നാഷ്‌വിൽ (ടെന്നസി): വധശിക്ഷ നടപ്പാക്കാനുള്ള ശ്രമം പരാജയപ്പെട്ടതിനെ തുടർന്ന് അമേരിക്കയിലെ കുപ്രസിദ്ധ കൊലക്കേസ് പ്രതി ക്രിസ്റ്റാ പൈക്ക് (50) അതീവ ഗുരുതരാവസ്ഥയിൽ ആശുപത്രിയിൽ. ഇവർ വെന്റിലേറ്ററിലാണെന്നും ആരോഗ്യസ്ഥിതിയിൽ എപ്പോൾ പുരോഗതിയുണ്ടാകുമെന്ന് വ്യക്തമല്ലെന്നും അഭിഭാഷകൻ സ്റ്റീഫൻ ഫെറെൽ മാധ്യമങ്ങളോട് പറഞ്ഞു.
കഴിഞ്ഞ ബുധനാഴ്ച രണ്ട് തവണയാണ് ക്രിസ്റ്റാ പൈക്കിന്റെ വധശിക്ഷ നടപ്പാക്കാൻ ശ്രമിച്ചത്. ഇതിനായി ശരീരത്തിൽ കുത്തിവെച്ച മാരകമായ മരുന്നിന്റെ രണ്ട് ഡോസുകൾ ശരീരത്തിൽ നിന്ന് പുറന്തള്ളാനുള്ള ശ്രമത്തിലാണ് ഡോക്ടർമാർ. നിലവിൽ ബോധം തിരിച്ചുകിട്ടിയിട്ടില്ലാത്ത ഇവരുടെ ആന്തരികാവയവങ്ങളുടെ പ്രവർത്തനം സാധാരണ നിലയിലാകാൻ ദിവസങ്ങളെടുക്കുമെന്നാണ് റിപ്പോർട്ട്.
അമേരിക്കയിലെ ടെന്നസിയിൽ കഴിഞ്ഞ ബുധനാഴ്ചയായിരുന്നു വധശിക്ഷ നിശ്ചയിച്ചിരുന്നത്. എന്നാൽ വിഷം കുത്തിവെച്ച് മരണം ഉറപ്പാക്കുന്ന പ്രക്രിയയ്ക്കിടെ കാര്യങ്ങൾ കൈവിട്ടുപോവുകയായിരുന്നു. രക്തം കട്ടപിടിക്കുന്ന രോഗമുള്ളതിനാലും ഞരമ്പുകൾ ചെറുതായതിനാലും ഈ രീതി പൈക്കിന് കഠിനമായ വേദനയും പീഡനവും ഉണ്ടാക്കുമെന്ന് അഭിഭാഷകർ നേരത്തെ മുന്നറിയിപ്പ് നൽകിയിരുന്നു. വധശിക്ഷ പരാജയപ്പെടാനുണ്ടായ കാരണം വ്യക്തമാക്കാൻ ജയിൽ അധികൃതർ ഇതുവരെ തയ്യാറായിട്ടില്ല.
സംഭവം വിവാദമായതോടെ ടെന്നസി ഗവർണർ ബിൽ ലീ ഈ വർഷത്തെ ബാക്കി വധശിക്ഷകളെല്ലാം താൽക്കാലികമായി നിർത്തിവെച്ചു. പരാജയത്തിന്റെ ഉത്തരവാദിത്തം ഏറ്റെടുത്ത് സംസ്ഥാനത്തെ ജയിൽ മേധാവി ശനിയാഴ്ച രാജിവെക്കുകയും ചെയ്തു. അതേസമയം, പൈക്ക് രോഗമുക്തയായാൽ തന്നെ മാനസികക്ഷമത വീണ്ടെടുക്കുമോ എന്നതിൽ ഉറപ്പില്ലെന്നും, അതിനാൽ വധശിക്ഷ ജീവപര്യന്തമായി ചുരുക്കണമെന്നും അഭിഭാഷകൻ ഗവർണറോട് ആവശ്യപ്പെട്ടിട്ടുണ്ട്.
1995-ൽ കോളിൻ സ്ലെമ്മർ എന്ന 19 കാരിയെ ക്രൂരമായി പീഡിപ്പിച്ചു കൊലപ്പെടുത്തിയ കേസിനാണ് 1996-ൽ ക്രിസ്റ്റാ പൈക്കിന് കോടതി വധശിക്ഷ വിധിക്കുന്നത്. അന്ന് പൈക്കിന് 18 വയസ്സ് മാത്രമായിരുന്നു പ്രായം. 30 വർഷത്തിലേറെയായി ഇവർ ജയിലിലാണ്, ഇതിൽ ഭൂരിഭാഗം കാലവും ഏകാന്ത തടവിലായിരുന്നു. വധശിക്ഷ കാണാൻ നാഷ്‌വില്ലിൽ എത്തിയ കൊല്ലപ്പെട്ട സ്ലെമ്മറിന്റെ മാതാവ് മെയ് മാർട്ടിനസ്, ശിക്ഷ പരാജയപ്പെട്ടതറിഞ്ഞ് പൊട്ടിക്കരഞ്ഞു. സംസ്ഥാന ഭരണകൂടം തന്നോട് മാപ്പ് പറയണമെന്നും അവർ ആവശ്യപ്പെട്ടു.
Christa Pike, whose execution failed, remains unconscious
