വാഷിംഗ്ടൺ: ജൂത സംഘടനകൾക്കും മിഷിഗൺ സർവകലാശാലാ അധികൃതർക്കും ഇസ്രായേലുമായി ബന്ധമുണ്ടെന്ന് കരുതപ്പെടുന്ന സ്ഥാപനങ്ങൾക്കും നേരെ ഭീഷണികളും അതിക്രമങ്ങളും അഴിച്ചുവിട്ട കേസിൽ ഇന്ത്യൻ വംശജയായ യുവതിയടക്കം നാല് പേർക്ക് കൂടി ഫെഡറൽ കുറ്റപത്രം. ഇരുപത്തിമൂന്നുകാരിയായ സൃഷ്ടി തരണ ശർമ്മ ഉൾപ്പെടെയുള്ളവർക്കെതിരെയാണ് യുഎസ് അറ്റോർണി ജെറോം എഫ്. ഗോർഗൻ ജൂനിയർ പുതിയ കുറ്റങ്ങൾ ചുമത്തിയത്. ഇതോടെ ഈ കേസിൽ പ്രതിചേർക്കപ്പെട്ടവരുടെ ആകെ എണ്ണം പന്ത്രണ്ടായി ഉയർന്നു.
ഹെൻറി ഡേവിഡ് മക്കെൻ-ഷാപിറോ (23), ആരോൺ ഹണ്ടർ വോൺബാർഗൻ (25), ജോസഫ് മാർക്ക് ഫിഷർ (23) എന്നിവരാണ് കുറ്റപത്രം ചുമത്തപ്പെട്ട മറ്റ് മൂന്ന് പേർ. പുതിയ പ്രതികളിൽ രണ്ടുപേരെ കഴിഞ്ഞ ആഴ്ച അറസ്റ്റ് ചെയ്തിട്ടുണ്ടെന്നും, സൃഷ്ടി ശർമ്മ ഉൾപ്പെടെയുള്ള മറ്റ് രണ്ട് പേർക്കായി അന്വേഷണം തുടരുകയാണെന്നും യു.എസ് അറ്റോർണി ഓഫീസ് അറിയിച്ചു.
ഡിട്രോയിറ്റിലെ ജൂത ഫെഡറേഷൻ, മിഷിഗൺ സർവകലാശാലാ നേതൃത്വം, നിയമപാലകർ, ഇസ്രായേലുമായി ബന്ധമുള്ള ബിസിനസുകൾ എന്നിവരെ ഭയപ്പെടുത്താനും സമ്മർദ്ദത്തിലാക്കാനും പ്രതികൾ ഗൂഢാലോചന നടത്തിയെന്നാണ് ഫെഡറൽ അന്വേഷണ സംഘത്തിന്റെ കണ്ടെത്തൽ. 2023 ഒക്ടോബറിലെ ഹമാസ് ആക്രമണത്തിന് ശേഷം, സർവകലാശാലകളും സ്വകാര്യ സ്ഥാപനങ്ങളും ഇസ്രായേലമായുള്ള ബന്ധങ്ങൾ വിച്ഛേദിക്കാൻ സമ്മർദ്ദം ചെലുത്തുകയായിരുന്നു ഇവരുടെ ലക്ഷ്യമെന്ന് കുറ്റപത്രത്തിൽ വ്യക്തമാക്കുന്നു.
ആവശ്യങ്ങൾ അംഗീകരിച്ചില്ലെങ്കിൽ കൂടുതൽ അക്രമങ്ങളും ഭീഷണികളും ഉണ്ടാകുമെന്ന് സംഘം മുന്നറിയിപ്പ് നൽകിയിരുന്നു. എൻക്രിപ്റ്റ് ചെയ്ത സന്ദേശമയയ്‌ക്കൽ ആപ്പുകളും സാമൂഹിക മാധ്യമങ്ങളും ഉപയോഗിച്ചാണ് ഇവർ ലക്ഷ്യങ്ങൾ കണ്ടെത്തുകയും പദ്ധതികൾ ഏകോപിപ്പിക്കുകയും ചെയ്തിരുന്നത്. വീടുകൾക്ക് നേരെ ചുവപ്പ് നിറത്തിലുള്ള പെയിന്റ് ഉപയോഗിച്ച് ഭീഷണികൾ എഴുതുക, ജനലുകൾ തകർക്കുക, അസുഖകരമായ രാസവസ്തുക്കൾ അടങ്ങിയ ഗ്ലാസ് ജാറുകൾ വീടുകളിലേക്ക് എറിയുക തുടങ്ങിയ അക്രമങ്ങളാണ് ഇവർ നടത്തിയിരുന്നത്.
ഈ അതിക്രമങ്ങളുടെ ചിത്രങ്ങൾ സാമൂഹിക മാധ്യമങ്ങളിൽ പങ്കുവെച്ച് ഭീഷണിപ്പെടുത്തുന്ന രീതിയും ഇവർ തുടർന്നു. ഇസ്രായേലിനെ പിന്തുണയ്ക്കുന്ന സമൂഹത്തിലെ മറ്റ് അംഗങ്ങൾക്ക് മുന്നറിയിപ്പ് നൽകുക എന്ന ലക്ഷ്യത്തോടെയാണ് ഇത്തരം പോസ്റ്റുകൾ പ്രചരിപ്പിച്ചത്. മിഷിഗൺ സർവകലാശാലാ ഉദ്യോഗസ്ഥർ, പോലീസ് ലഫ്റ്റനന്റ്, ഒരു വിദ്യാർത്ഥി, ഇസ്രായേലുമായി ബന്ധമുള്ള രണ്ട് ബിസിനസുകൾ എന്നിവരാണ് പ്രധാനമായും ലക്ഷ്യം വെക്കപ്പെട്ടത്.
ജൂത സമൂഹത്തിനും പൊതുപ്രവർത്തകർക്കും നേരെ നടക്കുന്ന ഇത്തരം ഭീഷണികൾ ഒരിക്കലും അംഗീകരിക്കാനാകില്ലെന്ന് യു.എസ് അറ്റോർണി ജെറോം എഫ്. ഗോർഗൻ വ്യക്തമാക്കി. സമൂഹത്തിൽ ഭീതി പരത്താൻ ശ്രമിക്കുന്ന ആർക്കും നിയമപരമായ ശിക്ഷയിൽ നിന്ന് രക്ഷപ്പെടാൻ കഴിയില്ലെന്ന് എഫ്.ബി.ഐ ഡെട്രോയിറ്റ് സ്പെഷ്യൽ ഏജന്റ് ജെന്നിഫർ റുന്യാൻ മുന്നറിയിപ്പ് നൽകി.
