വാഷിംഗ്ടൺ: അത്യന്തം ജനപ്രിയമായ ഭവന നിർമ്മാണ ബില്ലിൽ ഒപ്പിടില്ലെന്ന പ്രസിഡന്റ് ഡോണൾഡ് ട്രംപിന്റെ പ്രഖ്യാപനത്തിന് പിന്നാലെ, വിഷയത്തിൽ അനുനയ ചർച്ചകൾക്ക് വഴിതേടി റിപ്പബ്ലിക്കൻ സെനറ്റർമാർ. അഞ്ച് മാസത്തിന് ശേഷം നിർണ്ണായക തെരഞ്ഞെടുപ്പിനെ നേരിടാൻ ഒരുങ്ങുന്ന ഒഹായോയിൽ നിന്നുള്ള സെനറ്റർ ജോൺ ഹസ്റ്റഡ്, ട്രംപ് ഒടുവിൽ ബില്ലിൽ ഒപ്പിടുമെന്നാണ് താൻ പ്രതീക്ഷിക്കുന്നതെന്ന് വ്യക്തമാക്കി. സാധാരണ കുടുംബങ്ങൾക്ക് കുറഞ്ഞ ചെലവിൽ വീട് ലഭ്യമാക്കാൻ ഈ ബിൽ വലിയ പിന്തുണ നൽകുമെന്നും അദ്ദേഹം ചൂണ്ടിക്കാട്ടി.
“ഇന്ന് ഉച്ചഭക്ഷണ സമയത്ത് ഞങ്ങൾ പ്രസിഡന്റുമായി സംസാരിക്കുന്നുണ്ട്. അദ്ദേഹം മുന്നോട്ടുവെക്കുന്ന ‘സേവ് അമേരിക്ക ആക്ട്’ വളരെ പ്രധാനപ്പെട്ട ഒന്നാണ്, ഞാൻ അതിന് അനുകൂലമായി ആറ് തവണ വോട്ട് ചെയ്തിട്ടുമുണ്ട്. എന്നാൽ അതോടൊപ്പം തന്നെ ഈ ഭവന ബില്ലും തുല്യ പ്രാധാന്യമുള്ളതാണ്. അമേരിക്കക്കാർക്കായി കൂടുതൽ വീടുകൾ നിർമ്മിക്കുന്നതിനും, വിപണിയിലെ ആവശ്യത്തിനനുസരിച്ച് വിതരണം ഉറപ്പാക്കുന്നതിനും ഇത് സഹായിക്കും. ഇത് വീടുകളുടെ വില കുറയ്ക്കുന്നതിനോ അല്ലെങ്കിൽ നിലവിലെ അനിയന്ത്രിതമായ വിലക്കയറ്റം തടയുന്നതിനോ വലിയ തോതിൽ ഉപകരിക്കും,” ഹസ്റ്റഡ് മാധ്യമങ്ങളോട് പറഞ്ഞു.
ഭവന ബില്ലിൽ നിന്ന് ട്രംപ് പിന്മാറിയത് വരാനിരിക്കുന്ന തെരഞ്ഞെടുപ്പിൽ റിപ്പബ്ലിക്കൻമാരുടെ സാധ്യതകളെ ബാധിക്കുമോ എന്ന ചോദ്യത്തിന്, “ഞാൻ എന്റെ ജോലി കൃത്യമായി ചെയ്യുകയും ഈ ഭവന ബിൽ പാസാക്കിയെടുക്കുകയും ചെയ്തിട്ടുണ്ട്. പ്രസിഡന്റ് ഒടുവിൽ ഇതിൽ ഒപ്പിടുമെന്ന് തന്നെയാണ് എന്റെ ആത്മവിശ്വാസം. അതിനായി ഞങ്ങൾ അദ്ദേഹവുമായി ചേർന്ന് തുടർന്നും പ്രവർത്തിക്കും,” എന്നായിരുന്നു അദ്ദേഹത്തിന്റെ മറുപടി.
അതേസമയം, ഭവന ബില്ലിന്റെ ഒപ്പുവെക്കൽ ചടങ്ങ് ട്രംപ് റദ്ദാക്കിയതിനെക്കുറിച്ചുള്ള മാധ്യമങ്ങളുടെ ചോദ്യങ്ങളോട് പ്രതികരിക്കാൻ സെനറ്റിലെ റിപ്പബ്ലിക്കൻ ഭൂരിപക്ഷ നേതാവ് ജോൺ ഥൂൻ വിസമ്മതിച്ചു. നിലവിലെ സാഹചര്യത്തിൽ ഈ വിഷയത്തിൽ തനിക്ക് പ്രത്യേക നിരീക്ഷണങ്ങളൊന്നും പങ്കുവെക്കാനില്ലെന്നായിരുന്നു അദ്ദേഹത്തിന്റെ ഒഴുക്കൻ മറുപടി. വിഷയത്തിൽ പാർട്ടി നേതാക്കൾക്കിടയിൽ നിലനിൽക്കുന്ന അസ്വസ്ഥതയാണ് ഇത് വ്യക്തമാക്കുന്നത്.
