തിരുവനന്തപുരം: കേരളത്തിൽ ഇന്നലെ പലയിടങ്ങളിലായി ഉണ്ടായ പെട്ടെന്നുള്ള അതിശക്തമായ മഴയ്ക്ക് കാരണം ലഘുമേഘവിസ്ഫോടനങ്ങളെന്ന് റിപ്പോർട്ട്. വളരെ കുറഞ്ഞ സമയത്തിനുള്ളിൽ ഒരു പ്രത്യേക പ്രദേശത്ത് മാത്രം കേന്ദ്രീകരിച്ച് പെയ്യുന്ന ഇത്തരം തീവ്രമഴ മലയോര മേഖലകളിലും നഗരങ്ങളിലും കനത്ത നാശനഷ്ടമാണ് ഉണ്ടാക്കുന്നത്.
സാധാരണ മൺസൂൺ മഴയിൽ നിന്ന് വ്യത്യസ്തമായി, പെട്ടെന്നുണ്ടാകുന്ന പ്രാദേശിക താപ വ്യതിയാനങ്ങളാണ് (Local Convection) ലഘുമേഘവിസ്ഫോടനങ്ങൾക്ക് വഴിവെക്കുന്നത്. കടലിൽ നിന്നുള്ള ഈർപ്പമേറിയ കാറ്റും പശ്ചിമഘട്ട മലനിരകളുടെ സാന്നിധ്യവും കൂടിച്ചേരുമ്പോൾ അന്തരീക്ഷത്തിൽ വൻതോതിൽ ‘കുമുലോനിംബസ്’ മേഘങ്ങൾ രൂപപ്പെടുന്നു. ഇവയാണ് ഏതാനും മണിക്കൂറുകൾ കൊണ്ട് 50 മുതൽ 100 മില്ലിമീറ്ററിലധികം മഴ ഒരു ചെറിയ പരിധിയിൽ മാത്രം വർഷിക്കാൻ കാരണം. വളരെ പെട്ടെന്ന് രൂപപ്പെടുന്നതിനാൽ ഇത്തരം മേഘവിസ്ഫോടനങ്ങളെ കൃത്യമായി മുൻകൂട്ടി പ്രവചിക്കാൻ നിലവിലെ സംവിധാനങ്ങൾക്ക് പരിമിതികളുണ്ട്. ഇത് ദുരന്ത നിവാരണ പ്രവർത്തനങ്ങളുടെ സുരക്ഷാ ഒരുക്കങ്ങളെപ്പോലും ബാധിക്കുന്നുണ്ട്.
ലഘുമേഘവിസ്ഫോടനങ്ങളെത്തുടർന്ന് സംസ്ഥാനത്തിൻ്റെ വിവിധ ഭാഗങ്ങളിൽ വലിയ പ്രത്യാഘാതങ്ങളാണ് ഉണ്ടായിരിക്കുന്നത്. മലയോരങ്ങളിൽ പെയ്യുന്ന അതിതീവ്ര മഴ കാരണം പുഴകളിൽ സെക്കൻഡുകൾക്കുള്ളിൽ ജലനിരപ്പ് ഉയരുകയും, ജനവാസ മേഖലകളിലേക്ക് വെള്ളം ഇരച്ചുകയറുകയും ചെയ്യുന്നു. കോട്ടയം, ഇടുക്കി, പത്തനംതിട്ട, വയനാട് തുടങ്ങിയ ജില്ലകളിലെ ഹൈറേഞ്ച് മേഖലകളിൽ മണ്ണ് കുതിർന്ന് തുടർച്ചയായ ഉരുൾപൊട്ടലുകളും മണ്ണൊലിപ്പും റിപ്പോർട്ട് ചെയ്തിട്ടുണ്ട്.
കൊച്ചി, തൃശ്ശൂർ, കോഴിക്കോട് തുടങ്ങിയ നഗരങ്ങളിലെ ഡ്രെയിനേജ് സംവിധാനങ്ങൾക്ക് ഉൾക്കൊള്ളാൻ കഴിയുന്നതിലും വേഗത്തിൽ വെള്ളം നിറഞ്ഞുകവിഞ്ഞത് വൻ ഗതാഗതക്കുരുക്കിനും വെള്ളക്കെട്ടിനും കാരണമായി. കാലാവസ്ഥാ വ്യതിയാനത്തിന്റെ ഭാഗമായി വരും ദിവസങ്ങളിലും സംസ്ഥാനത്ത് ഇത്തരം ലഘുമേഘവിസ്ഫോടനങ്ങൾക്ക് സാധ്യതയുണ്ടെന്നാണ് വിദഗ്ധർ നൽകുന്ന സൂചന. മലയോര മേഖലകളിലൂടെയുള്ള രാത്രിയാത്രകൾ പൂർണ്ണമായും ഒഴിവാക്കണമെന്നും, പുഴകളിലും തോടുകളിലും ഇറങ്ങരുതെന്നും ദുരന്തനിവാരണ അതോറിറ്റി കർശന നിർദ്ദേശം നൽകിയിട്ടുണ്ട്. ഔദ്യോഗിക ജാഗ്രതാ നിർദ്ദേശങ്ങൾ കർശനമായി പാലിക്കാൻ പൊതുജനങ്ങൾ തയ്യാറാകണം.
ഏറ്റവും കൂടുതൽ പെയ്ത്ത് പത്തനംതിട്ടയിലെ വടശേരിക്കരയിൽ (24 മണിക്കൂറിൽ 36.1 സെന്റീമീറ്റർ). ഇടുക്കി ജില്ലയിലെ വാഗമണ്ണിൽ 31.43 സെന്റീമീറ്റർ മഴ രേഖപ്പെടുത്തി. ഇടുക്കി കല്ലാർ ഉൾപ്പെടെ വിവിധ ഡാമുകൾ തുറന്നു. തിരുവനന്തപുരം, കൊല്ലം ഒഴികെ എല്ലാ ജില്ലകളിലും ഇന്ന് ഓറഞ്ച് അലർട്ടാണ്.
‘Light cloudbursts’ cause heavy damage in Kerala; Hilly areas tremble in unpredictable heavy rain, flash floods a concern
