ഒരിക്കൽ ജനനിബിഡമായ നഗരം, ഇന്ന് അവശിഷ്ടങ്ങൾ മാത്രം; റഫായുടെ തകർച്ച തുറന്നുകാട്ടി ഉപഗ്രഹചിത്രങ്ങൾ

ഗാസയിലെ റഫാ നഗരത്തിന്റെ ഇന്നത്തെ അവസ്ഥ വ്യക്തമാക്കുന്ന ഉപഗ്രഹചിത്രങ്ങൾ പുറത്ത്. ഒരിക്കൽ ജനനിബിഡമായിരുന്ന നഗരത്തിന്റെ വലിയൊരു ഭാഗം ഇപ്പോൾ കെട്ടിടങ്ങളില്ലാത്ത പ്രദേശങ്ങളും അവശിഷ്ടങ്ങളും മാത്രമായി മാറിയതായി ചിത്രങ്ങൾ വ്യക്തമാക്കുന്നു. നിരവധി കെട്ടിടങ്ങൾ പൂർണമായി തകർക്കുകയും ചില പ്രദേശങ്ങളിൽ അവശിഷ്ടങ്ങൾ പോലും നീക്കം ചെയ്യുകയും ചെയ്തിട്ടുണ്ട്. ഇസ്രയേൽ-ഹമാസ് വെടിനിർത്തൽ നിലവിൽ വരുന്നതിന് മുമ്പുതന്നെ റഫായുടെ വലിയൊരു ഭാഗം തകർന്നിരുന്നു.

രണ്ട് വർഷം മുമ്പ് ‘ഓൾ ഐസ് ഓൺ റഫാ’ എന്ന സമൂഹമാധ്യമ പ്രചാരണം ആഗോളശ്രദ്ധ നേടിയിരുന്നു. യുദ്ധത്തിനിടെ ലക്ഷക്കണക്കിന് പലസ്തീനികൾ അഭയം തേടിയ നഗരമായിരുന്നു റഫാ. 2024ൽ ഗാസയിലെ ടെന്റ് ക്യാംപുകൾ ഉൾപ്പെടുത്തി എഐ ഉപയോഗിച്ച് നിർമിച്ച ‘All Eyes on Rafah’ ചിത്രം സമൂഹമാധ്യമങ്ങളിൽ വ്യാപകമായി പ്രചരിച്ചു. ഇൻസ്റ്റഗ്രാമിൽ മാത്രം 4.7 കോടിയിലേറെ പേർ ചിത്രം പങ്കുവച്ചതായി ബിബിസി റിപ്പോർട്ട് ചെയ്തിരുന്നു.

റഫായ്ക്ക് പുറമെ ഗാസയിലെ വിവിധ നഗരങ്ങളിലും പ്രദേശങ്ങളിലും വ്യാപകമായ നാശമാണ് ഉപഗ്രഹചിത്രങ്ങളിൽ കാണുന്നത്. കെട്ടിടങ്ങൾ പൊളിച്ചുനീക്കിയതിനു പിന്നാലെ ചിലയിടങ്ങളിൽ അവശിഷ്ടങ്ങൾ പൂർണമായി നീക്കം ചെയ്തതായും ചിത്രങ്ങൾ വ്യക്തമാക്കുന്നു. വെടിനിർത്തൽ കരാർ നിലവിൽ വന്ന് ഒരു വർഷമായിട്ടും ബുൾഡോസറുകളും സ്ഫോടകവസ്തുക്കളും ഉപയോഗിച്ചുള്ള കെട്ടിടനീക്കം തുടരുന്നതായി അസോസിയേറ്റഡ് പ്രസ് റിപ്പോർട്ട് ചെയ്തു. ഗാസയുടെ ഏകദേശം 60 ശതമാനം പ്രദേശത്തും ഇസ്രയേൽ സൈന്യം നിയന്ത്രണം തുടരുകയാണ്. ഹമാസ് കെട്ടിടങ്ങൾ ഉപയോഗിക്കുന്നത് തടയാനും തുരങ്ക ശൃംഖലകൾ നശിപ്പിക്കാനുമാണ് കെട്ടിടങ്ങൾ പൊളിക്കുന്നതെന്നാണ് ഇസ്രയേൽ സൈന്യത്തിന്റെ വിശദീകരണം.

വെടിനിർത്തലിനെ തുടർന്ന് വലിയ തോതിലുള്ള ആക്രമണങ്ങളും കനത്ത ബോംബാക്രമണങ്ങളും കുറഞ്ഞെങ്കിലും ഇസ്രയേൽ ആക്രമണങ്ങൾ തുടരുന്നതായാണ് റിപ്പോർട്ടുകൾ. വെടിനിർത്തൽ നിലവിൽ വന്നതിന് ശേഷം 1,462 പലസ്തീനികൾ കൊല്ലപ്പെട്ടതായി അൽ ജസീറ റിപ്പോർട്ട് ചെയ്തു. ഹമാസ് അംഗങ്ങളെയാണ് ലക്ഷ്യമിടുന്നതെന്നാണ് ഇസ്രയേലിന്റെ വാദം. എന്നാൽ കൊല്ലപ്പെട്ടവരിൽ സ്ത്രീകളും കുട്ടികളും ഉൾപ്പെടെയുള്ള സാധാരണക്കാരുമുണ്ടെന്നാണ് റിപ്പോർട്ടുകൾ. 2025 സെപ്റ്റംബറിൽ ഗാസയിൽ ഇസ്രയേൽ വംശഹത്യ നടത്തിയതായി യുഎൻ അന്വേഷണ കമ്മിഷൻ കണ്ടെത്തിയിരുന്നു. ആംനസ്റ്റി ഇന്റർനാഷണൽ, ഹ്യൂമൻ റൈറ്റ്സ് വാച്ച്, ഇന്റർനാഷണൽ അസോസിയേഷൻ ഓഫ് ജെനോസൈഡ് സ്കോളേഴ്സ് എന്നിവയും ഗാസയിലെ ഇസ്രയേലിന്റെ നടപടികളെ വംശഹത്യയായി വിലയിരുത്തിയിട്ടുണ്ട്.

എന്നാൽ ഈ ആരോപണങ്ങൾ ഇസ്രയേലും പ്രധാനമന്ത്രി ബെഞ്ചമിൻ നെതന്യാഹുവിന്റെ സർക്കാരും തള്ളുന്നു. ഹമാസ് പോരാളികളെയും അവരുടെ അടിസ്ഥാന സൗകര്യങ്ങളെയുമാണ് ലക്ഷ്യമിടുന്നതെന്നാണ് ഇസ്രയേലിന്റെ നിലപാട്. 2023 ഒക്ടോബർ 7ന് ഹമാസ് തെക്കൻ ഇസ്രയേലിൽ നടത്തിയ ആക്രമണത്തിന് പിന്നാലെ ആരംഭിച്ച യുദ്ധത്തിൽ ഗാസയിലെ ഏകദേശം 20 ലക്ഷം വരുന്ന ജനസംഖ്യയാണ് വലിയ ദുരിതം നേരിടുന്നത്. അടിസ്ഥാന സൗകര്യങ്ങളുടെ തകർച്ചയ്ക്കൊപ്പം ഭക്ഷണം, വെള്ളം, മരുന്ന് തുടങ്ങിയ അവശ്യവസ്തുക്കളുടെ ലഭ്യതയും പ്രതിസന്ധിയിലായി.

ഗാസയിലേക്ക് മാനുഷിക സഹായവും ഭക്ഷണവും വെള്ളവും എത്തിക്കുന്നതിൽ കടുത്ത നിയന്ത്രണങ്ങളുണ്ടെന്ന് ബിബിസി റിപ്പോർട്ട് ചെയ്തിരുന്നു. യുദ്ധത്തിന് മുമ്പുണ്ടായിരുന്ന ജനസംഖ്യയുടെ പത്തിലൊരിലധികം പേർ കൊല്ലപ്പെടുകയോ പരുക്കേൽക്കുകയോ ചെയ്തതായും റിപ്പോർട്ടുകളുണ്ട്. വലിയൊരു വിഭാഗം ജനങ്ങൾ പലതവണ വീടുകളിൽനിന്ന് കുടിയൊഴിപ്പിക്കപ്പെട്ടു. ദശലക്ഷക്കണക്കിന് ആളുകൾക്ക് വീടുകൾ നഷ്ടപ്പെട്ടതോടെ കടൽത്തീരങ്ങളിലും മുൻ കൃഷിയിടങ്ങളിലും ഒഴിഞ്ഞ സ്ഥലങ്ങളിലുമെല്ലാം ടെന്റുകൾ ഉയർന്നു. ക്യാൻവാസും നൈലോണും ഉപയോഗിച്ചുള്ള താൽക്കാലിക ടെന്റുകളിലാണ് നിരവധി കുടുംബങ്ങൾ കഴിയുന്നത്.

വെടിനിർത്തലിന് മുമ്പുതന്നെ റഫായുടെ വലിയൊരു ഭാഗം തകർന്നിരുന്നെങ്കിലും ശേഷിച്ച കെട്ടിടങ്ങളും പൊളിച്ചുനീക്കുന്നത് തുടരുന്നതായി ഉപഗ്രഹചിത്രങ്ങൾ സൂചിപ്പിക്കുന്നു. ചില യുഎൻ കെട്ടിടങ്ങളും നഗരസഭയുടെ കായിക മൈതാനവും മാത്രമാണ് ഇപ്പോഴും നിലനിൽക്കുന്നതായി ചിത്രങ്ങളിൽ കാണുന്നത്. കായിക മൈതാനം സൈനിക താവളമായി ഉപയോഗിക്കുന്നതായും റിപ്പോർട്ടുകളുണ്ട്. ഗാസയിലെ ജനസംഖ്യയുടെ ഭൂരിഭാഗവും ഇപ്പോൾ പ്രദേശത്തിന്റെ ഏകദേശം 40 ശതമാനം വരുന്ന മേഖലയിലാണ് കഴിയുന്നത്. ശേഷിക്കുന്ന പ്രദേശം ഇസ്രയേൽ സൈന്യത്തിന്റെ നിയന്ത്രണത്തിലാണ്.

Once a home, now in rubble: Satellite images show Gaza city destroyed by Israel-Hamas war