വീണ്ടും പുകഞ്ഞ് യുദ്ധക്കനൽ! ഹോർമുസ് കടലിടുക്ക് അടച്ചു: ഇറാന് മേൽ വീണ്ടും യുഎസിൻ്റെ കടുത്ത വ്യോമാക്രമണം

ടെഹ്‌റാൻ / വാഷിംഗ്ടൺ: അന്താരാഷ്ട്ര കപ്പൽ ഗതാഗത രംഗത്തെ ഏറ്റവും പ്രധാനപ്പെട്ട പാതകളിലൊന്നായ ഹോർമുസ് കടലിടുക്ക് ഇറാൻ പൂർണ്ണമായി അടച്ചുപൂട്ടിയതോടെ ഗൾഫ് മേഖല അതീവ ഗുരുതരമായ യുദ്ധപ്രതിസന്ധിയിലേക്ക്. ജലപാത അടച്ചതിന് പിന്നാലെ ഇറാന് നേരെ യുഎസ് സൈന്യം പുതിയ വട്ട വ്യോമാക്രമണങ്ങൾ ആരംഭിച്ചു. കഴിഞ്ഞ ഏതാനും ദിവസങ്ങൾക്കിടെ യുഎസ് നടത്തുന്ന മൂന്നാമത്തെ വലിയ സൈനിക നടപടിയാണിത്.

ഹോർമുസ് കടലിടുക്കിലൂടെ കടന്നുപോയ സൈപ്രസ് പതാകയേന്തിയ വാണിജ്യ കപ്പലിന് നേരെ ഇറാൻ്റെ ഇസ്ലാമിക് റെവല്യൂഷണറി ഗാർഡ് കോർപ്സ് (ഐആർജിസി) ക്രൂയിസ് മിസൈൽ ആക്രമണം നടത്തിയതാണ് നിലവിലെ സംഘർഷം രൂക്ഷമാക്കിയത്. ആക്രമണത്തിൽ കപ്പലിൻ്റെ എഞ്ചിൻ റൂം തകരുകയും ഒരു ജീവനക്കാരനെ കാണാതാവുകയും ചെയ്തു. നിർദ്ദേശങ്ങൾ ലംഘിച്ച് സിഗ്നലുകൾ ഓഫാക്കി സഞ്ചരിച്ചതിനാണ് കപ്പലിനെതിരെ നടപടിയെടുത്തതെന്നാണ് ഇറാൻ വ്യക്തമാക്കുന്നത്. എന്നാൽ ഇറാൻ്റേത് നഗ്നമായ നിയമലംഘനമാണെന്ന് യുഎസ് സെൻട്രൽ കമാൻഡ് കുറ്റപ്പെടുത്തി. “ഇറാൻ എടുത്തത് തെറ്റായ തീരുമാനമാണ്, അതിനുള്ള വില അവർ നൽകുന്നുണ്ട്” എന്ന് യുഎസ് പ്രതിരോധ സെക്രട്ടറി പീറ്റ് ഹെഗ്സെത് പ്രതികരിച്ചു.

ഫെബ്രുവരി 28-ന് യുഎസ്-ഇസ്രായേൽ സഖ്യം നടത്തിയ വ്യോമാക്രമണത്തിൽ കൊല്ലപ്പെട്ട മുൻ ഇറാൻ സുപ്രീം നേതാവ് അലി ഖമേനിയുടെ സംസ്കാര ചടങ്ങുകൾക്ക് പിന്നാലെയാണ് മേഖല വീണ്ടും യുദ്ധക്കളമായത്. പുതിയ സുപ്രീം നേതാവായി ചുമതലയേറ്റ മകൻ ആയത്തുള്ള മൊജ്തബ ഖമേനി, തൻ്റെ ആദ്യ പൊതുപ്രസ്താവനയിൽ തന്നെ യുഎസിനെതിരെ കടുത്ത പ്രതികാരത്തിന് ആഹ്വാനം ചെയ്തു. നേതാവിൻ്റെ ചോരയ്ക്ക് പകരമായി കൊലയാളികളിൽ നിന്ന് വൻ പ്രതികാരം ചെയ്യുമെന്നും, അത് രാജ്യത്തിൻ്റെ ആവശ്യമാണെന്നും അദ്ദേഹം ടെലിവിഷൻ സന്ദേശത്തിൽ വ്യക്തമാക്കി.

അതിനിടെ അമേരിക്കൻ പ്രസിഡൻ്റ് ഡോണൾഡ് ട്രംപിനെ വധിക്കാൻ ഇറാൻ പദ്ധതിയിടുന്നതായി ഇസ്രായേൽ രഹസ്യാന്വേഷണ വിഭാഗം യുഎസിന് മുന്നറിയിപ്പ് നൽകിയതായി വാൾസ്ട്രീറ്റ് ജേണൽ റിപ്പോർട്ട് ചെയ്തു. എന്നാൽ ട്രംപ് ഇത് ഭാഗികമായി നിഷേധിച്ചു. താൻ വളരെക്കാലമായി ഇറാൻ്റെ ഹിറ്റ്‌ലിസ്റ്റിൽ ഒന്നാമതാണെന്നും എന്നാൽ പുതിയ വധശ്രമ പദ്ധതികളെക്കുറിച്ച് വിവരമില്ലെന്നുമാണ് ട്രംപ് പറഞ്ഞത്. അതേസമയം, അമേരിക്കൻ ഉദ്യോഗസ്ഥരെയോ പ്രസിഡൻ്റിനെയോ ലക്ഷ്യമിട്ടാൽ ഇറാൻ്റെ എല്ലാ മേഖലകളെയും തകർത്തു തരിപ്പണമാക്കുമെന്ന് ട്രംപ് കടുത്ത മുന്നറിയിപ്പ് നൽകിയിട്ടുണ്ട്.

പരസ്പരമുള്ള വ്യോമാക്രമണങ്ങളിൽ ഇതിനകം തന്നെ 17 പേർ കൊല്ലപ്പെടുകയും നൂറിലധികം പേർക്ക് പരിക്കേൽക്കുകയും ചെയ്തിട്ടുണ്ട്. വെടിനിർത്തൽ കരാർ അവസാനിച്ചതായി യുഎസ് പ്രഖ്യാപിച്ചെങ്കിലും, അന്താരാഷ്ട്ര മധ്യസ്ഥർ വഴി സമാധാന ചർച്ചകൾ ഇപ്പോഴും തുടരുന്നുണ്ടെന്നാണ് റിപ്പോർട്ടുകൾ. എണ്ണക്കടത്തിൻ്റെ ഹൃദയഭാഗമായ ഹോർമുസ് കടലിടുക്ക് അടച്ചിട്ടത് ആഗോള വിപണിയെയും സാമ്പത്തിക രംഗത്തെയും വരും ദിവസങ്ങളിൽ എങ്ങനെ ബാധിക്കുമെന്ന ആശങ്കയിലാണ് ലോകരാജ്യങ്ങൾ.

The embers of war are smoldering again! The Strait of Hormuz is closed: US launches heavy airstrikes on Iran