ന്യൂയോർക്ക്: ഇന്ത്യയുടെ 80-ാം സ്വാതന്ത്ര്യദിനാഘോഷങ്ങളുടെ ഭാഗമായി ന്യൂയോർക്കിലെ ക്വീൻസ് ഇന്ത്യാ ഡേ പരേഡിൽ ന്യൂയോർക്ക് സിറ്റിയുടെ ആദ്യ ഇന്ത്യൻ-അമേരിക്കൻ മേയർ സോഹ്രാൻ മംദാനി പങ്കെടുത്തു. ഫ്ലോറൽ പാർക്കിൽ നടന്ന പരേഡിൽ ന്യൂയോർക്ക്, ന്യൂജേഴ്സി, കണക്റ്റിക്കട്ട് ഉൾപ്പെടുന്ന ട്രൈ-സ്റ്റേറ്റ് മേഖലയിലെ ഇന്ത്യൻ-അമേരിക്കൻ സമൂഹം ആവേശത്തോടെ പങ്കെടുത്തു. ട്രൈ-സ്റ്റേറ്റ് മേഖലയിലുടനീളം വിവിധ സാംസ്കാരിക പരിപാടികൾ, ദേശീയപതാക ഉയർത്തൽ ചടങ്ങുകൾ എന്നിവയും സംഘടിപ്പിച്ചു. ന്യൂജേഴ്സിയിൽ നടന്ന പ്രത്യേക പരിപാടിയിൽ ഗിന്നസ് വേൾഡ് റെക്കോർഡും സ്വന്തമാക്കി.
ശനിയാഴ്ച പരേഡിൽ പങ്കെടുത്ത മംദാനി, ഈ അനുഭവം ജീവിതത്തിൽ മറക്കാനാകാത്തതാണെന്ന് പറഞ്ഞു. “ന്യൂയോർക്ക് സിറ്റിയുടെ ആദ്യ ഇന്ത്യൻ-അമേരിക്കൻ മേയർ എന്ന നിലയിൽ ഇത്തവണ ഫ്ലോറൽ പാർക്കിലെ ക്വീൻസ് ഇന്ത്യാ ഡേ പരേഡിൽ വീണ്ടും പങ്കെടുക്കാൻ കഴിഞ്ഞു. ഈ അനുഭവം ഒരിക്കലും മറക്കാനാകില്ല,” എന്ന് മംദാനി എക്സിൽ കുറിച്ചു. ന്യൂയോർക്ക് നഗരത്തിലെ വൈവിധ്യമാർന്ന ഇന്ത്യൻ പ്രവാസി സമൂഹത്തെക്കുറിച്ചും അദ്ദേഹം സംസാരിച്ചു. വിവിധ മതവിഭാഗങ്ങളിൽപ്പെട്ടവർ ഒരുമിച്ചാണ് ആഘോഷത്തിൽ പങ്കെടുത്തതെന്നും അദ്ദേഹം പറഞ്ഞു.
മുൻ മേയർ ഡേവിഡ് ഡിങ്കിൻസ് ഒരിക്കൽ നമ്മുടെ നഗരത്തെ മനോഹരമായൊരു മൊസൈക്കിനോട് ഉപമിച്ചിരുന്നു. ഇന്ന് ആ മൊസൈക്ക് ഞാൻ കണ്ടു. ഇന്ത്യൻ പ്രവാസി സമൂഹത്തിലെ ഹിന്ദുക്കളും ക്രിസ്ത്യാനികളും മുസ്ലിംകളും ജൈനരും ബുദ്ധമതക്കാരും സിഖുകാരും ചേർന്നാണ് നമ്മുടെ നഗരത്തെ ഇന്നത്തെ നിലയിലേക്ക് വളർത്തിയത് എന്ന് മംദാനി പറഞ്ഞു. നിങ്ങളോടൊപ്പം ഈ പ്രവർത്തനങ്ങളിൽ പങ്കാളിയാകാൻ കഴിയുന്നത് വലിയ ബഹുമതിയാണ്. എല്ലാവർക്കും ഇന്ത്യൻ സ്വാതന്ത്ര്യദിനാശംസകൾ,” എന്നും അദ്ദേഹം കൂട്ടിച്ചേർത്തു.
അമേരിക്കയുടെ 250-ാം വാർഷികവും ഇന്ത്യയുടെ 80-ാം സ്വാതന്ത്ര്യദിനവും ഒരുമിച്ച് ആഘോഷിക്കുന്നതിന്റെ ഭാഗമായി അയൽ സംസ്ഥാനമായ ന്യൂജേഴ്സിയിലെ പാർസിപ്പനിയിലെ വെറ്ററൻസ് മെമ്മോറിയൽ പാർക്കിൽ 1,300ലേറെ യുഎസ് പതാകകൾ ഉപയോഗിച്ച് “250” എന്ന സംഖ്യ രൂപപ്പെടുത്തി. ഏറ്റവും വലിയ ഫ്ലാഗ്പോൾ നമ്പർ എന്ന വിഭാഗത്തിൽ ഈ ക്രമീകരണം ഗിന്നസ് വേൾഡ് റെക്കോർഡ് നേടിയതായി ന്യൂയോർക്കിലെ ഇന്ത്യൻ കോൺസുലേറ്റ് അറിയിച്ചു. ന്യൂയോർക്കിലെ ഫെഡറേഷൻ ഓഫ് ഇന്ത്യൻ അസോസിയേഷൻസ് NY-NJ-NE (FIA)യുമായി സഹകരിച്ചാണ് ഇന്ത്യൻ കോൺസുലേറ്റ് പരിപാടി സംഘടിപ്പിച്ചത്. ഇന്ത്യൻ ടെക്നോളജി കമ്പനിയായ സോഹോയും പരിപാടിക്ക് പിന്തുണ നൽകി.
ന്യൂയോർക്കിലെ ഇന്ത്യൻ കോൺസൽ ജനറൽ ബിനയ ശ്രീകാന്ത പ്രധാൻ, ന്യൂജേഴ്സി ലെഫ്റ്റനന്റ് ഗവർണർ ഡെയ്ൽ കാൾഡ്വെൽ, യുഎസ് കോൺഗ്രസ് അംഗം അനലീലിയ മെഹിയ, പാർസിപ്പനി മേയർ പുൽക്കിത് ദേശായി എന്നിവർ ന്യൂജേഴ്സിയിലെ പരിപാടിയിൽ പങ്കെടുത്തു. ന്യൂയോർക്കിലെ ഇന്ത്യൻ കോൺസുലേറ്റും ഐക്യരാഷ്ട്രസഭയിലെ ഇന്ത്യയുടെ സ്ഥിരം ദൗത്യവും ദേശീയപതാക ഉയർത്തൽ ചടങ്ങുകൾ സംഘടിപ്പിച്ചു. FIAയുടെ വാർഷിക ആഘോഷത്തിന്റെ ഭാഗമായി ടൈംസ് സ്ക്വയറിലും ഇന്ത്യൻ ത്രിവർണം ഉയർത്തി. സാംസ്കാരിക പരിപാടികളും ഇതിനോടനുബന്ധിച്ച് നടന്നു.
India Day Parade: Zohran Mamdani attends as first Indian American mayor of New York
