നേയ്പിഡോ: മ്യാൻമറിലെ ജനാധിപത്യ പോരാളിയും നോബൽ സമ്മാന ജേതാവുമായ ഓങ് സാൻ സൂകിയെ ജയിലിൽ നിന്ന് വീട്ടുതടങ്കലിലേക്ക് മാറ്റി. ബുദ്ധമത ഉത്സവത്തോടനുബന്ധിച്ച് തടവുകാർക്ക് നൽകിയ പൊതുമാപ്പിൻ്റെ ഭാഗമായാണ് സൂകിയെയും മാറ്റിയതെന്ന് സൈനിക ഭരണകൂടം അറിയിച്ചു.
2021-ലെ സൈനിക അട്ടിമറിക്ക് ശേഷം തടവിലാക്കപ്പെട്ട സൂകിയെ അഞ്ച് വർഷത്തിന് ശേഷമാണ് ജയിലിന് പുറത്തേക്ക് കൊണ്ടുവരുന്നത്. വിവിധ കുറ്റങ്ങൾ ചുമത്തി 27 വർഷത്തെ തടവ് ശിക്ഷയായിരുന്നു സൂകിക്ക് വിധിച്ചിരുന്നത്. പുതിയ ഇളവ് പ്രകാരം ഇത് 18 വർഷമായി കുറച്ചിട്ടുണ്ട്. ജയിലിൽ നിന്ന് മാറ്റിയ സൂകിയുടെ ഒരു പുതിയ ചിത്രം സൈനിക മാധ്യമങ്ങൾ പുറത്തുവിട്ടു. രണ്ട് ഉദ്യോഗസ്ഥർക്കിടയിൽ ബെഞ്ചിൽ ഇരിക്കുന്ന നിലയിലുള്ള ഈ ചിത്രം അഞ്ച് വർഷത്തിനിടെ പുറത്തുവരുന്ന സൂകിയുടെ ആദ്യ ദൃശ്യമാണ്.
80 വയസ്സുകാരിയായ സൂകിയുടെ ആരോഗ്യനിലയിൽ കുടുംബാംഗങ്ങൾ ആശങ്ക പ്രകടിപ്പിക്കുന്നുണ്ടെങ്കിലും അവർ സുരക്ഷിതയാണെന്നാണ് സൈന്യത്തിൻ്റെ നിലപാട്. ഐക്യരാഷ്ട്രസഭ ഉൾപ്പെടെയുള്ള രാജ്യാന്തര സംഘടനകൾ ഈ നീക്കത്തെ സ്വാഗതം ചെയ്തു. മ്യാൻമറിലെ രാഷ്ട്രീയ പ്രതിസന്ധി പരിഹരിക്കുന്നതിനുള്ള ആദ്യ ചുവടുവെപ്പായിട്ടാണ് ലോകം ഇതിനെ നോക്കിക്കാണുന്നത്.
Five years in prison end; Myanmar military transfers Aung San Suu Kyi to house arrest
