ഇടക്കാല തിരഞ്ഞെടുപ്പിന് മുന്നോടിയായി നോർത്ത് കരോലിനയിലെ ഹെൻഡേഴ്സൺവില്ലിൽ നടന്ന റിപ്പബ്ലിക്കൻ പ്രചാരണ റാലിയിൽ യുഎസ് വൈസ് പ്രസിഡന്റ് ജെ.ഡി. വാൻസിന്റെ പ്രസംഗം ജെഫ്രി എപ്സ്റ്റീനുമായി ബന്ധപ്പെട്ട ഫയലുകൾ പുറത്തുവിടണമെന്ന് ആവശ്യപ്പെട്ട് തടസ്സപ്പെടുത്തി പ്രതിഷേധക്കാരൻ. പ്രസംഗം തുടങ്ങി ഏതാനും മിനിറ്റുകൾക്കകം വാൻസിന് തൊട്ടുപിന്നിൽ നിന്നിരുന്ന ഒരാൾ എഴുന്നേറ്റ് “നമ്മുടെ കുട്ടികളെ ദൈവം അനുഗ്രഹിക്കട്ടെ”, “എപ്സ്റ്റീൻ ഫയലുകൾ പുറത്തുവിടുക” എന്ന് ഉറക്കെ വിളിക്കുകയായിരുന്നു.
സംഭവത്തിന്റെ ദൃശ്യങ്ങൾ പുറത്തുവന്നു. തുടർന്ന് സുരക്ഷാ ഉദ്യോഗസ്ഥർ ഇയാളെ പുറത്തേക്ക് കൊണ്ടുപോയെങ്കിലും പ്രതിഷേധം തുടർന്നു. പ്രായപൂർത്തിയാകാത്ത പെൺകുട്ടികളെ ലൈംഗികമായി ചൂഷണം ചെയ്ത കേസിൽ കുറ്റക്കാരനായ സാമ്പത്തിക ഇടപാടുകാരൻ ജെഫ്രി എപ്സ്റ്റീനുമായി ബന്ധപ്പെട്ട രേഖകൾ കൈകാര്യം ചെയ്യുന്നതിൽ ട്രംപ് ഭരണകൂടം സ്വീകരിക്കുന്ന നിലപാട് വീണ്ടും ചർച്ചയായിരിക്കുകയാണ്. പ്രമുഖരുമായി എപ്സ്റ്റീനുണ്ടായിരുന്ന ബന്ധങ്ങളും വർഷങ്ങളായി വിവാദങ്ങൾക്ക് കാരണമായിട്ടുണ്ട്.
പ്രതിഷേധക്കാരനെ പുറത്താക്കിയശേഷം, അനധികൃത അതിർത്തി കടന്നുള്ള പ്രവേശനങ്ങളെക്കുറിച്ച് നേരത്തേ നടത്തിയ പരാമർശം ഓർമിപ്പിച്ചുകൊണ്ട് വാൻസ് പരിഹസിച്ചു. “അമേരിക്കയിൽ അനധികൃതമായി അതിർത്തി കടന്നുള്ള പ്രവേശനം പൂജ്യമാണെന്ന് ഞാൻ പറഞ്ഞിരുന്നു. എന്നാൽ ഒരാൾ വന്നതുകൊണ്ട് വലിയ പ്രശ്നമൊന്നുമില്ലല്ലോ, അല്ലേ?” എന്നായിരുന്നു അദ്ദേഹത്തിന്റെ പ്രതികരണം. എപ്സ്റ്റീൻ ഫയലുകളിൽ അന്വേഷണ രേഖകൾ, കോടതി രേഖകൾ, ഇമെയിലുകൾ, ചിത്രങ്ങൾ, വീഡിയോകൾ തുടങ്ങിയവ ഉൾപ്പെടുന്നു. എപ്സ്റ്റീനുമായും അദ്ദേഹത്തിന്റെ സഹപ്രവർത്തകരുമായും ബന്ധപ്പെട്ട വിവരങ്ങളും അന്വേഷണങ്ങളുടെ ഭാഗമായ രേഖകളും ഇതിലുണ്ട്.
2026 ജനുവരി 30ന് യുഎസ് നീതിന്യായ വകുപ്പ് 30 ലക്ഷത്തിലധികം പേജുകൾ കൂടി പുറത്തുവിട്ടതായി പ്രഖ്യാപിച്ചിരുന്നു. ഇതോടെ പുറത്തുവിട്ട രേഖകളുടെ ആകെ എണ്ണം ഏകദേശം 35 ലക്ഷമായി. രണ്ടായിരത്തിലധികം വീഡിയോകളും 1.8 ലക്ഷം ചിത്രങ്ങളും ഇതിൽ ഉൾപ്പെട്ടിരുന്നു.2025 നവംബറിൽ പ്രസിഡന്റ് ഡോണൾഡ് ട്രംപ് ഒപ്പുവെച്ച എപ്സ്റ്റീൻ ഫയൽസ് ട്രാൻസ്പരൻസി ആക്ടിന്റെ അടിസ്ഥാനത്തിലായിരുന്നു രേഖകൾ പുറത്തുവിട്ടത്. അന്വേഷണ വിവരങ്ങൾ, കോടതി രേഖകൾ, ആശയവിനിമയങ്ങൾ, എപ്സ്റ്റീനുമായി ബന്ധമുള്ളവരെക്കുറിച്ചുള്ള വിവരങ്ങൾ എന്നിവയാണ് രേഖകളിലുള്ളത്.
അതേസമയം, ഫയലുകളിൽ ഒരാളുടെ പേര് ഉൾപ്പെട്ടതുകൊണ്ടുമാത്രം അയാൾ കുറ്റകൃത്യത്തിൽ പങ്കാളിയാണെന്ന് സ്ഥാപിക്കാനാവില്ല. രേഖകൾ പുറത്തുവിടുന്നതുമായി ബന്ധപ്പെട്ട് ഭരണകൂടത്തിന് ആശയവിനിമയത്തിൽ വീഴ്ച സംഭവിച്ചതായി വാൻസ് നേരത്തേ സമ്മതിച്ചിരുന്നു. ജൂലൈയിൽ ഒരു പോഡ്കാസ്റ്റിൽ സംസാരിക്കവേ, വിഷയത്തിൽ ഭരണകൂടം “ആശയവിനിമയം പൂർണമായി പാളിച്ചു” എന്ന് അദ്ദേഹം പറഞ്ഞിരുന്നു. ആദ്യഘട്ടത്തിൽ പുറത്തുവിട്ട രേഖകളുടെ ഉള്ളടക്കത്തെക്കുറിച്ച് അതിരുകടന്ന അവകാശവാദങ്ങൾ ഉന്നയിച്ചതിന് മുൻ അറ്റോർണി ജനറൽ പാം ബോണ്ടിയെയാണ് വാൻസ് കുറ്റപ്പെടുത്തിയത്.
എന്നാൽ വിവരങ്ങൾ മനഃപൂർവം മറച്ചുവയ്ക്കുകയാണെന്ന ആരോപണം അദ്ദേഹം നിഷേധിച്ചു.രേഖകളിലെ വിവരങ്ങൾ മറച്ചുവച്ചതും പ്രസക്തമായ എല്ലാ രേഖകളും പുറത്തുവിട്ടിട്ടുണ്ടോയെന്നതും സംബന്ധിച്ച ചോദ്യങ്ങൾ തുടരുകയാണ്. രേഖകൾ തടഞ്ഞുവച്ചെന്ന വിമർശനം നീതിന്യായ വകുപ്പ് തള്ളിയെങ്കിലും, കൂടുതൽ സുതാര്യത വേണമെന്ന് നിയമനിർമാതാക്കൾ ആവശ്യപ്പെടുന്നു.
‘Release Epstein files’: Protester heckles Vance at rally, vice-prez calls him an ‘illegal immigrant’
