ചെന്നൈ: മുൻ മുഖ്യമന്ത്രി എം. കരുണാനിധിയെ ബഹുമാനപദവി ഉപയോഗിക്കാതെ പേര് മാത്രം വിളിച്ച് പരാമർശിച്ച മന്ത്രിയുടെ നടപടിയിൽ തമിഴ്നാട് നിയമസഭയിൽ മുഖ്യമന്ത്രി സി. ജോസഫ് വിജയ് ക്ഷമാപണം നടത്തി. തിങ്കളാഴ്ചയാണ് സംഭവം. മന്ത്രിയുടെ ഭാഗത്തുനിന്നുണ്ടായ പരാമർശത്തിൽ താൻ ക്ഷമ ചോദിക്കുന്നതായി വിജയ് പറഞ്ഞതോടെ നിയമസഭയിലെ തർക്കത്തിന് വിരാമമായി.
തമിഴ്നാട് വനം മന്ത്രി ആർ.വി. രഞ്ജിത് കുമാർ, ഡിഎംകെയുടെ മുതിർന്ന നേതാവായ കരുണാനിധിയെ പരാമർശിക്കുമ്പോൾ പതിവായി ഉപയോഗിക്കുന്ന ‘കലൈജ്ഞർ’ എന്ന ബഹുമതിപദമോ ‘മുൻ മുഖ്യമന്ത്രി’ എന്ന വിശേഷണമോ ഉപയോഗിക്കാതെ ‘കരുണാനിധി’ എന്ന് മാത്രം വിളിച്ചതാണ് ഡിഎംകെ അംഗങ്ങളുടെ പ്രതിഷേധത്തിന് ഇടയാക്കിയത്.
ആരോഗ്യം, റവന്യൂ വകുപ്പുകൾക്കായുള്ള ധനാഭ്യർഥനകളിന്മേലുള്ള ചർച്ചയ്ക്കിടെയായിരുന്നു സംഭവം. വിവിധ തിരഞ്ഞെടുപ്പ് തന്ത്രങ്ങളെക്കുറിച്ച് സംസാരിക്കുന്നതിനിടെയാണ് ഡിഎംകെ അധ്യക്ഷനായിരുന്ന എം. കരുണാനിധിയെ മന്ത്രി പേര് മാത്രം ഉപയോഗിച്ച് പരാമർശിച്ചത്.
കരുണാനിധിയെ നിയമസഭയിൽ ഔദ്യോഗിക ബഹുമതിപദവികളോടെയാണ് സാധാരണയായി അഭിസംബോധന ചെയ്യാറുള്ളത്. ഈ പതിവിന് വിരുദ്ധമായ പരാമർശത്തിനെതിരെ ഡിഎംകെ അംഗങ്ങൾ ശക്തമായ പ്രതിഷേധവുമായി രംഗത്തെത്തി. മുൻ മന്ത്രി കെ.കെ.എസ്.എസ്.ആർ. രാമചന്ദ്രനാണ് പ്രതിഷേധത്തിന് നേതൃത്വം നൽകിയത്.
പ്രതിഷേധം ശക്തമായതോടെ മുഖ്യമന്ത്രി വിജയ് ഇടപെട്ടു. മന്ത്രി സംസാരിച്ചുകൊണ്ടിരിക്കെ അദ്ദേഹത്തെ തടഞ്ഞ വിജയ്, അന്തരിച്ച നേതാവിനെ അത്തരത്തിൽ പരാമർശിച്ചത് ഉചിതമല്ലെന്ന് വ്യക്തമാക്കി. തുടർന്ന് മന്ത്രിയുടെ ഭാഗത്തുനിന്നുണ്ടായ പരാമർശത്തിൽ അദ്ദേഹം ക്ഷമാപണം നടത്തി. “അദ്ദേഹത്തിന്റെ പേരിൽ ഞാൻ ക്ഷമ ചോദിക്കുന്നു,” എന്ന് വിജയ് പറഞ്ഞു.
Tamil Nadu CM Vijay apologises after minister mentions ex-CM Karunanidhi by name
