ടെഹ്റാൻ: തങ്ങളുടെ എണ്ണ അടിസ്ഥാന സൗകര്യങ്ങൾക്ക് നേരെ അമേരിക്ക നടത്തുന്ന ഭീഷണികൾ മിഡിൽ ഈസ്റ്റ് മേഖലയിലെ മുഴുവൻ എണ്ണ-വാതക കയറ്റുമതിയെയും അപകടത്തിലാക്കുമെന്ന് ഇറാന്റെ പരമോന്നത സംയുക്ത സൈനിക കമാൻഡായ ഖാത്തം അൽ-അൻബിയ സെൻട്രൽ ഹെഡ്ക്വാർട്ടേഴ്സ് മുന്നറിയിപ്പ് നൽകി. ഇറാനിലെ ഔദ്യോഗിക മാധ്യമമായ ഐആർഐബി വഴിയാണ് സൈനിക കമാൻഡ് ഈ നിലപാട് വ്യക്തമാക്കിയത്.
പുതിയ സാഹചര്യത്തിൽ ഒന്നുകിൽ ഈ മേഖലയിൽ നിന്ന് എല്ലാവർക്കും എണ്ണയും വാതകവും കയറ്റുമതി ചെയ്യാൻ സാധിക്കും, അല്ലെങ്കിൽ ആർക്കും അതിന് കഴിയില്ലെന്ന കടുത്ത നിലപാടാണ് ഇറാൻ സൈന്യം ഔദ്യോഗികമായി പ്രഖ്യാപിച്ചിരിക്കുന്നത്. അതിവിദൂരമല്ലാത്ത ഭാവിയിൽ ഇറാൻ്റെ എണ്ണ-വാതക വിപണികളുടെ പൂർണ്ണ നിയന്ത്രണം അമേരിക്ക ഏറ്റെടുക്കുമെന്ന് യുഎസ് പ്രസിഡന്റ് ഡോണൾഡ് ട്രംപ് സമൂഹമാധ്യമത്തിലൂടെ വ്യക്തമാക്കിയതിന് പിന്നാലെയാണ് ഇറാന്റെ ഈ തന്ത്രപരമായ പ്രതികരണം.
അമേരിക്കയുടെ ഏതൊരു നീക്കവും ഗൾഫ് മേഖലയിലെ മറ്റ് രാജ്യങ്ങളുടെയും എണ്ണ വിതരണത്തെ ബാധിക്കുന്ന തരത്തിലുള്ള വലിയ സൈനിക പ്രതിസന്ധിക്ക് കാരണമാകുമെന്ന സൂചനയാണ് ഇറാന്റെ ഈ പ്രസ്താവന നൽകുന്നത്. ആഗോള ഊർജ്ജ വിപണിയെ തന്നെ നിശ്ചലമാക്കാൻ പോന്ന പ്രത്യാഘാതങ്ങൾ ഈ തർക്കം മൂലം ഉണ്ടായേക്കാമെന്നാണ് അന്താരാഷ്ട്ര നിരീക്ഷകർ വിലയിരുത്തുന്നത്.
