സാൻ ഫ്രാൻസിസ്കോ: ചൈനീസ് ചാരവൃത്തി ആരോപണങ്ങളും വിവാദങ്ങളും കടുത്തതോടെ എൻവിഡിയ സിഇഒ ജെൻസൺ ഹുവാങ് സ്ഥാനമൊഴിഞ്ഞതിന് പിന്നാലെ കമ്പനിയുടെ ഓഹരി മൂല്യത്തിൽ വൻ ഇടിവ്. കഴിഞ്ഞ ആഴ്ചയിലെ യുഎസ് വിപണി ക്ലോസ് ചെയ്തതിന് ശേഷം ഇതുവരെ എൻവിഡിയയുടെ വിപണി മൂല്യത്തിൽ 700 ബില്യൺ ഡോളറിലധികം നഷ്ടം രേഖപ്പെടുത്തുന്ന സാഹചര്യമാണുള്ളത്. അമേരിക്കൻ സമയം വ്യാഴാഴ്ച രാവിലെയാണ് ഹുവാങ്ങിന്റെ രാജി എൻവിഡിയ ഔദ്യോഗികമായി പ്രഖ്യാപിച്ചത്.
നിലവിലെ ചീഫ് ഫിനാൻഷ്യൽ ഓഫീസർ കൊളെറ്റ് ക്രെസ് ഇടക്കാല സിഇഒ ആയി ചുമതലയേൽക്കുമെന്ന് കമ്പനി അറിയിച്ചു. വിപണി തുറക്കുന്നതിന് മുൻപുള്ള വ്യാപാരത്തിൽ എൻവിഡിയ ഓഹരികൾ 10 ശതമാനത്തിലധികം ($17.73) ഇടിഞ്ഞ് 156 ഡോളറിലെത്തി. ചൈനീസ് രഹസ്യാന്വേഷണ ഏജൻസിക്ക് വേണ്ടി പ്രവർത്തിക്കുന്നുവെന്ന് യുഎസ് സംശയിക്കുന്ന ബിസിനസ് എക്സിക്യൂട്ടീവ് ആലീസ് ഹുവാങ്ങുമായി ജെൻസൺ ഹുവാങ്ങിനുണ്ടായിരുന്ന അവിഹിത ബന്ധം പുറത്തായതോടെ തിങ്കളാഴ്ചയും ചൊവ്വാഴ്ചയും ഓഹരികൾക്ക് 9.6 ശതമാനം മൂല്യത്തകർച്ച നേരിട്ടിരുന്നു.
അതിനിടെ, എൻവിഡിയയുടെ ഹെൽത്ത് കെയർ വിഭാഗം വൈസ് പ്രസിഡന്റ് കിംബർലി പവലുമായും ഹുവാങ്ങിന് ബന്ധമുണ്ടായിരുന്നതായി ‘ന്യൂയോർക്ക് ടൈംസ്’ റിപ്പോർട്ട് ചെയ്തത് പ്രതിസന്ധി കൂടുതൽ സങ്കീർണ്ണമാക്കി.1993-ൽ ഹുവാങ് സഹസ്ഥാപകനായി ആരംഭിച്ച എൻവിഡിയ, നിർമ്മിത ബുദ്ധി രംഗത്തെ വിപ്ലവകരമായ ചിപ്പ് നിർമ്മാണത്തിലൂടെയാണ് ആഗോള ഭീമനായി വളർന്നത്. കറുത്ത ലെതർ ജാക്കറ്റണിഞ്ഞ് എഐ ലോകത്തെ ‘റോക്ക് സ്റ്റാർ’ ആയി വാഴ്ത്തപ്പെട്ടിരുന്ന ജെൻസൺ ഹുവാങ്ങിന്റെ യുഗം അവസാനിച്ചതായി പ്രമുഖ വിപണി വിശകലന വിദഗ്ധൻ ഡാൻ ഐവ്സ് അഭിപ്രായപ്പെട്ടു.
ഹുവാങ്ങിന്റെ അഭാവത്തിൽ കമ്പനിയുടെ ഓഹരി മൂല്യം 300 ഡോളറിൽ നിന്ന് 225 ഡോളറിലേക്ക് താഴാൻ സാധ്യതയുണ്ടെന്നും അദ്ദേഹം വിലയിരുത്തുന്നു. എന്നാൽ, എൻവിഡിയയുടെ കരുത്തായ കമ്പ്യൂട്ടിംഗ് സാങ്കേതികവിദ്യയും സോഫ്റ്റ്‌വെയർ ശൃംഖലയും സിഇഒ മാറിയതുകൊണ്ട് ഇല്ലാതാകില്ലെന്ന് സ്വിസ്‌ക്വാട്ട് സീനിയർ അനലിസ്റ്റ് ഇപെക് ഒസ്കാർഡെസ്കായ വ്യക്തമാക്കി. എഐ നിക്ഷേപങ്ങളുടെ ലാഭക്ഷമതയെക്കുറിച്ച് നിക്ഷേപകർക്കിടയിൽ ആശങ്ക നിലനിൽക്കുന്നതിനിടെയാണ് എൻവിഡിയയിലെ ഈ നേതൃത്വ മാറ്റം. അടുത്ത ആഴ്ച പ്രമുഖ എഐ കമ്പനിയായ ആന്ത്രോപിക്കിന്റെ പ്രാരംഭ ഓഹരി വിൽപ്പന നടക്കാനിരിക്കെ, എൻവിഡിയയിലെ പ്രതിസന്ധി ആഗോള ടെക് വിപണിയെത്തന്നെ സമ്മർദ്ദത്തിലാക്കിയിരിക്കുകയാണ്.
