ഫ്ലൈദുബായ് വിമാനത്തിൽ ക്യാപ്റ്റനെ ആക്രമിച്ചെന്ന കേസിൽ പ്രതിയായ ഒമാൻ സ്വദേശിയായ സഹപൈലറ്റ് വിമാനം ഇസ്രയേലിലെ വിമാനത്താവളത്തിൽ ഇടിച്ചിറക്കാൻ പദ്ധതിയിട്ടിരുന്നതായി റിപ്പോർട്ട്. ടെൽ അവീവിലേക്ക് വിമാനം പറത്തിയശേഷം ബെൻ ഗുരിയോൺ വിമാനത്താവളത്തിലെ കെട്ടിടത്തിലോ മറ്റൊരു വിമാനത്തിലോ ഇടിച്ചിറക്കാനായിരുന്നു പദ്ധതിയെന്ന് ഹമാം അൽ ഹമ്മാമി അന്വേഷണ ഉദ്യോഗസ്ഥരോട് പറഞ്ഞതായി ഇസ്രയേൽ മാധ്യമങ്ങളായ ചാനൽ 13, ന്യൂസ് 24 എന്നിവ റിപ്പോർട്ട് ചെയ്തു.
കോക്പിറ്റിനുള്ളിൽവച്ച് ക്യാപ്റ്റൻ സ്മിത് മച്ച്ഛറിനെ കൊലപ്പെടുത്തിയശേഷം വിമാനത്തിന്റെ നിയന്ത്രണം ഏറ്റെടുക്കാനും പദ്ധതിയിട്ടിരുന്നതായി പ്രതി മൊഴി നൽകിയെന്നാണ് റിപ്പോർട്ട്. ഫ്ലൈദുബായിൽ ജോലിയിൽ പ്രവേശിക്കുന്നതിനു മുമ്പുതന്നെ ആക്രമണത്തിന് പദ്ധതിയിട്ടിരുന്നതായും ഇസ്രയേലിലേക്ക് സർവീസ് നടത്തുന്ന വിമാനക്കമ്പനിയെന്ന നിലയിലാണ് ഫ്ലൈദുബായിയെ തിരഞ്ഞെടുത്തതെന്നും ചാനൽ 13 റിപ്പോർട്ട് ചെയ്തു.
“ടെൽ അവീവിലേക്ക് സർവീസ് നടത്തുന്ന വിമാനക്കമ്പനി ഏതാണെന്ന് അന്വേഷിച്ചു. അതുകൊണ്ടാണ് ഫ്ലൈദുബായിയെ തിരഞ്ഞെടുത്തത്. ജോലിയിൽ പ്രവേശിക്കുന്നതിനു മുമ്പുതന്നെ പദ്ധതി തയ്യാറാക്കിയിരുന്നു,” അൽ ഹമ്മാമി പറഞ്ഞതായി റിപ്പോർട്ടിൽ പറയുന്നു.
ഇസ്രയേലിലേക്കുള്ള മുൻ യാത്രകൾ വിവരങ്ങൾ ശേഖരിക്കാനും ആക്രമണപദ്ധതി തയ്യാറാക്കാനും ഉപയോഗിച്ചിരുന്നതായും പ്രതി അന്വേഷണ ഉദ്യോഗസ്ഥരോട് വെളിപ്പെടുത്തിയെന്നാണ് വിവരം. ജൂലൈയിൽ ആക്രമണം നടത്താനായിരുന്നു ആദ്യം പദ്ധതിയിട്ടിരുന്നത്. എന്നാൽ വിമാനത്തിലെ ജീവനക്കാരിലൊരാളുമായി സൗഹൃദത്തിലായതോടെ പദ്ധതി മാറ്റി. ഇസ്രയേലിലെത്താൻ കഴിയാത്ത സാഹചര്യമുണ്ടായാൽ ജോർദാനിലെ യുഎസ് സൈനിക താവളത്തിൽ വിമാനം ഇടിച്ചിറക്കാനും പദ്ധതിയിട്ടിരുന്നതായി റിപ്പോർട്ടുകളുണ്ട്.
ആക്രമണത്തിനിടെ വിമാനത്തിന്റെ നിയന്ത്രണ സംവിധാനങ്ങളിൽ ഇടപെട്ട പ്രതി എൻജിനുകൾ ഓഫ് ചെയ്യുകയും റഡറുകൾ മുന്നോട്ടു തള്ളുകയും ചെയ്തതായി ഇറ്റാലിയൻ പത്രമായ കൊറിയേരെ ഡെല്ല സെറ റിപ്പോർട്ട് ചെയ്തു. ഇതോടെ ഒരു മിനിറ്റിനുള്ളിൽ വിമാനം 16,000 അടി താഴേക്ക് പതിക്കുകയും ശബ്ദവേഗത്തോട് അടുത്ത വേഗത്തിലെത്തുകയും ചെയ്തെന്നാണ് റിപ്പോർട്ട്.
ജോർദാന് മുകളിലൂടെ പറക്കുന്നതിനിടെയാണ് അൽ ഹമ്മാമി ക്യാപ്റ്റൻ സ്മിത് മച്ച്ഛറിനെ ആക്രമിച്ചത്. പരുക്കേറ്റിട്ടും കോക്പിറ്റിന്റെ വാതിൽ തുറക്കാൻ ക്യാപ്റ്റന് കഴിഞ്ഞു. തുടർന്ന് കോക്പിറ്റിലെത്തിയ യാത്രക്കാർ പ്രതിയെ കീഴടക്കുകയും വിമാനത്തിന്റെ നിയന്ത്രണം വീണ്ടെടുക്കാൻ സഹായിക്കുകയും ചെയ്തു. ഡ്യൂട്ടിയിലില്ലാതിരുന്ന രണ്ട് പൈലറ്റുമാർ വിമാനം സൗദി അറേബ്യയിൽ സുരക്ഷിതമായി ഇറക്കി.
2015 മുതൽ 2017 വരെ മെൽബണിൽ എൻജിനീയറിങ് പഠിച്ചിരുന്നുവെന്ന റിപ്പോർട്ടുകൾ പുറത്തുവന്നതോടെ വിവിധ ഏജൻസികൾ സംയുക്ത അന്വേഷണം ആരംഭിച്ചിട്ടുണ്ട്. ഓസ്‌ട്രേലിയയിൽ താമസിച്ചിരുന്ന കാലത്ത് പ്രതി തീവ്രവാദ ആശയങ്ങളിലേക്ക് ആകർഷിക്കപ്പെട്ടിരുന്നോയെന്നാണ് അന്വേഷണസംഘം പരിശോധിക്കുന്നത്. പ്രതിയുടെ പശ്ചാത്തലം ഓസ്‌ട്രേലിയയിലെ ഭീകരവിരുദ്ധ അന്വേഷണ ഏജൻസികളും പരിശോധിക്കുന്നതായാണ് വിവരം.
തീവ്രവാദ നിലപാടുകളെക്കുറിച്ചുള്ള ആശങ്കകളെത്തുടർന്ന് ഒമാൻ അൽ ഹമ്മാമിക്ക് വിമാനം പറത്തുന്നതിന് വിലക്കേർപ്പെടുത്തിയിരുന്നുവെന്നും റിപ്പോർട്ടുകളുണ്ട്. ഇങ്ങനെയൊരു സാഹചര്യത്തിൽ ഇസ്രയേലിലേക്ക് യാത്രക്കാരുമായി പോകുന്ന വിമാനം പറത്താൻ ഇയാൾക്ക് എങ്ങനെ അനുമതി ലഭിച്ചുവെന്ന കാര്യത്തിൽ വ്യക്തതയില്ല. സംഭവത്തിന്റെ പശ്ചാത്തലത്തിൽ ഇസ്രയേലിലേക്കുള്ള അന്താരാഷ്ട്ര വിമാന സർവീസുകളുടെ സുരക്ഷാ ക്രമീകരണങ്ങൾ പുനഃപരിശോധിക്കാൻ പ്രധാനമന്ത്രി ബെഞ്ചമിൻ നെതന്യാഹു നിർദേശം നൽകിയിട്ടുണ്ട്.
Omani co-pilot joined flydubai for its Israel routes; planned to kill Indian captain in cockpit, crash flight into Ben Gurion airport
