ന്യൂഡൽഹി: ജൂൺ 21-ന് നടക്കാനിരിക്കുന്ന നീറ്റ്-യുജി പുനഃപരീക്ഷയുടെ സുരക്ഷിതവും സുഗമവുമായ നടത്തിപ്പിനായി ഇന്ത്യൻ വ്യോമസേനയുടെ സഹായം തേടി അധികൃതർ. രാജ്യത്തെ വിവിധ ഭാഗങ്ങളിലുള്ള 18 കേന്ദ്രങ്ങളിലേക്ക് പരീക്ഷാ ചോദ്യപേപ്പറുകൾ വിമാനമാർഗം എത്തിക്കുന്നതിനുള്ള ചുമതല വ്യോമസേനയ്ക്ക് നൽകിയിട്ടുണ്ട്. പരീക്ഷയുടെ സുരക്ഷ ഉറപ്പാക്കുന്നതിനും തടസ്സങ്ങളില്ലാതെ നടപടികൾ പൂർത്തിയാക്കുന്നതിനുമായാണ് പ്രതിരോധ മന്ത്രാലയത്തിന്റെ ഈ നിർണായക ഇടപെടൽ.
ചോദ്യപേപ്പറുകളുടെ വിതരണത്തിന് പുറമെ, പരീക്ഷയുടെ വിജയകരമായ നടത്തിപ്പിനായി ആവശ്യമായ മറ്റ് സഹായങ്ങളും നൽകാൻ സായുധസേന സജ്ജമാണെന്ന് പ്രതിരോധ വൃത്തങ്ങൾ അറിയിച്ചു. നാഷണൽ ടെസ്റ്റിങ് ഏജൻസിയുടെ (എൻ.ടി.എ) മേൽനോട്ടത്തിൽ പരീക്ഷയ്ക്കായുള്ള ഒരുക്കങ്ങൾ അതിവേഗം പുരോഗമിക്കുകയാണെന്നും അധികൃതർ വ്യക്തമാക്കി. മുൻപ് നടന്ന പരീക്ഷയുമായി ബന്ധപ്പെട്ട സുരക്ഷാ വീഴ്ചകളും ചോദ്യപേപ്പർ ചോർച്ചാ ആരോപണങ്ങളും ഉയർന്ന പശ്ചാത്തലത്തിൽ സൈന്യത്തിന്റെ നേരിട്ടുള്ള സഹകരണം പരീക്ഷാ നടത്തിപ്പിന് കൂടുതൽ വിശ്വാസ്യതയും സുരക്ഷയും ഉറപ്പാക്കുമെന്നാണ് വിലയിരുത്തൽ.
മെയ് മാസത്തിൽ നടന്ന ആദ്യ പരീക്ഷയിൽ ക്രമക്കേടുകൾ കണ്ടെത്തിയതിനെ തുടർന്ന് നാഷണൽ ടെസ്റ്റിങ് ഏജൻസി പരീക്ഷ റദ്ദാക്കിയിരുന്നു. സംഭവവുമായി ബന്ധപ്പെട്ട അന്വേഷണം നിലവിൽ സി.ബി.ഐ തുടരുകയാണ്. വിദ്യാർഥികൾക്ക് സുതാര്യവും നീതിയുക്തവുമായ പരീക്ഷാ സാഹചര്യം ഒരുക്കുക എന്ന ലക്ഷ്യത്തോടെയാണ് ജൂൺ 21-ന് പുനഃപരീക്ഷ നടത്തുന്നതെന്ന് അധികൃതർ അറിയിച്ചു. ഇതിനോടനുബന്ധിച്ച് പരീക്ഷാകേന്ദ്രം സ്ഥിതിചെയ്യുന്ന നഗരത്തിന്റെ വിവരങ്ങൾ എൻ.ടി.എ പ്രസിദ്ധീകരിച്ചിട്ടുണ്ട്. പരീക്ഷാർഥികൾക്ക് ആപ്ലിക്കേഷൻ നമ്പറും പാസ്വേഡും ഉപയോഗിച്ച് ലോഗിൻ ചെയ്ത് അനുവദിച്ചിട്ടുള്ള പരീക്ഷാ നഗരത്തിന്റെ വിവരങ്ങൾ പരിശോധിക്കാം.
എന്നാൽ നിലവിൽ ലഭ്യമാക്കിയിരിക്കുന്നത് പരീക്ഷാ നഗര വിവരസ്ലിപ്പാണെന്നും ഇത് അഡ്മിറ്റ് കാർഡ് അല്ലെന്നും എൻ.ടി.എ വ്യക്തമാക്കി. അഡ്മിറ്റ് കാർഡുകൾ വരും ദിവസങ്ങളിലാണ് പുറത്തിറക്കുക. ഇന്ത്യയിലെ 551 നഗരങ്ങളിലും വിദേശത്തെ 14 നഗരങ്ങളിലുമായി പെൻ-ആൻഡ്-പേപ്പർ രീതിയിലാണ് പരീക്ഷ നടക്കുക. ഉച്ചയ്ക്ക് 2 മണി മുതൽ വൈകിട്ട് 5.15 വരെയാണ് പരീക്ഷാസമയം. വിദ്യാർഥികൾക്ക് കഴിയുന്നത്ര അവരുടെ ആദ്യ മുൻഗണനാ നഗരം തന്നെ പരീക്ഷാകേന്ദ്രമായി അനുവദിക്കാൻ ശ്രമിച്ചിട്ടുണ്ടെന്നും എൻ.ടി.എ അറിയിച്ചു. പരീക്ഷയുമായി ബന്ധപ്പെട്ട ഏറ്റവും പുതിയ വിവരങ്ങൾക്കായി ഔദ്യോഗിക വെബ്സൈറ്റുകൾ നിരന്തരം പരിശോധിക്കണമെന്ന് അധികൃതർ വിദ്യാർഥികൾക്ക് നിർദേശം നൽകി.
