നേപ്പാളിലുണ്ടായ മിന്നൽ പ്രളയ സമയത്ത് താൻ കാഠ്മണ്ഡുവിലേക്കുള്ള യാത്രയിലായിരുന്നുവെന്ന് ശശി തരൂർ എം.പി വ്യക്തമാക്കി. കാഠ്മണ്ഡുവിലെത്തിയപ്പോഴാണ് ദുരന്തത്തിന്റെ യഥാർത്ഥ വ്യാപ്തി അറിയാൻ സാധിച്ചതെന്ന് അദ്ദേഹം പറഞ്ഞു. അപകടത്തിൽ മരണസംഖ്യ 160-ൽ അധികമായെന്നും 2,000-മോ അതിൽ കൂടുതലോ ആളുകളെ കാണാതായിട്ടുണ്ടെന്നാണ് കണക്കാക്കപ്പെടുന്നതെന്നും തരൂർ എക്സിൽ കുറിച്ചു. നേപ്പാളിന് ഇന്ത്യ പ്രഖ്യാപിച്ച അടിയന്തര ദുരിതാശ്വാസ സഹായത്തെ പിന്തുണച്ച അദ്ദേഹം, അയൽരാജ്യത്തിന് എല്ലാവിധ സഹായങ്ങളും ആവശ്യമാണെന്നും കൂട്ടിച്ചേർത്തു.
നേപ്പാളിൽ കുടുങ്ങിയ ഇന്ത്യക്കാരെ തിരികെ മടക്കിയെത്തിക്കാൻ കേന്ദ്ര സർക്കാർ നടപടികൾ വേഗത്തിലാക്കിയിട്ടുണ്ട്. വിദേശകാര്യ മന്ത്രി എസ്. ജയശങ്കറിന്റെ അധ്യക്ഷതയിൽ ഇതുസംബന്ധിച്ച് ഉന്നതതല യോഗം ചേർന്നു. കാഠ്മണ്ഡുവിലെയും ബെയ്ജിങ്ങിലെയും ഇന്ത്യൻ അംബാസഡർമാർ പങ്കെടുത്ത യോഗത്തിന് പുറമെ, വിവിധ സംസ്ഥാന സർക്കാരുകളുമായും ടൂർ ഓപ്പറേറ്റർമാരുമായും വിദേശകാര്യ മന്ത്രാലയം തുടർച്ചയായി ആശയവിനിമയം നടത്തിവരികയാണ്.
ബുധനാഴ്ച പുലർച്ചെ നേപ്പാളിലെ ടിബറ്റൻ അതിർത്തിക്കടുത്താണ് വിനാശകരമായ മിന്നൽപ്രളയമുണ്ടായത്. മഞ്ഞുമല ഇടിഞ്ഞുവീണതാണ് പ്രളയത്തിന് കാരണമായതെന്നാണ് നേപ്പാൾ ദുരന്തനിവാരണ അതോറിറ്റിയുടെ പ്രാഥമിക കണ്ടെത്തൽ. ഗ്രാമങ്ങളും നൂറുകണക്കിന് ട്രക്കുകളും ഒലിച്ചുപോയ പ്രളയത്തിൽ നേപ്പാളിലെ ഒരു ഡസനോളം ജലവൈദ്യുത പദ്ധതികളും തകരാറിലായിട്ടുണ്ട്.
Shashi Tharoor En Route to Kathmandu During Nepal Flash Floods; India Expedites Rescue Operations
