വാഷിംഗ്ടൺ: ഇറാനുമായുള്ള സമാധാന ചർച്ചകൾ അതീവ സങ്കീർണ്ണമായിരിക്കുമെന്നും അന്തിമ തീരുമാനത്തിലെത്താൻ സമയമെടുക്കുമെന്നും യുഎസ് വൈസ് പ്രസിഡൻ്റ് ജെഡി വാൻസ്. അമേരിക്കയുമായി യാതൊരുവിധ ചർച്ചകളും നടക്കുന്നില്ലെന്ന് ഇറാൻ ഔദ്യോഗികമായി വ്യക്തമാക്കിയതിന് തൊട്ടുപിന്നാലെയാണ് വാൻസിൻ്റെ ഈ പ്രതികരണം.
ഇറാനികൾ കൈകാര്യം ചെയ്യാൻ ഏറെ ബുദ്ധിമുട്ടുള്ളവരാണെന്നും ഭിന്നിച്ചു നിൽക്കുന്ന ഒരു ഭരണസംവിധാനമാണ് അവിടെയുള്ളതെന്നും ഫോക്സ് ന്യൂസിന് നൽകിയ അഭിമുഖത്തിൽ യുഎസ് വൈസ് പ്രസിഡൻ്റ് കുറ്റപ്പെടുത്തി. ഈ പ്രതിസന്ധികളെ മറികടന്ന് അമേരിക്കൻ ജനതയ്ക്കും രാജ്യത്തിൻ്റെ പ്രസിഡൻ്റിനും അനുകൂലമായ മികച്ച ഫലം ഉണ്ടാക്കിയെടുക്കുകയാണ് തങ്ങളുടെ ലക്ഷ്യമെന്നും അദ്ദേഹം കൂട്ടിച്ചേർത്തു.
ചർച്ചകൾ കടുപ്പമേറിയതാണെങ്കിലും വരുംദിവസങ്ങളിൽ ആഗോള വിപണിയിൽ എണ്ണവില ഗണ്യമായി കുറയുമെന്നും അത് കുറഞ്ഞ നിലയിൽ തന്നെ തുടരുമെന്നും വാൻസ് പ്രത്യാശ പ്രകടിപ്പിച്ചു. ഇറാൻ്റെ ആണവ മോഹങ്ങളെ പൂർണ്ണമായി തടയുമെന്നും, വരും നാളുകളിൽ യുണൈറ്റഡ് സ്റ്റേറ്റ്സ് കൂടുതൽ ശക്തമായ നിലയിലാകുമെന്നും അദ്ദേഹം വ്യക്തമാക്കി. പ്രക്രിയകൾ ഇപ്പോഴും പ്രാരംഭ ഘട്ടത്തിലാണെന്നും, ചർച്ചകളുടെ അന്തിമഫലം എന്താകുമെന്ന് ഇപ്പോൾ തന്നെ മുൻകൂട്ടി പ്രവചിക്കാൻ കഴിയില്ലെന്നും വാൻസ് ഓർമ്മിപ്പിച്ചു.
അതേസമയം, അമേരിക്കയുമായി മുൻപ് ഒപ്പുവെച്ച ധാരണാപത്രം നടപ്പിലാക്കുന്നതുമായി മുന്നോട്ട് പോകണോ എന്ന കാര്യത്തിൽ രാജ്യം ഇതുവരെ അന്തിമ തീരുമാനം എടുത്തിട്ടില്ലെന്ന് ഇറാൻ്റെ ഡെപ്യൂട്ടി വിദേശകാര്യ മന്ത്രി കാസെം ഗരീബാബാദി വ്യക്തമാക്കി.
Iran’s nuclear ambitions will be stopped, talks are complicated but there is hope for the US: JD Vance
