ക് കാരണമായിട്ടുണ്ട്. ഡ്യൂയി സ്കൂളിലെ സ്പാനിഷ് ടു-വേ ഇമ്മർഷൻ പ്രോഗ്രാമിന്റെയും ലിങ്കൺവുഡിലെ പ്രത്യേക വിദ്യാഭ്യാസ പദ്ധതികളുടെയും ഭാവി സംബന്ധിച്ചും ചോദ്യങ്ങൾ ഉയരുന്നു.

നവംബർ 16 തിങ്കളാഴ്ച വൈകുന്നേരം ആറുമണിക്ക് നടക്കുന്ന സ്കൂൾ ബോർഡ്
യോഗത്തിൽ അടച്ചുപൂട്ടൽ നിർദേശങ്ങളുമായി ബന്ധപ്പെട്ട ഔദ്യോഗിക പൊതുഹിയറിങ്
നടപടികൾ ആരംഭിക്കണമോ എന്ന കാര്യത്തിൽ തീരുമാനമെടുക്കും.

എന്നാൽ ഈ യോഗത്തിൽ സ്കൂളുകൾ അടച്ചുപൂട്ടാനുള്ള അന്തിമ തീരുമാനം
ഉണ്ടാകില്ല. പൊതുജനങ്ങളുടെ അഭിപ്രായങ്ങൾ കേൾക്കുന്നതിനുള്ള ഔദ്യോഗിക
നടപടികൾ ആരംഭിക്കുന്നതിനെക്കുറിച്ചാണ് ബോർഡ് പരിഗണിക്കുന്നത്.

സാമ്പത്തിക പ്രതിസന്ധി പരിഹരിക്കുന്നതിനൊപ്പം കുട്ടികളുടെ വിദ്യാഭ്യാസ
അവസരങ്ങളും പ്രദേശത്തെ സ്കൂൾ സമൂഹങ്ങളുടെ താൽപര്യങ്ങളും സംരക്ഷിക്കണമെന്ന
ആവശ്യമാണ് രക്ഷിതാക്കൾ മുന്നോട്ടുവയ്ക്കുന്നത്.

സ്കൂൾ ബോർഡിന്റെ തുടർനടപടികൾ ഇവാൻസ്റ്റണിലെയും സ്കോക്കിയിലെയും
നൂറുകണക്കിന് കുടുംബങ്ങൾക്ക് നിർണായകമാകും.

More Stories from this section

family-dental
witywide