ടെഹ്‌റാൻ: ഹോർമുസ് കടലിടുക്കിലെ പ്രധാന ചരക്കുനീക്ക പാതകൾ സുരക്ഷിതമാണെന്ന യുഎസ് സെൻട്രൽ കമാൻഡ് മേധാവി അഡ്മിറൽ ബ്രാഡ് കൂപ്പറുടെ വാദങ്ങൾ തള്ളി ഇറാൻ സർക്കാരിന്റെ ഉടമസ്ഥതയിലുള്ള ഐ.ആർ.ഐ.ബി വാർത്താവിഭാഗം. കഴിഞ്ഞ ഒമ്പത് ദിവസത്തിനിടെ ഹോർമുസ് കടലിടുക്കിൽ 11 എണ്ണക്കപ്പലുകൾക്ക് തീപിടിച്ചതായാണ് ഐ.ആർ.ഐ.ബി എക്സ് (ട്വിറ്റർ) പോസ്റ്റിലൂടെ അവകാശപ്പെട്ടത്.
കഴിഞ്ഞ ഒക്ടോബർ 25 മുതൽ ഇത്തരത്തിൽ 11 കപ്പലുകൾക്ക് തീപിടിച്ചിട്ടുണ്ടെന്നാണ് ഇറാൻ മാധ്യമത്തിന്റെ റിപ്പോർട്ട്. അഡ്മിറൽ ബ്രാഡ് കൂപ്പർ ഈ പ്രദേശത്ത് വ്യോമനിരീക്ഷണം നടത്തിയ ദിവസമാണ് ഇതെന്നും ഐ.ആർ.ഐ.ബി ചൂണ്ടിക്കാണിക്കുന്നു. എന്നാൽ ഈ അവകാശവാദങ്ങൾക്ക് തെളിവുകളൊന്നും നിരത്തിയിട്ടില്ലെങ്കിലും, ചില കപ്പലുകൾ കടലിന്റെ അടിത്തട്ടിലേക്ക് മുങ്ങിപ്പോയതായും അവർ ആരോപിച്ചു.
കഴിഞ്ഞ ഫെബ്രുവരിയിൽ യുദ്ധം ആരംഭിച്ചതുമുതൽ ഹോർമുസ് കടലിടുക്കിലൂടെയുള്ള കപ്പലുകളെ ഇറാൻ ലക്ഷ്യമിടുന്നുണ്ട്. ലോകത്തിന്റെ ക്രൂഡ് ഓയിൽ വിതരണത്തിന്റെ അഞ്ചിലൊന്ന് ഭാഗവും കടന്നുപോകുന്ന ഈ ഇടുങ്ങിയ ജലപാതയുടെ നിയന്ത്രണം പിടിച്ചെടുക്കാനുള്ള ശ്രമങ്ങളുടെ ഭാഗമാണിത്. കടലിടുക്കിൽ ഇറാൻ നാവികസേനയുടെ കപ്പലുകളൊന്നും കണ്ടിട്ടില്ലെന്നായിരുന്നു ബ്രാഡ് കൂപ്പർ കഴിഞ്ഞയാഴ്ച വീഡിയോ പ്രസ്താവനയിൽ അവകാശപ്പെട്ടിരുന്നത്.
എന്നാൽ ഒക്ടോബർ മാസത്തിൽ മാത്രം വാണിജ്യ കപ്പലുകൾക്ക് നേരെ 30 ആക്രമണങ്ങൾ നടന്നതായി യുകെ നാവികസേനയുടെ മാരിടൈം ട്രേഡ് ഓപ്പറേഷൻസ് സെന്റർ കഴിഞ്ഞ വെള്ളിയാഴ്ച വ്യക്തമാക്കിയിരുന്നു. ഇറാന്റെ നാവികസേന പൂർണ്ണമായും തകർക്കപ്പെട്ടുവെന്നും തെക്കൻ കപ്പൽ പാതകൾ സുരക്ഷിതമാണെന്നും യു.എസും പ്രസിഡന്റ് ട്രംപും ആവർത്തിച്ച് അവകാശപ്പെടുന്നുണ്ടെങ്കിലും, ഇറാന്റെ തുടർച്ചയായ ഭീഷണികളും ആക്രമണങ്ങളും ആഗോള ഇന്ധനവിലയിലും കപ്പൽ കമ്പനികളിലും വലിയ ആശങ്കയാണ് സൃഷ്ടിക്കുന്നത്.
