വാഷിംഗ്ടൺ: ഇറാനുമായി വീണ്ടും സൈനികപരമായ ഏറ്റുമുട്ടലിലേക്ക് കടന്നാൽ ഇസ്രായേലിന് അമേരിക്കയുടെ പിന്തുണയുണ്ടാകില്ലെന്നും ഒറ്റയ്ക്ക് പോരാടേണ്ടി വരുമെന്നും യുഎസ് പ്രസിഡൻ്റ് ഡോണൾഡ് ട്രംപിൻ്റെ കടുത്ത മുന്നറിയിപ്പ്. പ്രമുഖ അന്താരാഷ്ട്ര മാധ്യമമായ ‘ആക്സിയോസിന്’ നൽകിയ പ്രത്യേക അഭിമുഖത്തിലാണ് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവുമായുള്ള ഫോൺ സംഭാഷണത്തെക്കുറിച്ച് ട്രംപ് വെളിപ്പെടുത്തിയത്.
“ബിബി (നെതന്യാഹു), നിങ്ങൾ കൂടുതൽ ജാഗ്രത പാലിക്കുന്നത് നന്നായിരിക്കും. അല്ലാത്തപക്ഷം വളരെ പെട്ടെന്ന് തന്നെ നിങ്ങൾക്ക് ഈ യുദ്ധത്തിൽ ഒറ്റയ്ക്ക് പോരാടേണ്ടി വരും,” ട്രംപ് നെതന്യാഹുവിനോട് വ്യക്തമാക്കിയതായി ആക്സിയോസ് റിപ്പോർട്ട് ചെയ്യുന്നു.
മിഡിൽ ഈസ്റ്റിൽ സമാധാനം പുനഃസ്ഥാപിക്കാൻ അമേരിക്കയുടെ നേതൃത്വത്തിൽ നടത്തുന്ന നയതന്ത്ര നീക്കങ്ങൾക്ക് ഇസ്രായേലിൻ്റെ ആക്രമണങ്ങൾ തടസ്സമാകരുതെന്നാണ് ട്രംപിൻ്റെ നിലപാട്. ഇസ്രായേലും ഇറാനും തമ്മിൽ അടുത്തിടെയുണ്ടായ മിസൈൽ ആക്രമണങ്ങൾക്ക് ശേഷം മേഖലയിൽ യുദ്ധഭീതി ശക്തമായിരുന്നു. എന്നാൽ ഇരുപക്ഷവും ആക്രമണങ്ങൾ ഉടനടി അവസാനിപ്പിക്കണമെന്നും, തിരിച്ചടികളിൽ നിന്ന് പിന്മാറാൻ താൻ നെതന്യാഹുവോട് ആവശ്യപ്പെട്ടിട്ടുണ്ടെന്നും ട്രംപ് അഭിമുഖത്തിൽ പറഞ്ഞു.
അമേരിക്കയുടെയും മറ്റ് പ്രാദേശിക മധ്യസ്ഥരുടെയും സഹകരണത്തോടെ ഇറാനുമായി സമാധാന ചർച്ചകൾ പുരോഗമിക്കുന്ന പശ്ചാത്തലത്തിലാണ് ട്രംപിൻ്റെ ഈ നിർണ്ണായക ഇടപെടൽ. ഇസ്രായേലിൻ്റെ സൈനിക നീക്കങ്ങൾ കാരണം മേഖലയിൽ മറ്റൊരു വലിയ യുദ്ധത്തിലേക്ക് അമേരിക്കയെ വലിച്ചിഴയ്ക്കാൻ താല്പര്യമില്ലെന്ന വ്യക്തമായ സൂചനയാണ് യുഎസ് പ്രസിഡൻ്റ് ഇതിലൂടെ നൽകുന്നത്.
‘Israel will be alone if it goes to war with Iran again’; Donald Trump issues stern warning to Netanyahu
