തിരുവനന്തപുരം: കേരളത്തിൽ എൽ.ഡി.എഫ് സർക്കാർ മൂന്നാം തവണയും അധികാരത്തിൽ വരുമെന്ന് സ്പീക്കർ എ.എൻ. ഷംസീർ. സംസ്ഥാനത്ത് നിലവിൽ ഇടത് മുന്നണിക്ക് അനുകൂലമായ രാഷ്ട്രീയ സാഹചര്യമാണ് നിലനിൽക്കുന്നതെന്ന് അദ്ദേഹം വാർത്താ സമ്മേളനത്തിൽ പറഞ്ഞു.
കണ്ണൂർ റെയിൽവേ സ്റ്റേഷനിൽ മന്ത്രി വീണാ ജോർജിനെതിരെയുണ്ടായ പ്രതിഷേധത്തെ അദ്ദേഹം ശക്തമായി അപലപിച്ചു. പ്രതിഷേധത്തിനിടെ മന്ത്രിക്ക് പരിക്കേൽക്കുകയും അവർ അവശയാകുകയും ചെയ്തിരുന്നു. “മന്ത്രി അവശയായി പ്ലാറ്റ്ഫോമിൽ ഇരിക്കുമ്പോൾ അവരെ ഉപേക്ഷിച്ച് വന്ദേഭാരത് ട്രെയിനിൽ യാത്ര തുടരാൻ എനിക്ക് കഴിയുമായിരുന്നില്ല,” സ്പീക്കർ വ്യക്തമാക്കി. മന്ത്രിയെ ഉടൻ ആശുപത്രിയിലെത്തിക്കാനുള്ള ക്രമീകരണങ്ങൾ താൻ നേരിട്ട് ഇടപെട്ട് നടത്തിയെന്നും അദ്ദേഹം കൂട്ടിച്ചേർത്തു. സമരക്കാർ ആയുധം ഉപയോഗിച്ചുവെന്ന് താൻ എവിടെയും പറഞ്ഞിട്ടില്ലെന്നും അദ്ദേഹം വ്യക്തമാക്കി.
മൂന്നര വർഷത്തിലേറെ സ്പീക്കറായി സേവനമനുഷ്ഠിക്കാൻ കഴിഞ്ഞതിൽ അഭിമാനമുണ്ടെന്ന് അദ്ദേഹം പറഞ്ഞു. നിയമസഭയുടെ സുഗമമായ നടത്തിപ്പിന് ഭരണപക്ഷവും പ്രതിപക്ഷവും ഒരുപോലെ സഹകരിച്ചു. നിരവധി നിയമപരിഷ്കാരങ്ങൾ ഈ കാലയളവിൽ നടപ്പിലാക്കാൻ സാധിച്ചുവെന്നും അദ്ദേഹം ഓർമ്മിപ്പിച്ചു.
ഭാവിയിൽ സഭയിലെത്തുന്ന ജനപ്രതിനിധികളോട് നിയമസഭാ നടപടികളെ ഗൗരവമായി കാണണമെന്നാണ് തനിക്ക് അഭ്യർത്ഥിക്കാനുള്ളതെന്ന് അദ്ദേഹം പറഞ്ഞു. സഭാതലം ജനകീയ പ്രശ്നങ്ങൾ ചർച്ച ചെയ്യാനുള്ള വേദിയായി ഉപയോഗിക്കണമെന്നും അദ്ദേഹം ഓർമ്മിപ്പിച്ചു.
LDF will come to power for the third time; Speaker A.N. Shamseer
