ടെഹ്റാൻ: ഇസ്രായേൽ-ഇറാൻ യുദ്ധസാഹചര്യം വഷളായതിനെത്തുടർന്ന് ഇറാന്റെ തുറമുഖങ്ങളിലേക്കും അവിടെനിന്നുമുള്ള കപ്പൽ ഗതാഗതത്തിന് മേൽ അമേരിക്കൻ സൈന്യം വീണ്ടും നാവിക ഉപരോധം ഏർപ്പെടുത്തിയതിന് പിന്നാലെ, മിഡിൽ ഈസ്റ്റിലെ മറ്റ് പ്രധാന എണ്ണ-വാതക കയറ്റുമതി പാതകളും തടസ്സപ്പെടുത്തുമെന്ന കടുത്ത ഭീഷണിയുമായി ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (IRGC). ചൊവ്വാഴ്ച വൈകിട്ടോടെ യുഎസ് ഉപരോധം പുനരാരംഭിച്ചതിന് തൊട്ടുപിന്നാലെ ബുധനാഴ്ച പുറത്തുവിട്ട പ്രസ്താവനയിലാണ് ഐ.ആർ.ജി.സി തങ്ങളുടെ കടുത്ത നിലപാട് വ്യക്തമാക്കിയത്.
“അമേരിക്കയുടെയും അവരുടെ സഖ്യകക്ഷികളുടെയും താല്പര്യങ്ങൾ സംരക്ഷിക്കുന്ന മറ്റ് എണ്ണ, വാതക കയറ്റുമതി പാതകളും അടച്ചുപൂട്ടാൻ പോകുകയാണ്. മേഖലയിലെ എണ്ണ-വാതക കയറ്റുമതി ഒന്നുകിൽ എല്ലാവർക്കും സാധ്യമാകും, അല്ലെങ്കിൽ ആർക്കും ഉണ്ടാകില്ല,” എന്ന് ഐ.ആർ.ജി.സി മുന്നറിയിപ്പ് നൽകി.
ആഗോള വിപണിയെ കാത്തിരിക്കുന്ന പുതിയ ഭീഷണി
ഹോർമുസ് കടലിടുക്കിന്റെ അടച്ചുപൂട്ടൽ: യുദ്ധം ആരംഭിക്കുന്നതിന് മുൻപ് ലോകത്തിലെ ആകെ ക്രൂഡ് ഓയിലിന്റെയും ദ്രവീകൃത പ്രകൃതിവാതകത്തിന്റെയും അഞ്ചിലൊന്നും കടന്നുപോയിരുന്ന തന്ത്രപ്രധാനമായ ഹോർമുസ് കടലിടുക്ക് പൂർണ്ണമായും അടച്ചതായി കഴിഞ്ഞ വാരാന്ത്യത്തിൽ ഇറാൻ പ്രഖ്യാപിച്ചിരുന്നു.
ചെങ്കടലിലെ അനിശ്ചിതത്വം: ലോകത്തിലെ ഏറ്റവും വലിയ ക്രൂഡ് ഓയിൽ കയറ്റുമതിക്കാരായ സൗദി അറേബ്യ, ഹോർമുസിലെ പ്രതിസന്ധി കാരണം തങ്ങളുടെ ഭൂരിഭാഗം കയറ്റുമതിയും ചെങ്കടൽ പാതയിലേക്ക് മാറ്റിയിരുന്നു. എന്നാൽ, ചെങ്കടലിന്റെ തെക്കേ പ്രവേശന കവാടമായ ‘ബാബ് അൽ-മന്ദബ്’ കടലിടുക്കിന് സമീപം ഇറാന്റെ പിന്തുണയുള്ള യെമനിലെ ഹൂതി വിമതരുടെ ശക്തമായ സാന്നിധ്യമുള്ളത് ആഗോള ഊർജ്ജ വിതരണത്തിന് വൻ ഭീഷണിയാകുന്നുണ്ട്. ഇറാന്റെ നിർദ്ദേശപ്രകാരം ഹൂതികൾ ചെങ്കടലിലെ കപ്പലുകളെ ലക്ഷ്യമിട്ടാൽ ലോകം കടുത്ത എണ്ണക്ഷാമത്തിലേക്ക് നീങ്ങും.
യുഎസ് പുനരാരംഭിച്ച കപ്പൽ ഉപരോധം
അമേരിക്കൻ സൈന്യത്തിന്റെ സെൻട്രൽ കമാൻഡ് എക്സിലൂടെ വ്യക്തമാക്കിയത് അനുസരിച്ച്, ചൊവ്വാഴ്ച യുഎസ് സമയം വൈകുന്നേരം 4 മണിക്ക് ഇറാന്റെ തീരങ്ങളിലേക്കുള്ള കപ്പൽ ഉപരോധം ഔദ്യോഗികമായി പുനരാരംഭിച്ചു.
ഈ യുദ്ധത്തിന്റെ പ്രാരംഭ ഘട്ടത്തിൽ, ഏപ്രിൽ മുതൽ ജൂൺ വരെയുള്ള ഏകദേശം രണ്ട് മാസക്കാലം അമേരിക്ക ഇത്തരത്തിൽ ഇറാന് മേൽ കടുത്ത നാവിക ഉപരോധം ഏർപ്പെടുത്തിയിരുന്നു. മിഡിൽ ഈസ്റ്റ് മുതൽ ആയിരക്കണക്കിന് മൈലുകൾ അകലെയുള്ള ഇന്ത്യൻ മഹാസമുദ്രം വരെ വ്യാപിച്ചുകിടക്കുന്ന വലിയൊരു മേഖല കേന്ദ്രീകരിച്ചായിരുന്നു അന്ന് യുഎസ് നാവികസേന ഈ ഓപ്പറേഷൻ നടത്തിയത്. താൽക്കാലിക വെടിനിർത്തലിനെത്തുടർന്ന് പിൻവലിച്ച ഈ ഉപരോധമാണ് ഇപ്പോൾ ഇറാൻ കപ്പലുകളെ തടഞ്ഞുകൊണ്ട് അമേരിക്ക വീണ്ടും കടുപ്പിച്ചിരിക്കുന്നത്.
