ലണ്ടൻ: ആഡംബര കാറുകളുടെ കരുത്തുകാണിക്കാൻ പൊതുറോഡിൽ വെച്ച് ഇന്ത്യൻ വംശജർ നടത്തിയ മത്സരയോട്ടം ഒടുവിൽ കലാശിച്ചത് രണ്ട് ദാരുണ മരണങ്ങളിലും കാൽനൂറ്റാണ്ടിലധികം നീളുന്ന ജയിൽശിക്ഷയിലും. യുകെയിൽ സ്കൂളിലേക്ക് നടന്നുപോവുകയായിരുന്ന അമ്മയെയും നാല് വയസ്സുകാരി മകളെയും അതിവേഗത്തിൽ വന്ന കാറിടിച്ച് കൊലപ്പെടുത്തിയ കേസിൽ ജസ്കമൽ റിയാത് (37), ഹർദീപ് ഭാച്ചു (29) എന്നിവർക്കാണ് കോടതി ആകെ 28 വർഷത്തെ കഠിനതടവ് ശിക്ഷ വിധിച്ചത്.
അപകടകരമായി വണ്ടിയോടിച്ച് മരണത്തിന് കാരണക്കാരനായെന്ന കുറ്റം സമ്മതിച്ച ഹർദീപ് ഭാച്ചുവിന് 12 വർഷവും, കുറ്റം നിഷേധിക്കാൻ ശ്രമിച്ച ജസ്കമൽ റിയാതിന് 16 വർഷവുമാണ് കോടതി തടവുശിക്ഷ ചുമത്തിയത്. യുകെയിലെ സ്കോട്ട് ഹാൾ റോഡിൽ വെച്ച് 2023 ജനുവരിയിലായിരുന്നു നാടിനെ നടുക്കിയ ഈ ദുരന്തം. പരസ്പരം മുൻപരിചയം പോലുമില്ലാതിരുന്ന ഇരുവരും ഒരു ട്രാഫിക് സിഗ്നലിൽ വെച്ചാണ് കണ്ടുമുട്ടുന്നത്. തങ്ങളുടെ സ്പോർട്സ് കാറുകളുടെ കരുത്തിനെക്കുറിച്ച് ഗ്ലാസ് താഴ്ത്തി സംസാരിച്ച ഇവർ, വേഗത കൂട്ടാൻ പരസ്പരം പ്രകോപിപ്പിക്കുകയും മത്സരയോട്ടം ആരംഭിക്കുകയുമായിരുന്നു.
മണിക്കൂറിൽ 40 മൈൽ മാത്രം വേഗത അനുവദിച്ച റോഡിൽ 90 മൈലിലധികം വേഗതയിലാണ് ഇവർ ബിഎംഡബ്ല്യു, ഔഡി കാറുകൾ പായിച്ചത്. റിയാതിന്റെ ബിഎംഡബ്ല്യു കാറിനെ മറികടക്കാൻ ശ്രമിക്കുന്നതിനിടെ ഭാച്ചുവിന്റെ ഔഡി കാർ നിയന്ത്രണം വിട്ട് റോഡരികിലെ നടപ്പാതയിലേക്ക് ഇടിച്ചുകയറുകയായിരുന്നു. ഈ സമയം സ്കൂളിലേക്ക് നടന്നുപോവുകയായിരുന്ന ജസ്റ്റീന ഹുൽബോജ് (27), മകൾ ലെന സെപ്‌ഷോർ (4) എന്നിവരെ കാർ ക്രൂരമായി ഇടിച്ചുതെറിപ്പിച്ചു. രണ്ടുപേരും സംഭവസ്ഥലത്തുതന്നെ ചോര വാർന്നു മരിച്ചു. പ്രതികളുടെ മൊബൈൽ ഫോൺ ദൃശ്യങ്ങളും കാറിലെ ഡാഷ്‌കാം ദൃശ്യങ്ങളുമാണ് കേസിൽ നിർണായക തെളിവുകളായത്.
ശക്തിയേറിയ ആഡംബര കാറുകൾ ഉണ്ട് എന്നത് പൊതുറോഡിൽ അതിന്റെ വേഗത പരീക്ഷിക്കാനുള്ള ലൈസൻസല്ലെന്ന് ശിക്ഷാവിധി പ്രസ്താവിച്ചു കൊണ്ട് ജഡ്ജി റേ സിംഗ് വ്യക്തമാക്കി. ഇത്തരം അമിതവേഗതയിലുള്ള മത്സരയോട്ടങ്ങൾ ഉണ്ടാക്കുന്ന പ്രത്യാഘാതങ്ങൾ ഒരിക്കലും തിരുത്താനാകാത്തതാണെന്നും കോടതി ഓർമ്മിപ്പിച്ചു. ജയിൽശിക്ഷയ്ക്ക് പുറമെ ഇരുവർക്കും ആറ് വർഷത്തെ ഡ്രൈവിംഗ് വിലക്കും കോടതി ഏർപ്പെടുത്തിയിട്ടുണ്ട്. ശിക്ഷാകാലാവധിക്ക് ശേഷം കഠിനമായ ഡ്രൈവിംഗ് ടെസ്റ്റുകൾ പാസായാൽ മാത്രമേ ഇവർക്ക് ഇനി ലൈസൻസ് തിരികെ ലഭിക്കൂ.
The Deadly Game of Excessive Speed: Two Men of Indian Origin Sentenced to 28 Years in Prison for ‘Racing Madness’ That Killed a Mother and Her Child in the UK
