മോസ്കോ: മോസ്കോയിലെ പ്രശസ്തമായ മ്യൂസിയത്തിൽ ഭീകരാക്രമണത്തിന് പദ്ധതിയിട്ട പ്രായപൂർത്തിയാകാത്ത റഷ്യൻ പൗരനെ റഷ്യൻ സുരക്ഷാ ഏജൻസിയായ എഫ്.എസ്.ബി അറസ്റ്റ് ചെയ്തു. യു.എസ് നൽകിയ രഹസ്യ വിവരത്തിന്റെ അടിസ്ഥാനത്തിലാണ് അറസ്റ്റെന്ന് റഷ്യൻ സുരക്ഷാ ഏജൻസി ഞായറാഴ്ച ഔദ്യോഗികമായി അറിയിച്ചു. യു.എസ് നൽകിയ വിവരങ്ങൾക്ക് അമേരിക്കൻ പക്ഷത്തോട് നന്ദി അറിയിക്കുന്നതായും എഫ്.എസ്.ബി വ്യക്തമാക്കി.
മോസ്കോയിലെ ‘ത്സാരിത്സിനോ മ്യൂസിയം റിസർവിൽ’ (Tsaritsyno Museum Reserve) വൻ തോതിൽ ആളുകൾ കൊല്ലപ്പെടുന്ന തരത്തിലുള്ള ഭീകരാക്രമണത്തിന് സാധ്യതയുണ്ടെന്ന് കാണിച്ച് മോസ്കോയിലെ യു.എസ് എംബസി ശനിയാഴ്ച സുരക്ഷാ മുന്നറിയിപ്പ് പുറത്തിറക്കിയിരുന്നു. ഇതിന് പിന്നാലെയാണ് അറസ്റ്റ്. മുന്നറിയിപ്പിനെ തുടർന്ന് മ്യൂസിയത്തിൽ നടക്കേണ്ടിയിരുന്ന ചില പരിപാടികൾ റദ്ദാക്കുകയും സുരക്ഷാ ക്രമീകരണങ്ങൾ ശക്തമാക്കുകയും ചെയ്തതായി റഷ്യൻ മാധ്യമങ്ങൾ റിപ്പോർട്ട് ചെയ്തു.
ടാക്റ്റിക്കൽ വേഷധാരണത്തോടുകൂടിയും ഓട്ടോമാറ്റിക് ആയുധത്തിന് സമാനമായ വസ്തുവുമാണ്ടിയുള്ള ചിത്രങ്ങൾ പ്രായപൂർത്തിയാകാത്ത പ്രതി ടിക്‌ടോക്കിൽ പോസ്റ്റ് ചെയ്തിരുന്നതായി എഫ്.എസ്.ബി വെളിപ്പെടുത്തി. ത്സാരിത്സിനോ മ്യൂസിയത്തിൽ നിന്ന് എടുത്ത ചിത്രങ്ങൾ “ഞാൻ ഒരു സ്ഥലം കണ്ടെത്തിയിരിക്കുന്നു” എന്ന അടിക്കുപ്പിയോടെ ഇയാൾ പങ്കുവെച്ചിരുന്നു. ടെലിഗ്രാമിലെ ഒരു നീയോ-നാസി ചാനലിൽ അംഗമായിരുന്ന പ്രതി, മുൻകാല ഭീകരാക്രമണങ്ങളെക്കുറിച്ചും കൂട്ടക്കൊലകളെക്കുറിച്ചും വലിയ തോതിൽ ഇന്റർനെറ്റിൽ തിരഞ്ഞിരുന്നതായും അന്വേഷണത്തിൽ കണ്ടെത്തിയിട്ടുണ്ട്. ഇയാളുടെ വീട്ടിൽ നിന്ന് എയർസോഫ്റ്റ് ആയുധങ്ങളും പിടിച്ചെടുത്തിട്ടുണ്ട്.
മറ്റ് രാജ്യങ്ങൾക്ക് സുരക്ഷാ മുന്നറിയിപ്പുകൾ നൽകുന്നത് യു.എസിനെ സംബന്ധിച്ചിടത്തോളം പുതിയ കാര്യമല്ല. എന്നാൽ മുൻകാലങ്ങളിൽ യു.എസ് നൽകിയ ഇത്തരം മുന്നറിയിപ്പുകളെ റഷ്യ എല്ലായ്പ്പോഴും അനുകൂലമായി സ്വീകരിച്ചിരുന്നില്ല. 2024 മാർച്ചിൽ മോസ്കോയിലുണ്ടായ ഭീകരാക്രമണത്തെക്കുറിച്ച് യു.എസ് മുന്നറിയിപ്പ് നൽകിയിരുന്നെങ്കിലും, പ്രസിഡന്റ് വ്‌ളാഡിമിർ പുടിൻ അത് തള്ളിക്കളയുകയാണുണ്ടായത്. എന്നാൽ ഡോണൾഡ് ട്രംപിന്റെ ആദ്യ പ്രസിഡൻസി കാലത്ത് (2017) സെന്റ് പീറ്റേഴ്‌സ്ബർഗിലെ കസാൻ കത്തീഡ്രലിൽ നടക്കാനിരുന്ന ആക്രമണത്തെക്കുറിച്ച് യു.എസ് നൽകിയ മുന്നറിയിപ്പിന് പുടിൻ നേരിട്ട് നന്ദി അറിയിച്ചിരുന്നു. ട്രംപ് ഭരണകൂടവുമായുള്ള റഷ്യയുടെ ബന്ധം പുതിയ വഴിത്തിരിവിലേക്ക് നീങ്ങുന്നതിനിടയിലാണ് യു.എസിന്റെ വിവരങ്ങളുടെ അടിസ്ഥാനത്തിലുള്ള ഈ പുതിയ അറസ്റ്റും റഷ്യയുടെ നന്ദിപ്രകടനവും പുറത്തുവന്നിരിക്കുന്നത്.
