ന്യൂഡൽഹി: നീറ്റ് പരീക്ഷാ പേപ്പർ ചോർച്ചയുമായി ബന്ധപ്പെട്ട വിവാദങ്ങളിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ്റെ രാജി ആവശ്യപ്പെട്ട് പ്രതിപക്ഷം നടത്തിയ കനത്ത ബഹളത്തെത്തുടർന്ന് ലോക്സഭാ നടപടികൾ തടസ്സപ്പെട്ടു. സഭ നിയന്ത്രിക്കാൻ സാധിക്കാതെ വന്നതോടെ സ്പീക്കർ ഓം ബിർള ലോക്സഭ തിങ്കളാഴ്ച രാവിലെ 11 മണി വരെ നിർത്തിവെക്കുന്നതായി പ്രഖ്യാപിച്ചു.
വർഷകാല സമ്മേളനം ആരംഭിച്ചത് മുതൽ പരീക്ഷാ ക്രമക്കേടുകൾ ഉയർത്തിക്കാട്ടി പ്രതിപക്ഷം പാർലമെൻ്റിൽ ശക്തമായ പ്രതിഷേധമാണ് രേഖപ്പെടുത്തുന്നത്. പരീക്ഷാ ചോർച്ചയിൽ ലക്ഷക്കണക്കിന് വിദ്യാർത്ഥികളുടെ ഭാവി തുലാസിലായെന്നും, ഇതിന്റെ പൂർണ്ണ ഉത്തരവാദിത്തം ഏറ്റെടുത്ത് വിദ്യാഭ്യാസ മന്ത്രി ഉടനടി രാജിവയ്ക്കണമെന്നും കോൺഗ്രസ് ഉൾപ്പെടെയുള്ള പ്രതിപക്ഷ കക്ഷികൾ ആവശ്യപ്പെട്ടു.
മന്ത്രി രാജി വയ്ക്കാതെ സഭയിൽ മറ്റ് യാതൊരുവിധ ചർച്ചകൾക്കും അനുവദിക്കില്ലെന്ന കടുത്ത നിലപാടിലാണ് പ്രതിപക്ഷം. ഡൽഹിയിൽ പ്രതിഷേധിച്ച വിദ്യാർത്ഥികൾക്ക് നേരെ ഉണ്ടായ പൊലീസ് നടപടിയെ പ്രതിപക്ഷ നേതാവ് രാഹുൽ ഗാന്ധിയും കടുത്ത ഭാഷയിൽ വിമർശിച്ചു.
എന്നാൽ, നിയമങ്ങൾക്കനുസൃതമായി പരീക്ഷാ ചോർച്ചയുമായി ബന്ധപ്പെട്ട ഏത് വിഷയത്തിലും സഭയിൽ വിശദമായ ചർച്ചയ്ക്ക് സർക്കാർ തയ്യാറാണെന്ന് പാർലമെന്ററി കാര്യ മന്ത്രി കിരൺ റിജിജു അറിയിച്ചു. ചർച്ചകളിൽ നിന്ന് ഒളിച്ചോടാൻ വേണ്ടിയാണ് പ്രതിപക്ഷം മനഃപൂർവം സഭയിൽ ബഹളം സൃഷ്ടിക്കുന്നതെന്ന് ഭരണപക്ഷവും കുറ്റപ്പെടുത്തി. ഇരുപക്ഷവും നിലപാടുകളിൽ ഉറച്ചുനിന്നതോടെ സഭാ നടപടികൾ പൂർണ്ണമായും തടസ്സപ്പെടുകയായിരുന്നു.
Lok Sabha adjourned till Monday over opposition’s demand for Education Minister’s resignation
