കനത്ത സുരക്ഷയിൽ നീറ്റ് പുനഃപരീക്ഷ ആരംഭിച്ചു. ചോദ്യപേപ്പര് ചോര്ച്ചയെത്തുടര്ന്ന് വിവാദത്തിലായ പരീക്ഷയുടെ പുനഃപരീക്ഷയാണ് ഇന്ന് ഉച്ചയ്ക്ക് രണ്ടു മുതല് വൈകിട്ട് 5.15 വരെ നടക്കുന്നത്. രാജ്യത്തെ 5440 പരീക്ഷ കേന്ദ്രങ്ങളിലായി 23 ലക്ഷത്തോളം വിദ്യാര്ഥികളാണ് പുനഃപരീക്ഷ എഴുതുന്നത്. അതേസമയം, വിവിധ കേന്ദ്രങ്ങളിൽ വൈകിയെത്തിയ വിദ്യാർത്ഥികൾക്ക് പരീക്ഷയെഴുതാനായില്ല.
ചോദ്യപേപ്പര് ക്രമക്കേട് ഉയര്ന്ന പശ്ചാത്തലത്തില് പഴുതടച്ചുള്ള സുരക്ഷാക്രമീകരണങ്ങളാണ് കേന്ദ്ര സര്ക്കാര് ഏര്പ്പെടുത്തിയിരിക്കുന്നത്. പരീക്ഷാകേന്ദ്രങ്ങളില് രണ്ടരലക്ഷം പൊലീസുകാരെയും 15000 അര്ധസൈനികരെയും വിന്യസിച്ചു. ചോദ്യപേപ്പറുടെ സുരക്ഷാചുമതല അര്ധസൈനിക വിഭാഗങ്ങള്ക്കാണ് നല്കിയിരിക്കുന്നത്. പരീക്ഷാകേന്ദ്രങ്ങളില് ഒന്നരലക്ഷം സിസിടിവി ക്യാമറകളും 51000 സിഗ്നല് ജാമറുകളും ഏര്പ്പെടുത്തി.
ക്യാമറകളിലെ ദൃശ്യങ്ങള് നീറ്റ് പരീക്ഷയുടെ ചുമതലയുള്ള നാഷണല് ടെസ്റ്റിങ് ഏജന്സിയുടെ (എന്ടിഎ) പ്രത്യേക സംഘം തത്സമയം നിരീക്ഷിക്കും. പരീക്ഷാകേന്ദ്രങ്ങളില് മേല്നോട്ടത്തിനായി 6669 നിരീക്ഷകരെയും നിയോഗിച്ചിട്ടുണ്ട്. വ്യോമസേനയുടെ വിമാനങ്ങളിലാണ് ചോദ്യപേപ്പറുകള് പരീക്ഷാകേന്ദ്രങ്ങളില് എത്തിച്ചത്. പരീക്ഷാകേന്ദ്രങ്ങളില്വെച്ച് ക്രമക്കേടുകള് കാണിച്ചാല് കര്ശന നടപടി സ്വീകരിക്കുമെന്നാണ് അധികൃതര് നല്കിയിരിക്കുന്ന മുന്നറിയിപ്പ്.
NEET re-exam begins amid tight security; Paramilitary forces to take charge of question paper security
