ലണ്ടൻ: യുഎസ്-ഇറാൻ സംഘർഷത്തെത്തുടർന്ന് ലോകത്തെ അസംസ്കൃത എണ്ണയുടെ കരുതൽ ശേഖരം ഭീതിജനകമായ വിധം അപകടകരമായ നിലയിലേക്ക് താഴ്ന്നതായി സൗദി അരാംകോ ചീഫ് എക്സിക്യൂട്ടീവ് ഓഫീസർ അമീൻ നാസർ മുന്നറിയിപ്പ് നൽകി. വിപണിയിലെ വിതരണ ആശങ്കകൾക്ക് അയവുവരുത്താനായി തങ്ങളുടെ കരുതൽ ശേഖരത്തിൽ നിന്ന് കൂടുതൽ ഇന്ധനം വിപണിയിലെത്തിക്കാൻ ജി 7 രാജ്യങ്ങൾ ധാരണയിലെത്തി ദിവസങ്ങൾക്ക് ശേഷമാണ് അദ്ദേഹം ഇക്കാര്യം വ്യക്തമാക്കിയത്.
ലണ്ടനിൽ നടന്ന ‘എനർജി ഇന്റലിജൻസ് ഫോറ’ത്തിൽ സംസാരിക്കവെയാണ് ആഗോള വിതരണ ശൃംഖലയെക്കുറിച്ചുള്ള ആശങ്കകൾ അമീൻ നാസർ പങ്കുവെച്ചത്. നിലവിൽ തന്നെ ആഗോള ഊർജ്ജ സംവിധാനം കടുത്ത സമ്മർദ്ദത്തിലാണെന്നും, ലോകത്തിന് ആശ്രയിക്കാൻ മറ്റ് സ്രോതസ്സുകൾ നാമമാത്രമായി മാത്രം അവശേഷിക്കുന്ന സാഹചര്യത്തിൽ വിതരണ പ്രതിസന്ധികളെ അതിജീവിക്കാനുള്ള ശേഷി ഭയാനകമായ വിധം ദുർബലമാണെന്നും അദ്ദേഹം ചൂണ്ടിക്കാട്ടി.
കഴിഞ്ഞ ആഴ്ച പശ്ചിമേഷ്യയിൽ നിന്നുള്ള എണ്ണക്കയറ്റുമതി യുദ്ധത്തിന് മുമ്പുള്ള നിലവാരത്തേക്കാൾ ഉയർന്നുവെന്ന റിപ്പോർട്ടുകൾ പുറത്തുവന്നതിന് തൊട്ടുപിന്നാലെയാണ് നാസറിന്റെ ഈ പ്രതികരണം. എണ്ണ വിപണിക്ക് ഇത് ആശ്വാസം പകരുന്ന വാർത്തയാണെങ്കിലും, ചെങ്കടലിന്റെ തെക്കൻ കവാടവും തന്ത്രപ്രധാനമായ മറ്റൊരു എണ്ണ കടത്തുപാതയുമായ ബാബ് എൽ-മന്ദെബ് കടലിടുക്കിന്റെ നിയന്ത്രണത്തിനായി സൗദി പിന്തുണയുള്ള സേനയും ഇറാന്റെ സഖ്യകക്ഷികളായ യെമനിലെ ഹൂതി വിമതരും തമ്മിൽ നടക്കുന്ന രൂക്ഷമായ പോരാട്ടം വിപണിയിലെ ആശ്വാസത്തിന് വലിയ മങ്ങലേൽപ്പിക്കുന്നുണ്ട്.
