വാഷിംഗ്ടൺ: അനധികൃത വോട്ടർമാരെ കണ്ടെത്തുകയെന്ന ലക്ഷ്യത്തോടെ ട്രംപ് ഭരണകൂടം നടപ്പിലാക്കിയ വിപുലമായ തെരഞ്ഞെടുപ്പ് പരിശോധനാ പദ്ധതിയുടെ വിവരങ്ങൾ പുറത്ത്. രാജ്യത്തുടനീളമുള്ള ദശലക്ഷക്കണക്കിന് വോട്ടർമാരുടെ രേഖകളും ഡാറ്റാബേസുകളും പരിശോധിച്ചതായും, വോട്ടർ രജിസ്ട്രേഷൻ രംഗത്ത് പ്രവർത്തിക്കുന്ന ഡസൻ കണക്കിന് സന്നദ്ധ സംഘടനകളെ ലക്ഷ്യമിട്ട് അന്വേഷണം നടത്തിയതായും പുതിയ ഔദ്യോഗിക രേഖകൾ വ്യക്തമാക്കുന്നു.
പ്രമുഖ സന്നദ്ധ സംഘടനയായ ‘ഡെമോക്രസി ഫോർവേഡ്’ വിവരാവകാശ നിയമപ്രകാരം പുറത്തുവിട്ട രേഖകളിലാണ് ട്രംപ് ഭരണകൂടത്തിന്റെ ഇലക്ഷൻ ഇന്റഗ്രിറ്റി കാമ്പെയ്‌ന്റെ വിശദാംശങ്ങളുള്ളത്. വോട്ടർ പട്ടികകൾ, നീതിന്യായ വകുപ്പിന്റെ ഡാറ്റാബേസുകൾ, വിവിധ ഇമിഗ്രേഷൻ രേഖകൾ എന്നിവ സംയോജിപ്പിച്ചാണ് യു.എസ് ഇമിഗ്രേഷൻ ആൻഡ് കസ്റ്റംസ് എൻഫോഴ്‌സ്‌മെന്റിന്റെ (ഐ.സി.ഇ) അന്വേഷണ വിഭാഗമായ ഹോംലാൻഡ് സെക്യൂരിറ്റി ഇൻവെസ്റ്റിഗേഷൻസ് (എച്ച്.എസ്.ഐ) ഈ പദ്ധതി നടപ്പിലാക്കിയത്.
പുറത്തുവന്ന വിവരങ്ങൾ പ്രകാരം, ജസ്റ്റിസ് ഡിപ്പാർട്ട്‌മെന്റിന്റെ ഡാറ്റാസെറ്റിൽ നിന്നുള്ള 5.06 കോടി രേഖകളും, ഹോംലാൻഡ് സെക്യൂരിറ്റി സെക്രട്ടറി മാർക്ക്‌വെൻ മുല്ലിന്റെ മുതിർന്ന ഉപദേഷ്ടാവ് ഹീതർ ഹണി സ്വതന്ത്ര സ്രോതസ്സുകൾ വഴി ശേഖരിച്ച 4.84 കോടി രേഖകളും അന്വേഷണത്തിനായി ഉപയോഗിച്ചിട്ടുണ്ട്. പൗരന്മാരല്ലാത്ത വ്യക്തികൾ ആരെങ്കിലും വോട്ട് ചെയ്തിട്ടുണ്ടോ എന്ന് പരിശോധിക്കാൻ ഈ വിവരങ്ങൾ ഫലപ്രദമായി വിശകലനം ചെയ്തുവരികയാണെന്ന് അധികൃതർ വ്യക്തമാക്കുന്നു.
അതേസമയം, വോട്ടർമാരെ ഭയപ്പെടുത്താനും തെരഞ്ഞെടുപ്പ് പ്രക്രിയകളിൽ രാഷ്ട്രീയ ലക്ഷ്യങ്ങളോടെ ഇടപെടാനുമാണ് ഭരണകൂടം ഇത്തരം മാർഗ്ഗങ്ങൾ ഉപയോഗിക്കുന്നതെന്ന് ഡെമോക്രസി ഫോർവേഡ് കുറ്റപ്പെടുത്തി. എന്നാൽ പൗരന്മാരുടെ വോട്ടുകളുടെ സുതാര്യത ഉറപ്പാക്കാനും അനധികൃത വോട്ടുകൾ തടയാനും നിയമപരമായ നടപടികളാണ് സ്വീകരിക്കുന്നതെന്ന് ഡി.എച്ച്.എസ് വക്താവ് പ്രതികരിച്ചു.
